Taib lalu enda bulih saut ari Perintah Swiss kemari. Lebuh maya nyaut tanya ari MP Maya Graf di Parlimen Perintah Besai Bern, Menteri Pekara Belanja, Evelyn Widmer Schlum, enti tepansutka jaku!
Nitihka penerang ari Widmer, FINMA, iya nya sebengkah raban pengemata pekara belanja menua nya disadang enda ngeluarka repot pansik ba pengeraja Taib, laban belalau ke undang-undang menua Swiss bekaul enggau nyaga resia bala orang ti nyimpan duit dalam bank menua nya.
Tang, FINMA “deka meri penerang ngagai orang ti kena pansik nya”.
Raban orang ti begunaka repot pansik nya, baka ti dipelabaka nya, Taib empu enggau Perintah Malaysia. Tang baka ni rayat menua Sarawak, ti udah lenyau bebilion-bilion ringgit ba pesaka menua ti udah diterumpak Kepala Menteri bekaul enggau tanah menua ti dilepaska iya, kontrak-kontrak perintah ti diberi-beri iya ngagai kompeni sida sebilik?
Menteri Pekara Belanja menua Swiss enggai nyukung penerang Taib ti madahka diri nadai resia di menua nya.
“Aku berasai enda lantang ati laban perintah menua Swiss mengkang nyalam pengeraja orang siku-siku ti nyukung pengawa makai suap ba menua-menua ti betuaika perintah ti lemi. Nadai guna kitai serebana pasal pengerusak rampa menua enti seagi-agi menua di barat mengkang nyukung pengawa makai suap ba orang diri sebilik baka raban suda Taib.”
Gerempung Bruno Manser bisi udah mansutka jaku pinta sida:
“Baka ni perintah kitai deka madahka tuai perintah ti endang dibalut penyalah makai suap tang ukai rayat iya empu pasal asil pansik nya?” [penerang ari BMF]
Orang mayuh belabaka Taib udah mindahka semua pengeraja simpan iya ari menua Switzerland. Undang-undang ti majak terit di menua nya bekaul enggau nyaga pengeraja simpan orang, nyengkaum orang ti bisi penyalah, udah ngujungka mayuh bala penyimpan mindahka pengeraja sida ngagai menua bukai, taja pan Menteri Pekara Belanja Swiss udah meri jamin ti madahka institute wang sida selamat.
Beduduk ari nya, mayuh orang ngasaika komen ari Taib lebuh aum DUN endang udah diatur iya enggau manah, ti endur iya bebula tuduh orang madahka iya ngembuah pengeraja simpan di menua Switzerland diatu, tang ukai dulu suba.
Tang di menua Monaco ti dipegai perintah Prince Albert, chukai enggau atur ti kurang terit ke pengeraja simpan orang luar, udah narit mayuh orang luar nyimpan pengeraja di menua nya, nyengkaum sida Taib sebilik.
Gerempung Prince Albert Foundation (ti nyukung kempen pemanah rampa menua, kenu!) udah bulih sukung belanja ari Taib, nyengkaum cek ti beungkus 100,000 euro, ti diberi Taib ba pengerami mandangka fesyen di Monaco taun nyin kemari, sereta enggau penemuai Prince Albert ngagai Mulu National Park.
Orang diri sebilik ti udah melanja Kallakis, abis nadai pan udah ngarapka sida enda agi nyimpan pengeraja di menua Switzerland.