Udah tiga setengah bulan ditanka di menua Australia semina mimit aja pekara ditemu bekaul enggau kes Sirul Azhar Umar, siku penyaga tubuh ti udah dituduh munuh siku indu peranak Mongolia, Altantuya Shaaribuu.

Sirul udah ditanka lebuh iya benung ngena visa Australia ti agi laku, udah iya ti mujur tama ngagai menua nya nyadi ka orang lepas ari sebarang tuduh undang-undang, udah bekau iya dilepaska ari Kot Apil Malaysia.

Udah Kot Persekutuan ngalihka pengelepas iya, siti waran tangkap dikeluarka lalu baka ti disadang sebuah peminta dikeluarka awakka iya dianjung pulai ke menua Malaysia.

Terang bendar peminta nya udah dikenataika dikena ngelaban ekstradisyen beduduk ba ketegal Sirul diatu ditinggang ukum mati di Malaysia.

Perintah Australia mengkang enda nganjung pulai sapa-sapa orang datai enti sida nya napi ukum mati ba menua sida empu.

Tang penyelai iya, kes nya udah ngena timpuh ti lama nya udah dipejalaika raban lawyer ti ngarika Sirul di Malaysia ti nyukung tikas penuduk iya lalu Perintah Malaysia diatu enda ulih ngambi sebarang tindak.

Tang, udah beberapa bulan enda bemunyi, raban lawyer nya belabuh betindak baru dua minggu nyin kemari, sepengudah berita pasal indai Sirul ti udah bulih sanding penemu ari Menteri Besai ke dulu suba, Dr Mahathir.

Raban pengarang berita Sarawak Report udah nemuai ke Sydney lalu tetemuka dalam timpuh beberapa hari udah berita nya ditusui, dua iku lawyer Malaysia ti ngarika Sirul udah enda mukai-mukai datai ngagai palan ti endur ngetanka Sirul nya kena hari Tiga enggau hari Empat, 15/16hb April ngambika ulih betemu enggau Suril, udah bekau ti enda betemu enggau iya dalam pengelama beberapa minggu.

Terang bendar bala temuai ti dikirumka sida Sirul sebilik ba minggu nya mega, udah diburu pansut ari endur nya. Iya udah minta betemu enggau bala temuai nya, nya alai iya dipelabaka udah mansutka peminta nya ari asuh bala lawyer iya.

Pemeri penerang mega madahka bala lawyer ari Malaysia nya enda ngemendarka aida Sirul sebilik betemu enggau Sirul, ti udah ngujungka sida nginsil pejalai sida ke menua Australia.

Pekara tu besenutuk enggau beberapa iti berita di Malaysia ti dikeluarka raban lawyer iya.

Ba 12hb April lawyer Melayu ti ngarika iya udah madahka Sirul minta bala “penyukung iya enda bejaku enggau iya”.

Raban lawyer ti sama nya mega udah ngamatka ba orang mayuh sida udah mujur “nutup mulut Sirul” – enggau chara nangkan iya enda bejaku enggau sapa-sapa laban enggai ke nanggul pejalai pechara kes iya nya.

Kepala Polis Menua enggau opis iya mega ditagang betemu enggau Sirul, kenu ku lawyer ti ngarika iya, ti udah nya nandaka raban polis udah bula madahka sida bisi nganjung raban sida ke menua Australia bejalaika pansik sida.

Taja pan baka nya, kenu ku bala orang ti kala betemu enggau iya madahka iya diatu udah majak tusah ati laban pengurang ba berita pasal pemansang kes iya ari raban lawyer iya.
Pengawa tu nyungkak jaku tanya ti madahka mayuh orang betanya, sapa bagi orang ti melanja raban lawyer ti ngarika Sirul, lalu nama kebuah raban lawyer nya enda nerangka diri empu chara tebuka, lalu mega sapa ti mayar ungkus ti mar ngelindung Sirul?

Kebuah baka nya laban identiti dua iku lawyer ti dipaduka ngarika Sirul nya ngasuh mayuh orang tekenyit ati.

Lawyer ti ngarika Sirul nya Hasnal Rezua Merican ti dibantu Kamarul Hisham Kamaruddin.

Hasnal Rezua Merican nya siku Tuai Nembiak UMNO ba tikas bagi menua.

Lalu Kamarul Hisham Kamarudddin, baka ti udah diterangka ngagai Sarawak Report ba bulan Februari nyin kemari, udah diberi pangkat “Datuk” ari Perintah Besai, ti dilanggurka Perintah Besai.

Penerang ofisyel pasal tanda pangkat nya semina nyebut pengawa iya ti “bekereja ba Indu-Opis UMNO”!

Nama kebuah Sirul majak bepanggai ba raban lawyer ti dipaduka nekan pengidup iya ti enda dipelanja parti UMNO ti merintah, ti betuaika Menteri Besai Najib Razak, ti mega siku orang ti bisi kaul enggau kes bunuh nya?

Sekumbang pechara kes nya dipejalaika Sirul suah bendar madahka iya semina penyaga tubuh ti datai ari orang selama, ti udah bejalaika pengawa iya nitihka asuh enggau atur bala tuai iya. Iya madahka diatu iya nyau nyadika “genselan” laban nadai siku ari bala tuai iya dikangauka meri penerang bekaul enggau kes iya nya dalam kot.

Tuan besai Sirul nya Menteri Besai Najib Razak, ti dijaga iya lebuh iya meri arah munuh siku indu peranak Mongolia.

Nya kebuah rega nama Menteri Besai enggau enggi UMNO endang dipeda udu bebida enggau enggi Sirul.
Laban, rega nama UMNO nya dikena terus nutup penerang dalam kes tu lalu dikena nagang jaku bantah orang mayuh ba orang selama ti enda bidik, lalu rega nama Sirul nya dikena ngerembaika jaku bantah nya, dikena ngurangka penanggul ti nyadi ari penyalah ti dikereja iya empu.

Kot Apil udah nulak jaku ambu asal ari Sirul enggau bakih iya Azilah lalu madahka pechara asal nya udah kena keruga laban sida enda ulih mantaika penerang ti beguna ngagai kot tauka enda ulih mantaika nama kebuah seduai nya kena tuduh.

Pekara tu dikumbai amat lalu udah nerima jaku kutuk orang mayuh, ti udah nya nyadika ulah bekelulu ti udu.

Enggau nya, rega nama Sirul enda besenutuk enggau rega nama UMNO tauka Pengerusi sida, Menteri Besai Najib Razak, nama kebuah dua iku lawyer UMNO tu bejalaika pengawa seduai enda besetuju enggau rega nama orang ti diarika sedua?

Bala lawyer UMNO nya bempu tanggungpengawa nerangka nama kebuah sida tau ngumbai diri orang ti pandai sereta landik ba pengawa nya, ti ngarika Sirul lebuh penaluk sida tau bebagi dua?

Sida mega patut nerangka sapa orang ti melanja pengawa sida nya ti, kenu ku sida, ‘mantu’ Sirul?

Mayar upah raban lawyer begunaka belanja ti besai bendar lalu bala sida Sirul sebilik mengkang enda nemu pengawa tu diatur siku tauka seraban orang ti ngetanka rega nama sida empu.

Nambahka nya, ba sapa sida sebilik ngelempaika pengarap sida idup besehari-sehari sekumbang iya kena tanka?

Enti raban lawyer nya bekereja enggau enda bebayar, sekali ke atur nya mega nyengkaum raban lawyer ati menua Australia, ti diatu nyengkaum raban orang ti endang pandai ba pekara undang-undang? Laban kitai diatu benung berandau ke pasal atur ngena duit ringgit ti mayuh.

Pia mega sapa ti mayar tambang penerebai bilun dua iku lawyer ke nengeri Sydney minggu nyin kemari ngambika nutup mulut Sirul lalu madahka ngagai iya pengawa mansutka jaku sebarang ngagai sapa-sapa nya deka nanggul pejalai kes iya, lebih agi enti iya ditemu berandau enggau sapa-sapa orang ti bisi kaul enggau Dr Mahathir?

Semua nya jauh bendar bebida enggau atur bayar lebuh pechara asal ba pengelama 165 hari enggau pechara dalam Kot Apil enggau Kot Perintah Besai.

Dua-dua iku lawyer tu patut nyaut semua jaku tanya ti dikenataika tu, nitihka penemu mayuh bengkah orang ti landik ba undang-undang, sanding penemu sida nya nyadika saspek ti berupai lebuh sida nyaga rega nama Sirul – siku orang salah ti patut dijaga, nitihka semaya enggau gaya prefesional sida iya.

Bala pemerati diatu meratika raban lawyer ti ngarika Sirul nya bebendar nguji ngalihka timpai orang mayuh ari tuai UMNO sida, Najib Razak enggau sida ti bekereja di baruh kuasa iya, ti enda ngelala sapa indu ti benama Altantuya, tang sida madahka sida diberi arah munuh.

Diatu berupai bendar bala lawyer nya dipeda enda mujur ngulihka penerang ari bala saksi dalam kes tu, nyengkaum siku tuai soldadu, Musa Safri, ti disebut Sirul udah meri iya arah perintah munuh Altantuya.
Bala akim Kot Apil madahka pechara nya enda ngangauka Musa Safri ngagai kandang saksi laban penerang nya enda ulih mantu kes sida ngelaban dua iku penyaga tubuh ti dituduh salah nya.

Tu mega nyungkak jaku tanya, nama kebuah bala lawyer ti ngarika Sirul enda ngangauka Musa Safri awakka meri penerang?

Lalu nama kebuah lebuh petunggal Altantuya deka mantaika sekeping gambar petunggal iya ti mati dibunuh nya benung makai begulai enggau Najib Razak, sekalika pengawa petunggal iya nya ditagang lawyer ti enda ngemendarka gambar nya nyadika penerang?
Diatu, dunya nemu kes Sirul nya kes ti ngerichau sereta mapap.

Lawyer ke terubah ngarika Sirul udah serebana madahka kes nya ngerichau sereta mapap. Iya udah matak diri ari pengawa ngarika Sirul, madahka kes pechara nya bisi “diserak” dikena orang nyaga rega nama “orang ketiga”, sebedau sida nya diganti bala lawyer UMNO ti baru lalu dipelanja orang ti enda dikelala.

Raban akim enggau lawyer perintah mega dah diganti ba pun pechara nya, nyungka peragam orang mayuh ti deka ngumbai kes nya enda bisi dikeruga orang dikena nyaga rega nama siku-dua VIP ti ngelala Altantuya.

Diatu Sirul bepanggai ba raban lawyer iya di Ausralia ngambika mantu iya minta dianjung pulai ke Malaysia ti kenu ku sekeda orang ulih meri iya “Visa Pengelikun” dikena nagang iya kena tinggang ukum bunuh ti udah nganti iya enti iya pulai ke Malaysia.

Sida ti rapat kaul enggau iya madahka iya diatu udah putus pengarap laban udah kelalu nitihka perintah raban tuai iya – nyentuk ke iya patut nyaga rega nyawa orang ti nyadi tuai menua iya.

Raban lawyer di Australia ti ngarika Sirul ditemu nguji minta “Visa Pengelikun” ngambika iya ulih ngenduh di Australia dikena nyeliahka iya kena tinggang ukum mati di menua iya empu, Malaysia.

Enti Sirul diberi visa, sekali ke iya deka kena tekan awakka besetuju nutup mulut iya sekumbang iya ti ngenduh dalam palan pengintu orang salah Australia ketegal dituduh munuh – enti ya, sekali ke nya chara pemadu manah ba iya baka ti ditapi bakih iya (Azilah) ti nyadika ‘genselan’ ditutup mulut ngena chara ti bebida ari iya di Malaysia?