Ba bulan Februari taun nyin kemari, lebuh Sarawak Report mantaika sekeda dokumen PetroSaudi, kami bisi nyebut pasal siti anak bank Zurich di menua Britain ti nyadika bank, RBS Coutts, bisi bekaul lalu beduduk ba tengah-tengah skandal 1MDB.

Bank RBS Coutts ti udah udah mantu ba sekeda pengawa mindah-mindahka sepenyampau US$700 juta ke dalam akaun Good Star Limited ba pampang sida di Zurich kena 29hb September 2009 ari 1MDB.

Tu nyadi udah bekau jaku randau belalai munyi ti kelalu kesal entara pemesai bank enggau bank Deutsche ti megai akaun 1MDB, laban piak RBS Coutts madahka sida enda ulih nentuka waris ti megai bup akaun nya. Randau nya udah diemel ari CEO 1MDB maya nya, Shahrol Halmi, ngagai pengarag kompeni PetroSaudi, lalu bisi disalinka ngagai Jho Low, ti udah nya ngirumka salin ngagai sekeda bakih iya ti sama bekaul dalam konspirasi nya dalam PetroSaudi ngambika sida irau ati, laban kenu ku iya, penanggul deka diputarka enggau lengkas.

Jho Low nyadika orang ti bempu akaun nya, reti nya bank Coutts udah bekaul kereja enggau siku orang ti isi kaul politik ti udah dibantaika, laban pengawa iya nyadi penyading penemu ke Menteri Besai lalu mega nyadi pemudah chara pengawa dagangkunsi nya.

Bank Coutts di menua UK nya nyadika sebuah bank ti tebilang (laban sida nyadika paying akaun Ratu England): pengerusi sida ke dulu suba, di Zurich nya Earl Hume, iya nya anak lelaki ke Menteri Besai dulu suba lalu (seninjik bendar?) nyadika penaung British Malaysia Society.

Ba maya nya Coutts agi diempu Perintah UK ti nguasa RBS Bank (iya udah ditebus ngena wang turu orang mayuh udah bekau ti dituntung penanggul dalam pengurusan bank dalam taun 2008).

Tang lebuh Sarawak Report mantaika tindak enggau ngenyit kena 28hb Februari tu tadi, semua pekara nyadi sunyi. Nya udah ngena timpuh setaun endur bekempen lalu mega dikena ngerak orang mayuh ba tikas entarabansa sebedau kami datai ba tikas ti endur Financial Times udah mujur mechah berita kemari ti madahka Coutts udah mansutka jaku gerah madahka sida besedia sereta gaga ati deka meri kerejasama enggau raban penerit undang-undang Switzerland dalam pekara tu.

Sarawak Report udah mujur tetemuka sekeda orang ari menua tasik ti mantu bala tuai perintah menua enggau raban orang dagang baka Najib Razak enggau Jho Low. Raban orang nya patut ditinggang ukum setipak enggau pemerat penyalah ti dikereja sida.
Nama penyadi ba Coutts?

Raban penerit undang-undang Switzerland deka enda pedulika pejalai pekara ti udah nyadi nya. Tang bisi asai ati irau pasal penyalah ‘kolar burak’ deka diputarka enggau chara belalai, ngena penyampau ukum ti tau dipejuraika (dibayar ngena duit balapenyimpan), penerang pasal penyalah deka dipelalaika, lalu udah nya orang ti ngereja penyalah deka dilepaska.

Nama kebuah pemesai bank ti udah ngereja pengawa ngelakar nya diberi pengebal ari kena ukum, lebuh penchuri selama deka dipasukka dalam rumah tutup, tanya kami? Sekali ke sida milih deka nguasa bala orang politik enggau sekeda institusyen politik ti dikuasa sida? Saut nya ya lalu pengawa ti baka nya patut dipadamka sekali.

Ba minggu nyin kemari pemesai bank apek bayat Goldman Sachs udah diukum semina $5 billion ulih raban penerit undang-undang US laban ditemu ngereja penyalah nipu ti lalu meri empas ngagai penanggul ekonomi dunya.

Orang ti nanggung pemedis nya bala orang biasa ti nyim;an duit dalam bank sida nya.

Dua tiga taun ke udah udah bekau penanggul ekonomi global ba taun 2008, bank Goldman Sachs enggau bos pelesu ke pelilih Asia Tenggara sida, ‘Dr’ Tim Leissner udah numpuka perati sida ngaga tunga Malaysia ba pengawa sida ti ngiga belanja ti baru, ngerumbak 1MDB. Diatu baru kami nemu nama utai ti udah nyadi di menua Malaysia – tang kami agi nganti baka ni tindak raban penerit undang-undang entarabansa ba bala pemesai bank nya udah tembu pansik sida dipejalaika.

Pulai ngagai randau pasal Coutts ti bekaul enggau duit bayar ngagai Good Star Limited enggi Jho Low.

Sarawak Report bisi bendar pengarap ke Coutts Singapura udah ngambi bagi diri maya numbuhka kompeni Good Star dua tiga bulan dulu ari nya di Seychelles. Pampang sida di menua Singapura nya nyadika “klien” ke orang ti bepu akaun ti benama Jho Low, nitihka rekod kompeni ti menua Seychelles.

Ari nya, pekara nyadi makin mar ba piak Zurich, sekali ke Jho Low minta bantu ari orang ti dikelala iya baka HansPeter Brunner enggau Yak Yew Chee?

Pekara ti ditemu kami nya ba bulan ke nangkanka nya HansPeter Brunner ditemu betukar endur bekereja lalu mai mayuh pemesai bank ti bedau kala nyadi ba sejarah pasal pengawa bank di Singapura ngagai pampang BSI Singapura ti baru, lalu nyengkaum Yak Yew Chee enggau mega enda kurang ari 70 iku pemesai bank ti bukai.

Kami mega nemu HansPeter Brunner enggau Yak Yew Chee udah bisi kaul enggau dagang Jho Low, nyengkaum pengawa mindahka duit ngagai BSI Singapura ti enda kurang ari US$530 juta ari US$700 juta duit bayar ngagai Good Star Limited, ti keterubah iya diengkahka ba bala tuai-tuai bank iya dalam RBS Coutts di Zurich.
Repot ari Financial Times tau dibacha ditu:

Royal Bank of Scotland udah bisi kaul dalam pansik serata dunya bekaul enggau skandal Makai suap dalam 1MDB nya, ti bisi kaul enggau bala pemansik Switzerland ba sekeda bank ti nyali duit, munyi ti ditusui dua iku orang ti udah teleba enggau pekara nya.

Lawyer Bansa ari Switzerland madahka, ba bulan Januari nyin kemari iya bisi tetemuka kelai ti serius, ti endur enda kurang ari $4 billion udah diubah ari sekeda kompeni enggi Perintah Malaysia, udah bekau pansik bekaul enggau 1MDB dipejalaika. Skandal nya benung ngeregu raban pemerintah di Malaysia, lalu bisi kaul enggau Menteri Besai Najib Razak ti nyadi pengerusi bala penyanding penemu dalam wang turu nya.

Raban penerit undang-undang menua Switzerland bisi madahka sebagi ari $4 billion duit nya udah dipindahka ngagai sekeda akaun di Switzerland ulih bala orang pengereja pengawa di Malaysia, lalu mega bala pemesai di menua Emeriyah Arab Bersatu.

Ba sekeda bala orang ti teleba enggau pekara tu, sida madahka ngagai Financial Times ti endur dua iti bayar ba penyampau $860 juta udah dipindahka entara bulan September 2009 enggau September 2010 ari 1MDB ke dalam akaun Good Star Limited ba pampang bank Coutts Zurich …