Sarawak Report sehari tu meri timbal penemu iya ngagai sebuah artikel ti panjai ba portal berita internet ketegal mantaika penyalah makai suap ti dikereja Gabenor Sarawak, Abdul Taib Mahmud enggau rejim ti diatu.

Dua iti tuduh penemu ti dituliska siku orang ti ngena nama kelulu Winifred Poh, nya madahka ‘orang ari menua bukai’ nadai kuasa nuliska sebarang jaku bantah lalu bala pemacha enda nemu sebarang utai ti dituliska dalam blog Sarawak Report enggau blog bukai ti sebaka nya tau dikerapka.

Winifred Poh ngaku pengamat beberapa iti batang penemu dalam aritkel iya ti nyukung Gabenor Sarawak Taib Mahmud enggau orang ti nganti iya Adenan Satem Satem dalam portal berita Free Malaysia Today minggu nyin kemari.

Dalam jaku iya empu, “di menua Sarawak sebarang pemutus runding ti udah dipansutka enda tau dibatak pulai, abis lama pan dalam timpuh siti serak tubuh. Kampung di lebak udah balat ditebang lalu sungai diisika ai tekat, orang asal dipindahka pendiau, palan pengeluar barang industri, lalu mayuh serak tubuh orang di Sarawak diatu udah tegadai ti enda ulih dirundingka beberapa taun tu udah. Lalu ninting hari ngemataka kampung ti udah ditebang diatu dibukaka kebun dandang besai sawit.

Sekali ke semua pengawa tu belalauka polisi demikrasi ti tulin tauka penyalah makai suap, sebedau iya mansutka jaku tanya, ti udah nya ditangkanka iya enggau jaku serang iya ba ‘orang menua tasik ti diupah’ ti ngembuan juluk ati sida empu?

Winifred madahka orang ari menua bukai nadai kuasa mansutka sebarang penemu pasal utai ti nyadi di Sarawak, tang iya empu nya tau.
Penemu Winifred nya sebaka bendar enggau penemu Taib, ti madahka demokrasi di menua Sarawak nya nadai penimpang, lalu nya kebuah orang ari menua bukai patut enda tau bejaku lalu nejuka peranak Sarawak empu nentuka utai ti manah ke guna sida empu.
Tang tu ukai kes ti bendar. Terima kasih ke Taib Mahmud, laban atur demokrasi di Sarawak diatu udah beduduk ba tikas ti ngasuh malu.

Ambi ke banding, ba Rumah DUN nya empu, ti endur bala pengari rayat udah ngasaika elaun sida ditikika ba tikar ti enda setipak enggau pengelempung pengawa ti dikereja sida.

Gaji enggau elaun sida udah ditikika tiga kali lipat udah bekau bepilihbesai nyin kemari, ngambi ke bala YB di Sarawak tau ngasaika gaji ti sama besai enggau bakih sida di parlimen UK, ba sebengkah menua ti bebelanja idup semechah ari menua ti dibandingka.

Lalu, bala pengari rayat nya semina dikemendarka baum dalam pengelama 16 hari setaun (lalu parlimen UK baum ba pengelama 162 hari, lalu bisi sekali parlimen di UK kala baum ba pengelama 240 hari setaun).

Nya alai, baka ni penegap undang-undang baru di Sarawak ulih diperesa ba pemutus eksekutif Taib Mahmud? Kusung, dipelabaka.

Dua iti sesyen aum dalam DUN Sarawak, ti sama pengelama 8 hari siti-siti, udah penuh enggau jaku pemuka enggau jaku penutup lalu jaku nya panjai-panjai ti dipansutka bala kaban DUN ti tuai-tuai bulu aja.

Enti sema bisi ari sekeda YB dalam DUN mansutka sebarang batang penemu ti nyelai ku Speaker (ti ukai dipaduka bala kaban DUN, tang dipaduka Kepala Menteri empu), nya deka ngujungka mikrofon YB nya deka dipadamka tauka iya diburu pansut ngambika ninggalka rumah aum – lalu suah agi nya iya kena tinggang dua bengkah ukum nya.

Bebida enggau aum parlimen di UK, Menteri Besai sida deka dituntung jaku tanya ari bala kaban MP ba sebarang isu tauka pekara lalu semua jaku tanya nya patut disaut enggau nyengala. Tang di menua Sarawak Taib Mahmud bangat kelalu buyan sereta besirat iku lebuh dituntungka sebarang jaku tanya ari raban penyakal dalam pengelama tiga puluh taun iya mangku pengawa iya.

Adenan Satem Satem engggau tau mai ubah ti baru, tang iya lalu bedau ngayanka ubah ba pekara ti digaga orang ti dulu ari iya, ti mega kala sama besekula enggau iya menya.

Ngena ketegal ti mudah tu, serata menua Sarawak diatu udah dikunyah sereta dipichit lalu dipeduaka entara bala kroni-kroni politik enggau raban Taib sebilik nengah kompeni korporat ti enda kala ditanya dalam aum DUN, ti jarang bendar baum.

Nya alai, Winifred Poh, perintah menua Sarawak diatu nadai pugu demokrasi ti nyata sereta tulin lalu kuasa ari dalam rumah DUN iya ngenusahka ati orang mayuh laban puntan nitihka chunto rumah parlimen Westminster.

Tang utai nya baru belabuh.

Taib enggau Adenan Satem udah nyengkam ba kuasa sida lalu nguasa semua opis perintah. Seduai iya mega nguasa 80% ari belanja menua Sarawak.

Reti nya semua orang ti bekereja ba opis perintah nya ngumbai Kepala Menteri nya bos besai sida.

Kenyau ari beberapa perintah BN udah salahguna kuasa, sida muai orang kereja perintah ari pengawa tauka sapa-sapa ti ditemu sida enda sepenemu enggau atur tauka chara sida merintah.

Suah bendar aku ninga serebana orang ari Sarawak ti madahka sida enda tau bejaku ke pekara ti dikereja Taib Mahmud, laban sida irau ke pengidup sida kena keruga, nyengkau kaban belayan sida ti bekereja ke menua nya.

Perintah demokrasi tulin di menua bukai bisi gerempung orang ti bekereja ti ngarika sida dikena sida ngelindung sebarang tekan ari perintah kukut besi.
Tang di menua Sarawak, Taib ditemu rindu menyati sereta mai pemerinsa ngagai sebarang orang lalu iya mega rindu mindahka sebarang akim ti ngatur pechara kes rampas tanah ti dikereja iya.

Siti ari opis perintah ti udah lenyau kuasa sida bekereja ngatika diri nya Opis Pengawa Bepilih (SPR).
Taib udah tekenyit bendar laban parti iya mayuh lenyau kerusi ba bepilihbesai taun 2011 suba, udah bekau penyalah makai suap iya balat dibantaika (orang ari menua luar), enggau bala pengundi di nengeri udah enda ulih agi disuap ngena duit awakka ngundi BN.

Nya alai, opis SPR diatu (ti endang tebilang enggau pengawa nipu maya bepilih) udah ngagihka kerusi baru ti dikumbai selamat ke BN, awakka tau dikena sida ngulihka mayuh agi kerusi ba pengundi di nengeri, ti deka nulak sida.

Malaysia bedau meda ubah ba perintah kenyau ari menua nya merintah diri empu, ti diatu nyadika menua nya menua demokrasi pemadu tuai di dunya – terima kasih ke penambah kerusi parti perintah ba ninting kali bepilihbesai. Tu mih kebuah bantah orang ba pengawa nipu enda dikibuhka BN.

Nadai siti utai ti menyana, awak ke suratberita ngereja pengawa sida.

Enda tau disebutka enti enda mayuh ulih dibantah lalu ngemetulka perintah demokrasi ti bukai ti kurang menyana. Tang Winfred enda dipinta mantaika bantah iya.

Enti deka kiruh mantah perintah UK, ambi ke banding, nadai siku orang din deka kiruh ke bantah iya. Semina mimit aja ti deka kiruh, laban di menua UK diatu udah kelalu mayuh orang ti rindu mansutka jaku bantah enggau jaku kutuk sida ti endang udah tuai runding, tang nadai siku orang deka ninga sereta ibuhka sida tauka sebarang ‘orang luar’ ti baka nya.

Ke bendar iya, di menua Sarawak, nadai siku orang asal di menua nya deka nyadi tukang bantah laban suratberita kelalu balat dikuasa perintah, ti patut iya nyadika pelasar demokrasi tulin.

Tu mih kebuah Taib pedis amat ati ke ‘orang luar ti mantah’ laban nyentuk ke sehari tu iya udah mujur bendar nerima suap di serata menua Sarawak, terima kasih ke kuasa penuh iya ba semua media enggau suratberita lalu mega ngagai ulah iya ti enda ibuh ke kuasa pengelantang rayat iya awakka sida bekaul dalam sosial enggau politik.

Di menua Sarawak nuan patut minta pemendar ari perintah sebedau nuan tau numbuhka sebarang parti politik tauka begempuru enggau bala bakih ti sama penemu enggau nuan, jauh agi nuan tau nyelak sebarang surat penerang ti deka dikumbai ‘sensitif’ lalu tau ngeruga menua.

Sistem nya endang digaga awakka tau dilanggar, dikena nentuka nadai siku orang deka bulih lisin enti enda diberi pemendar.

Asil ari nya ngaga menua nya berubah nyadi menua dipegai perintah totalitarian, ti endur sebarang sapa ari rayat sida deka begempuru baum pasal pengerindu ngumpul setem pan enda dikemendarka numbuhka gerempung pengumpul setem.

Ketegal tu mih Malaysia udah dikelala enggau tikas menyati rayat diri empu ngena kuasa media enggau suratberita.
Di menua Sarawak, semua suratberita dikuasa bala kroni-kroni kayu batang Taib tauka sida Taib sebilik. Semina stesyen Radio Free Sarawak aja ti enda dikuasa sida, diatu udah kena keruga sida ketegal dikumbai ‘ngerachun runding rayat’.

Serang ba atas RFS nya terang bendar nunjukka Taib balat bepanggai ba atur nekanka pengawa ngerembaika berita chara ngatika diri lalu iya berasai pulu bendar mudah kena keruga pemasuk penerang ti enda betapis ari ‘orang ari menua luar’.

Nya alai tuduh penemu enggi Winifred Poh bekaul enggau sekeda pekara baka SCORE nya patut dipejuraika chara demokratik, disukung lalu diputuska rayat Sarawak empu nya semina mimpi aja.

Program SCORE ti nyadika ‘buah runding’ Taib Mahmud lalu dikereja enggau nadai mayuh jaku bantah, taja pan projek nya balat mai pengerusak kampung, dikuasa ngena 12 igi tekat hidro di serata menua Sarawak lalu ngujungka pemindah bepuluh ribu iku orang bansa asal.

Dikena meretika peminta undang-undang, Winifred Poh patut bejalaika pansik iya dikena iya nyukung tuduh penemu iya ba porjek ti besai-besai dalam menua demokrasi ti bendar. Atur ti endang ditagaka nya patut nguntungka orang mayuh, lalu enti iya besai guna, nama pengawa ti pemadu manah tau dipejalaika.

Sekali dulu ari tu Taib udah ngena rumah DUN ti baru tembu nya ngutuk Sarawak Report enggau beberapa bengkah gerempung NGO ti bukai laban kenu ku iya ‘tau pulaika penusah’ ngagai penegap menua Sarawak.

Iya mega didinga balat ngutuk kami laban kenu ku iya mega kami ngembuan ‘program neo-kolonialisma’ dikena ngulihka minyak di Sarawak. Pengelama baum enda ditambah taja pan timpuh nya udah diisi penuh enggau jaku kutuk ba kami.

Winifred Poh udah balat nuduh blog kami tu laban kenu ku iya kami ‘balat’ nuduh Gabenor Taib nya balat kena palit penyalah makai suap.

Bisi siti isu ti penudi ti deka dibantaika aku ngagai Winifred Poh, ti udah ngusung laman berita Free Malaysia Today ti enda ditemu asal penatai iya lalu ngena nama kelulu ngarika seraban orang PR ti endang diupah.

Iya madahka diri udah diau di menua Sarawak ba pengelama 50 taun, ti mai reti nya, iya ukai peranak Sarawak. Aku empu tu endang ada di menua Sarawak lalu besai di menua Sarawak, nya kebuah aku ngasaika diri bisi kuasa mansutka penemu enggau buah runding diri ba pekara di Sarawak, lalu pia mega orang bukai.