Siti utai temu ti ngenyitka ati orang mayuh diatu nya pasal pengawa mekuka mayuh bengkah akaun ti bisi kaul enggau 1MDB ti dikereja raban penerit undang-undang di menua Switzerland minggu nyin kemari, baka ti diterangka ngagai Sarawak Report.
Kami dipadahka pasal siku ari bala orang ti empu akaun-akaun ti udah dibekuka nya Larry Low Hock Peng, apai siku orang kaya ti agi biak umur, Jho Low.
Penyampau duit dalam akaun-akaun nya, munyi ti dipadahka Opis Lawyer Bansa Switzerland nya manggai bepuluh-puluh juta dollar. Tang kami dipadahka penyampau nya disadang manggai beratus-ratus juta dollar.
Larry Low endang lama udah ditemu mantu pengangkat anak iya empu nyadi siku nembiak ti kaya bendar, terima kasih ke bakih sama sekula Jho Low ti benama Riza Aziz, ti nguluka iya bekelala enggau Najib Razak enggau Rosmah Mansor kenyau ari umur seduai sama agi biak.
Anak lelaki Lary Low ti siku agi, Szen Low mega bisi pengawa dalam dagang menyadi iya nyadi Pengarah Urusan Kumpulan ba kompeni sida sebilik nya, Jynwell Capital.
Bala pemansik arapka Larry Low udah ngatur pemindah duit ti disintak ari 1MDB ba dagangkunsi sida ke terubah enggau kompeni PetroSaudi ba taun 2009.
Sepenyampau US$700 juta udah dikeluarka ari pengawa beranakka puku dagang ke terubah US$1 billion ulih 1MDB, ti nyarung ngena bayar utang ulih PetroSaudi ngagai anak kompeni dagangkunsi nya.
Ba pun iya duit nya udah dipindahka ngagai Good Star Limited lalu dibayar ke dalam akaun ti baru dibuka sepengudah sempekat ditanggam ba bank RBS Coutts di menua Zurich.
Sepenyampau US$330 juta ti lebih nya udah dibayar ngagai akaun Good Star Limited dalam taun 2011, nitihka penerang dalam dokumen pansik ti dikeluarka Sarawak Report dalam bulan April, lalu dokumen-dokumen ari PetroSaudi mega meri penemu sida ti endur US$160 juta agi udah dibayar ngagai Good Star nyadika sebagi ari duit injau belalauka atur Mudaraba ngagai PetroSaudi ba bulan September 2010.
Tu udah ngasilka penyampau US$1.29 billion ti ba asal nya udah dipasukka dalam akaun Good Star dalam bank RBS Coutts di Zurich.
1MDB enggau PetroSaudi udah suah bendar madahka kompeni Good Star nya enggi PetroSaudi.
Tang Sarawak Report bisi penerang ti tegap madahka orang ti chakah ngemataka pejalai kompeni Good Star nya Jho Low empu.
Baka nya mega Jho Low seruran bebula jaku tuduh pasal kaul iya dalam 1MDB tauka dagangkunsi PetroSaudi, dokumen-dokumen bepenerang silik ti bisi ba kami madahka Jho Low nya endang betanggungpengawa ngatur dagangkunsi nya ari belakang.
Penerang ti besai reti ari pansik di Singapura nya, ti mega kala dibantaika Sarawak Report ba pun bulan April tu tadi, udah ngamatka kaul Good Star nya enggau Jho Low lalu ngamatka duit nya datai ari Good Star nya dipasukka ke dalam akaun Jho Low empu.
Pampang bank BSI di Singapura udah madahka ngagai raban penerit undang-undang menua nya US$530 juta udah dipindahka ngagai akaun bank RBS Coutts di Zurich enggi Good Star ti diempu Jho Low nengah beberapa bengkah pemindah udah tembu sempekat ditanggam enggau PetroSaudi.
Tang enggau penerang ti madahka Jho Low, 1MDB enggau PetroSaudi telah nusui pemula lebuh sida ngumbai Jho Low nya nadai sebarang kaul dalam dagangkunsi nya tauka enggau Good Star, iya nya udah bempu tanggungpengawa ba sebagi ari duit nya.
Sarawak Report diatu udah dipadahka mayuh agi ari laluh duit US$1.29 billion nya udah dipansutka ari 1MDB lalu dipindahka ke dalam akaun di Switzerland ti dikemataka Larry Low, iya nya apai Jho Low.
Penyampau nya manggai US$760 juta.
700 juta dollar ti ditanya bala pemansik, nya sekali ke Larry Low udah nyadika pengentara ti nyadika penerima duit nya?
Enti saut nya ya, dini pengujung sebagi ti besai ari duit ti udah dikeluarka ari 1MDB dalam pemindah duit ti nyungkak jaku bula beberapa taun tu dikereja sebengkah kompeni enggau pemegai syer pemadu besai, Menteri Pekara Wang Malaysia nya empu?
Munyi ti kala ditusui dalam media pengawa dagang, Larry Low empu endang nyadika siku orang dagang ti nempa nama iya empu nyadika orang dagang ti tebilang, udah mujur ngangkatka rega diri anak iya empu ngena chara sekula di menua tasik, ti lalu mujur nyadi bala orang dagang betikas multi-juta.
Ba artikel-artikel ti dulu-dulu Jho Low madahka diri enggau sida sebilik bejalaika pengawa dagang ti sereba jelan pemesai.
Ba sekeda orang ti deka meda baka ni pengaya raban Low tu ulih angkat kaya enggau ngenyit, tu ukai kes iya ke bendar. Ba sekeda ari artikel nya ti nusui pasal pejalai idup nya semina dikena ngabur mata orang mayuh ti endur akaun sida sama kena pansik begulai enggau akaun 1MDB di menua Switzerland ti kena bekuka diatu.