Najib udah madahka ngagai bala penyukung ti diupah-upah iya enti sema BN menang ba PRN di Sarawak ila, iya deka mutarka penanggul ti benung nuntung 1MDB enggau raban pemesai dalam perintah Abu Dhabi.

Kenu ku iya, iya deka betemu enggau raja Mohammed di menua Arab Saudi sereta tembu bepilihbesai Sarawak, iya nya urung bulan Mei tu ila, nitihka penerang ti diterima kami.

Diatu, komuniti di dunya nemu, chara mayar utang nya udah diperundingka enggau dua iku apek bayat, ti dulu suba diberi pengarap dalam kompeni Aabar/IPIC, ti udah nya bekaul enggau skandal 1MDB.

Penerang tu diaku CEO dalam 1MDB empu ba ujung minggu tu tadi.

Dua iku apek bayat nya, Khadem Al-Qubaisi (pengerusi Aabar ti udah diketuka bekereja) enggau Mohd Badawy Al-Husseiny (CEO Aabar) ti mega udah dibuai ari pengawa iya, lalu raban pengurusan ti baru dalam IPIC udah mansutka penerang ti madahka sida udah nyadika dengah pengawa nipu, sepengudah iya ngeluarka kira-kira US$3.5 billion nengah anak kompeni ti pelesu di BVI, udah bekau sida ti nyeintal bayar bejuta-juta dollar ari IPIC lalu nyain jamin Abu Dhabi ti madahka sida enda bekaul.

Orang ti endang waris dalam pengawa nipu nya Najib Razak empu lalu enda patut iya deka diterima nemuai ngagai menua Arab Saudi nya, laban dunya diatu majak nemu sereta ngelala nama utai ti udah nyadi.

Ba pengawa menua Abu Dhabi ngenyauh ke diri ari kena palit skandal dalam 1MDB tu, orang mayuh beratika Najib majak tepekul di teluk.

Ba bulan nyin kemari Sarawak Report udah mantai berita pasal Al-Husseiny udah ditangkap di menua Abu Dhabi, nganti peminta ekstradisyen ari menua US, ti endur iya udah nyadi peranak menua nya.

Kami mega ulih ngamatka berita ti madahka bos iya, Al-Qubaisi udah mega ditangkap lalu ditanka di menua Abu Dhabi.

Raban penerit undang-undang Abu Dhabi udah nagih bayar pulai bejuta-juta dollar Al-Husseiny, lalu mayuh bank di dunya tu udah mekuka sekeda aset iya.

Sekeda kompeni ti besai-besai ti udah dibeli Al-Qubaisi udah enggau enda mukai-mukai dibuai ari portfolio Aabar Investments.

Ba timpuh ti enda lama ba bulan nyin kemari, cherita lama nyengkaum cerita penumbuh kompeni nya udah diubah baru. Semua macham puku dagang ti udah kala ditumbuhka Al-Qubaisi, nyengkaum RHB Capital enggau Falcon Bank nadai agi diayanka dalam laman web anak kompeni IPIC nya.

Nitihka pansik enggau kira-kira kami, bisi sepenyampau US$5 billion nyadika duit puku dagang. Tang sekali ke puku dagang ti ditemu nya ukai enggi wang turu IPIC, tang dikaitka terus ngagai Al-Qubaisi empu, sama sebaka enggau puku dagang iya ba rumah Santander, tauka iya agi bisi kedalih ti bukai?

Mayuh jaku tanya bekaul enggau tikas pengempu psekeda pemansang ti besai-besai baka Lamar Residence, dulu suba dikemataka Aabar – sebengkah dagang ti ngena lebih setengah billion dollar, nitihka pansik kami.

Tambah mega Al-Qubaisi udah dibuai ari sekeda batang pengawa iya, siti ari tanda ti terang ti endur kuasa iya udah diambi pulai baka ti direpotka.

Tu nyengkaum sekeda kelab malam Hakkasan ti dipechayaka bala pemerati bisi bekaul enggau puku dagang $2 billion.

Kena 4hb April tu tadi CEO ti dipaduka Al-Qubaisi udah mansutka jaku gerah madahka bos iya nya udah badu gawa nyadi Pengerusi kompeni.

Al-Qubaisi mega didinga badu bekereja ba First Energy Bank, ti endur iya megai mayuh agi saham dia lalu menyadi iya Darwish Al-Qubaisi mega ditemu badu ba bulan Februari nyadika Pengarah ba sebengkah pasaraya Oracle lalu mega sekeda kompeni di pelilih menua Reading di UK.

Nyerumba nya, sekeda kompeni enggi Al-Qubaisi di menua Peranchis, nyengkaum sekeda reta enggau tanah udah belabuh dipansik raban penerit undang-undang di Luxembourgh, ti udah meresa akaun bank iya ba Edmond de Rothschild ti nyadika pun penatai duit iya.
Diatu orang mayuh tau nyadang chara main Al-Qubaisi nya udah datai ba pengujung lalu dikarapka iya deka meri kereja sama.

Beserimbai enggau nya, lebuh pengawa nutup dagang kena hari Satu tu tadi, pemula enggau pemanggar 1MDB udah tebantai.

Nya bepun enggau jaku gerah IPIC ngagai Bursa Tukar Matawang di nengeri London kena 11hb April ti udah kena keduan anak kompeni ti pelesu.

Ba jaku gerah ti dipansutka CEO 1MDB Arul Kanda’ bekaul enggau langgur pengawa rasionalisasyen ke wang turu ti benung dituntung penusah nya makin dipeda bisi pemujur ti semina tinggal RM2.3 billion utang ti deka ditebus.

Penerang ari dalam madahka pemula enggau pemanggar Arul ti madahka nadai sebarang duit tunai ti ulih dikena mayar pulai utang 1MDB.

Enggau nya pemuntan 1MDB bebayarka utang sida RM50 juta ti benung betunggak nya, taja pan ‘udu kena bantah’, laban sida enda ulih mayar, siti penerang ti dibantaika IPIC.
Pagi tu 1MDB ngaku madahka pemayuh utang sida nya udah nambah ngagai US$1.75 billion, ti diinjau ari Bank Mellon, ti udah dikena meli bon ari Goldman Sachs.

Empas ari pengawa berutang ari sekeda bank nya, dia bank nya nyau ngena kuasa sida betagihka utang. Nyentukka sehari tu sepenyampau lebih US$6,5 billion, ti endur mayuh agi utang nya dijamin Perintah Malaysia.

Sebengkah penusah besai ekonomi ke rayat Malaysia empu, ti ditambahka enggau pengusut rega mata duit ringgit.

Bisi sebengkah chara putar ti mudah dikena ngusaika pengusut dalam skandal 1MDB ti semakin majak balat nya, iya nya ngambi pulai semua duit ti udah lenyau dichuri ari 1MDB, dikena nutup sekeda utang menua.

Berita ti manah nya, iya nya bala pemansik di menua Eropa, Singapura enggau US udah lalu benung mekuka sekeda akaun bank enggau reta pengaya sekeda orang ti kena saspek dalam skandal tu ba pengawa sida ti mansik pemindah duit ti udah dichuri nya.

Sekeda akaun bank enggi Jho Low, Najib Razak enggau sida sebilik, nyengkaum enggi Al-Qubaisi, Al-Husseiny enggau Red Granite Pictures disadang bisi ngundang laluh duit churi ti agi mayuh, ti bedau dikena melanja pengawa meli kapal layar, ai champagne, intan, beg tangan, enggau pengawa bebelika undi, enggau ti bukai.

Bala pemansik nyadang US$4 billion udah mujur dibekuka di serata dunya tu.

Rayat Malaysia diatu beguna bendar ke sebuah perintah ti tau dikarapka, ti sanggup bejalaika pansik silik; nangkap bala orang ti salah bekaul enggau skandal tu lalu ngena semua duit churi enggau reta bala orang ti salah nya mayar semua utang ti majak nambah nya, lalu enda ditejuka baka nya aja, deka mai penusah besai ngagai bala orang ti bebayarka chukai menua.

Nama agi utai ti dianti orang di Malaysia, kenu ku raban orang di dunya?