Le Temps, sebengkah suratberita tebilang menua Switzerland, malam tu (hari Lima) udah nerima penerang ti bendar ari Opis Lawyer Bansa menua nya ti madahka pansik diatu udah belabuh dipejalaika ba 1MDB.
Nya nunjukka bala pemansik entarabansa diatu belabuh bisi kaul mansik skandal nya, ti lama bendar udah malit Malaysia.
Penerang nya madahka Opis Lawyer Bansa Switzerland udah muka keretas pansik kena 14hb Ogos tu tadi ba dua buah kompeni enggau orang siku ti enda disebut nama, bekaul enggau 1MDB lalu ngaitka penyalah ngubah duit enggau mega asil makai suap ba sebuah menua luar.
Kenyau ari beberapa minggu tu udah Menteri Besai Malaysia udah nguji nutup pansik ti dipejalaika di menua iya empu, lalu nejuka orang mayuh deka ngumbai penyelai dalam 1MDB deka lalu baka nya aja.
Nyerumba nya Najib udah ngemaduka pengawa Sapit Menteri Besai iya, Lawyer Bansa iya enggau sekeda ari raban kabinet iya kelimpah ari ti nagang pengawa nyelak suratberita pekara dagang di menua iya empu, lalu mega nyekat Sarawak Report ari ngerembaika berita nengah internet di Malaysia.
Taja pan baka nya, tetiap atur pengawa ti dikereja Najib nya udah nyungkak ati irau orang mayuh dalam komuniti pekara wang entarabansa bekaul enggau penampak sereta proses undang-undang ti nyadika pelasar ti besai guna dalam pengawa beranakka puku.
Nyawa mataduit Ringgit diatu udah balat bendar turun lalu nya deka majak turun enti Menteri Besai nya mengkang enggai nurutka peneka undang-undang ti patut dipejalaika.
Raban pengarang berita Switzerland udah digerak enggau berita peranak menua sida empu di nyadi penyepu wisel ba 1MDB, Xavier Justo.
Xavier Justo udah diukum tutup tiga taun di menua Thailand laban dituduh minta upah enggau chara emba ba PetroSaudi International bekaul enggau penerang pasal ulah enggau pendiau sida ti numbuhka dagang kunsi bekontroversi enggau 1MDB, ti endur US$1.19 billion udah ditemu disintak pansut nengah sebuah kompeni enggi proksi Najib, iya nya Taek Jho Low.
Sama bisi kaul dalam skandal pengawa dagang tu iya nya bank baka RBS Coutts (Zurich), JP Morgan, BSI enggau Falcon, ti udah dibeli kaban dagangkunsi 1MDB ari menua Abu Dhabi, wang turu Aabar Investments.
Pengerusi Aabar ti ke terubah udah diketuka ari pengawa iya, udah bekau beberapa siri tebantai pasal skandal bekaul enggau 1MDB, ti udah nya dientudika CEO iya, ti mega diketuka ari pengawa iya ba pun minggu tu tadi.
Disimpulka, mayuh bengkah atur enggau penerang ti dipansutka komuniti pekara wang entarabansa ti bekaul enggau penanggul dalam 1MDB udah nunjukka ati irau bekaul enggau skandal ngubah beribu juta dollar di Malaysia, ti endur Menteri Besai Najib mengkang enda ulih nyaut jaku tanya ti pemadu mudah.
Ba ujung minggu baru, baka ti udah ditemu komuniti entarabansa, gerempung Bersih deka diatur kena 4hb Ogos, deka ngatur pengawa bejalai bebala mayuh enggau likun, ngambika dikena ngansak penyalah makai suap dipunaska.
Bersih 4 endang ditujuka dikena mantah pemuntan Najib Razak nerangka duit US$681 juta ke dalam akaun iya empu, ti endur bala pemansik pechaya duit nya bisi kaul enggau skandal 1MDB – sebedau pansik sida diketuka.
Atur pengawa Bersih ke penudi suba, dipejalaika kejang pengawa bepilihbesai 2013 lalu dikena mantah pengawa parti pemerintah nipu maya ngundi, ti udah digulu enda kurang ari 300,000 orang.
Pengangat semengat Bersih diatu udah semakin diasaika, udah bekau pemutus bepilihbesai ditemu dibeli parti pemerintah lalu penerang diatu nya bekaul enggau penyalah makai suap. Bisi mega didinga chara rara ti kamah deka dikena ba bala orang mayuh ti enggau ngulu pengawa bejalai bebala mayuh nya ila, lalu ditambahka enggau chara tagang baru ti deka dikena raban polis.
Bala orang ti kereja perintah udah dilalau, sida deka dibuai ari pengawa sida enti sida ditemu bisi enggau ngulu atur pengawa Bersih nya ila, ti terang bendar ngelanggar kuasa pengelantang sida baka ti udah ditetapka dalam konstitusyen menua.
Atur ti patut ti udah dikereja La Temps nya nunjukka pansik ba 1MDB nya udah datai ba tikas entarabansa lalu datai ba jari bala penerit undang-undang. Enggau ulah menua Malaysia ti dipeda baka ti nyurutka diri ari pengawa mansik diatu ngayanka ati irau ti majak nyadi, udah dikamatka ba pengelabuh mataduit Ringgit.
Raban penerit undang-undang pekara wang diatu terang bendar ngayanka sida kena pejal ngambi tindak dikena ngenegapka pengarap bala orang ti deka beranakka puku dagang.
