Malam tu 5hb November, pengerami Jho Low deka diatur di Amerika Syarikat.
Pengerami Black Ball ti dipelanja kompeni Jynwel enggi Jho Low, nya nyadika sebagi ari langgur dikena iya mubuhka duit ti mayuh ngagai gerempung pengasih dalam Wang Turu Pengasih UN enggau gerempung ti bekuasa ti bukai.
Mayuh orang betanya nama kebuah Jho Low numpuka perening iya ba pengawa pemeri iya ti deka ngenyamaika ati bala pemesai dalam UN.
Jho Low dipelabaka deka meli pengebal, laban diatu mayuh ari duit ti diberi iya ke pengawa pengasih nya duit kamah ti ulih iya enchuri.
Kami dipadahka tu taun ke-dua beturut taun ti endur kompeni Jynwel Capital enggi Jho Low di Hong Kong udah ditemu melanja pengerami besai di New York, bebanding enggau dua iku bakih iya, Alicia Keys enggau Swizz Beatz.
Taun nyin kemari pengerami nya dikumbai Angel Ball ti endur Jho Low diasuh niki ke atas panggau dikena meri iya tanda basa ketegal pemanah ati iya ngena duit orang Malaysia.
Taun tu pengerami ti mar nya diberi jejuluk “Black Ball, Black To The Future” diatur dikena ngiga belanja ke penguntung orang mayuh.
Rayat Malaysia bisi kuasa betanya enti sema sida patut dipelanja ngena duit sida empu nya, ti udah dipasukka chara belalai ke dalam akaun Jho Low ti nyau manggai bebillion-billion dollar, terima kasih ke pengawa nipu enggau salah atur pengawa dalam 1MDB.
Tambah mega mayuh rayat Malaysia ti seranta sereta dituntung penanggul ba pengerai – ni penyampau duit udah dipelanja Jho Low ba menua asal iya empu?
Berebak enggau nya, Sarawak Report udah nyungkak asai irau ati iya ba Wang Turu Pengasih UN enggau mega National Geographic bekaul enggau pun penatai duit pemeri ari Jho Low nya, nyengkaum program ‘pematih pengarang berita’.
Tang bala pemesai dalam UN rindu agi nyambut duit pemeri kamah ari Jho Low, kelimpah ari nyidi asil pansik silik kami, ti terang bendar nunjukka Jho Low nya siku orang kaya ti berindik ba duit ulih iya enchuri ari Malaysia, terima kasih ke Menteri Besai Najib Razak ti endur iya bepayung.
Sekeda gerempung dalam UN tu udah buta sereta Bengal pending ke repot ari mayuh bengkah media entarabansa ti bulih berita sida ari Sarawak Report bekaul enggau penanggul besai dalam 1MDB lalu Jho Low mengkang puntan bebulaka semua penerang ti dibantaika kami nya dalam kot undang-undang.
Sekali ke orang kaya ti agi biak nya deka enggau lengkas ngirit kami ngagai kot ngambika kami dipechara enti pekara ti direpotka kami pasal duit mayuh dicuri ari 1MDB nya bula memagang?
Udah bekau kami mantaika pasal penanggul dalam 1MDB, kami dipadahka pasal Jho Low diatu udah ngentapka pendiau diri di menua Taiwan, sebengkah menua ti endur iya enda kena bungkur atur ekstradisyen.
Enggau nya, sekali ke Jho Low deka napi risiko ngenataika diri empu di nengeri New York ngulu pengerami iya ti beungkus mar nya?
Ba taun nyin kemari Jho Low nyadika perening orang mayuh ba sebengkah pengerami iya empu, diberi tanda puji enggau basa ke pengerah jari iya beduduk ba duit orang bukai lalu ngangkatka pemanah nama enggau pengawa diri, nyengkaum bala penyanyi enggau pelakun tebilang baka sida Alicia Keys enggau Swizz Beatz, ti endur dua iku nya mega rindu ke chara Jho Low bebelanja lebuh maya berami.
Tang ba taun tu mija ti sama nya (tiap iti meja nya berega US$100,000) tentu deka lebih mar agi endur iya duduk. Agi pan mega wang turu pemansang 1MDB enggau iya empu diatu napi pansik ba sekeda menua nyengkaum di menua S.
Lalu peneka raban FBI enggau Opis Undang-undangUS engka enda chukup, taja pan Opis Chukai US ngasaika ekara nya mit. Udah enda kini Jho Low, ti udah nyadi rayat US nya nerangka pemayuh duit bebillion-billion dollar ti udah disintak iya pansut ari 1MDB dalam kandang 2009?
Enti iya bedau, iya nya mih ti nyadika penanggul nya.
Engka mih pengawa iya nya endang dikena iya ngulihka ati bala pemesai dalam UN diatu nya udah ngayanka asil lalu iya disadang udah bulih pengebal ke pengerami malam nya.
Ba sebarang kes sekali pan, nengeri New York sekali agi deka meda penatai siku artis orang jai pemadu tebilang dalam cherita lama – siku lelaki ti di belakang penyalah nerumpak duit bebillion-billion di Malaysia dalam abad tu.
Tang kami endang seruran ngarapka echara ba Jho Low nya nyadi nyata, lalu iya disadang didinga minta amoun ketegal iya empu puntan datai ngagai pengerami ti dipelanja iya empu.
Ba siku orang ti rindu bendar melanja duit ti ulih iya enchuri ari menua Malaysia, tentu iya enda lantang ati diau ba rumah baru iya semanjai hari … di menua Taiwan.