Anak tiri Menteri Besai Najib Rzak, Riza Aziz, dulu ari tu udah ditanya pengarang berita, The Hollywood Reporter, bekaul enggau puku duit ti diperanakka iya dalam dagang ngeluarka wayang ti ngalitka ati orang mayuh.
Lebuh ditanya pasal runding sida sebilik, iya madahka apai tiri iya nya rindu sereta ngambi bagi ngemataka pemansang wayang ti dikeluarka iya nya.
Ba wayang ti beungkus $100 juta ti dikeluarka kompeni Red Granite Pictures enggi Riza Aziz lalu diarahka Martin Scorcese, Wolf of Wall Street, ti dikeluluka Leonardo di Caprio, Riza madahka diri mudah bulih belanja ari sida sebilik ke pengawa nya.
Enggau chara nya Riza Aziz madahka apai tiri iya Menteri Besai Najib Razak endang bisi ngemataka pejalai pengawa iya ti ngeluarka wayang.
Tang, sereta wayang nya dipandangka di serata dunya ba minggu tu tadi, mayuh pemesai di menua Islam udah meri gela ke wayang nya “kamah”!
Kelimpah ari ti ngundan leka jaku ti kamah-kamah, wayang nya mega balat dipasukka lakun ti kamah sereta pengawa orang ti salah guna dadah.
Nyerumba raban orang ti lebih liberal di serata dunya ti ulih nerima cherita pasal pengamah ti bebalut enggau daya idup orang kaya, raban pemesai ti napis wayang nya di menua Islam enda ulih nerima uti enggau jaku tundi dalam wayang nya.
Versyen ti dipandangka di menua Arab Emeriah udah mutung sebagi ari empat bagi ari wayang nya.
Ketegal ti kelalu mayuh ngundan leka jaku ti kamah-kamah dalam wayang nya, wayang nya udah diputung-putung nyentukka iya nyau enda manah dipeda agi, kenu ku bala orang ti meda wayang nya.
Diatu Sarawak Report bisi ninga cherita ti madahka mayuh panggung wayang di Malaysia udah mutuska runding sida enggai mandangka wayang nya.
Enti baka nya, iya nyadika kenyit, ti endur Najib Razak ti nyadi tuai menua, diumbaka raban ekstemis pengarap nyau majak nekan ke orang mayuh ba utai ti tau enggau enda tau dikereja sida.
Baka ti kala ditulis kami dulu ari tu, pengingin Rosmah Mansor ba wayang tu sebedau dikeluarka suba, diatu dipeda nyau tendu.
Gaya utai tu nyungkak jaku tanya orang mayuh betanya nama kebuah raban sida Menteri Besai sebilik dikemendarka ngulihka pengaya nengah dagang wayang kamah taja pan orang bukai balat ditagang meda wayang baka nya?
Patut tauka enda iya ngulihka untung ari ngaga wayang kamah taja pan ditagaka raban orang ti ukai Islam?
Lalu, patut tauka enda bala pengeluar wayang nya, ti nyengkaum anak tiri Menteri Besai Malaysia ti bepengarap Islam nya, meda wayang nya semanjai hari, diau dalam set wayang, taja pan orang bukai enda dikemendarka baka nya?
Lalu, ke penudi tu kita datai ba pekara melanja wayang nya. Kenyau ari dulu kelia orang Islam nyau majak terit ba atur pekara belanja sida enggau chara duit sida datai.
Nitihka ambu iya empu, duit Riza diperanakka dalam pengawa ngaga wayang nya. Bisi mega madahka belanja nya datai ari menua Asia Tenggara enggau Timur Tengah. Enggau nya, sekali ke betul semua belanja nya datai ari menua Islam, enti betul, patut tauka enda duit orang Islam diperanakka dikena ngaga wayang ti kamah taja pan tau mai penguntung?
Sarawak Report enggai ngeluluka diri nemu saut pasal pengarap ba isu tu, lalu kami mai bala orang ti pandai dalam pejalai pengarap sida ngambi bagi ba randau ditu.
Diatu mayuh bisi orang ti bepengarap Islam di menua Malaysia bejalai enggau laki sida, seraya bekenaka ngepan orang Islam ti nutup selampur tubuh sida.
Uji bandingka gaya tu enggau sekeda tubuh ganjang ti dipandangka dalam wayang ti dikeluarka anak tiri Najib nya, Riza Aziz!
Ngena leka jaku ti mudah, kami minta selampur isu tu ngundan ulah ngeluluka diri enggau atur perintah dua standard.
Sistem perintah ti baka tu berat agi ngarika raban orang ti kaya sereta bekuasa lalu sida ngembuan ulah enggau pendiau sepeneka ati sida, tang sida ngukum bala orang bukai taja pan orang bukai nya semina ngerundingka utai ti enda patut diperundingka sida.