Sepuluh taun ke udah penemu ngetuka dulu pengawa ngulihka kayu batang dipelabaka enda ulih guna raban orang ti bekuasa megai perintah di menua Malaysia, ti seruran melakangka tuduh penemu bala pemerati rampa menua enggau raban penyakal awakka pengawa ngerusak rampa kampung nya diketuka sekali.

Tang diatu mayuh sada nyawa udah didinga nyukung atur ngetuka pengawa ngulihka kayu batang ngambika dikena nyelamatka teda kayu kampung ti agi tinggal di Malaysia, ti dulu kelia nyadika temegah bala orang di serata dunya.

Tambah mega iya deka meri pengawa ti meruan ngagai orang rebak dudi, kelimpah ari ngujungka pengusi rampa menua.

Ba pun taun tu penusah bah besai di menua Kelantan udah ngerak runding ngagai orang mayuh. Ba taun 2010 penusah reba rarat ti anyut semanjai Batang Rejang udah ngemalu nama menua Sarawak ba kar dunya, ti udah nya mega ngujungka resia churi kayu batang tebantai lalu ditemu orang mayuh.

Sarawak Report suah udah nusui pasal orang ti nyungkak pengawa ngulihka kayu batang enggau chara ti enda betagang, iya nya ari asuh bala orang politik ti udah kenyang makai suap dala parti pemerintah. Di menua Sabah mega cherita nya sebaka lalu diatu jaku kutuk nya udah ngelekai ngagai menua di Semenanjung Malaysia.

Penanggul nya ditumpuka ngagai atur meri lisin kayu chara beresia ngagai kaban politik enggau bala kroni dagang ti dikarapka bala orang politik pemerintah di menua nya.

Di menua Sarawak udah kelalu kuasa diserahka ngagai genggam siku tuai ti kelalu kenyang makai suap.

Duit suap, bekenaka nomini enggau ‘duit bantu’ parti politik nya udah nyadika mataduit ba atur ngeluarka lisin kayu, ti ngujungka penambah dalam pengaya ti ngelui ari patut ngagai bala orang politik enggau kroni dagang sida lalu udah nya nutup terus semua peluang ti patut diperebutka rayat selama.

Pengawa ngulihka batang nadai meri penguntung ti nyengala ngagai menua iya: iya enda meri peluang kereja ti nyengala orang ti bempu menua. Pengawa nya semina nguntung sekeda orang lalu nuruka duit ngagai parti pemerintah dikena sida mengkang ngenggam pengaya asil rampa menua di menua nya.

Enti pagila-lusa pengawa ngulihka batang di Sarawak diketuka terus, empas ari atur nya enda tentu balat diasaika rayat selama.

Pengaya ti udah diengkahka di menua tasik nya deka enda ulih dikurangka.

Tambah mega rampa menua Sarawak nya kelalu besai, menua iya kaya lalu penyampau tubuh rayat iya enda mayuh.

Dalam pekara tu, Sarawak Report ukai agi nyadika sada nyawa tunggal, munyi ti dikenang mayuh bengkah media enggau suratberita.
Lalu siku tradisionalis ke diatu ti udah belabuh bejaku ngenang pasal ubah ba polisi nya Tun Dr Mahathir.

Ba minggu nyin kemari dalam sebuah jaku randau ti lenak enggau laman blog tu, Menteri Besai ti dulu suba nya udah ngamatka jaku iya ti endur iya pechaya ke pengawa ngulihka kayu batang nya patut diketuka terus.

Tun Dr Mahathir udah balat bendar ngutuk jaku penerang ti pelesu ti dipansutka bala orang politik parti pemerintah entara “pengawa ngulihka kayu batang enggau chara belalai”, belaban penerang enggau pemendaer ngulihka kayu batang ari bala menteri ti udah kenyang makai suap ti bisi kaul dalam pengawa salah ti udah nguntungka sida empu lalu nadai nguntungka raban bansa ti diarika sida.

Dr Mahathir udah ngamatka jaku tuduh iya beberapa hari udah tembu penemuai Gabenor Sarawak Taib Mahmud ke India ti endur Taib udah betemegahka menua Sarawak nya sebuah menua tunggal nyual kayu batang di dunya tu lalu arapka pengawa dagang disungkak entara dua buah menua nya.

Dr Mahathir balat napi jaku kutuk sekeda orang laban iya kelalu laun mansutka penemu diri udah bekau iya mampul mata diri ngagai penyalah makai suap ba atur ngulihka kayu batang ti dikereja Taib, lalu Mahathir mega diserang ketegal bejaku munyi raban penyakal. Tang ubah ba runding enggau ulah iya nya udah ngerinduka sekeda gerempung ti rinduka rampa menua di serata dunya.

Lebuh menua Kelantan balat dituntung penusah bah siku ari bala menteri di Opis Menteri Besai, Shaidan Kassim, ba minggu nyin kemari udah nuduhka penemu iya ngambika perintah ngantung semua lisin kayu batang ba pengelama sepuluh taun lalu iya mega arapka penusah bah nya tau dikurangka.

Kepala menteri Sarawak Adenan Satem mega suah ngaku pasal penusah ti dibai bah, taja pan iya lama udah bekaban enggau Taib Mahmud. Adenan Satem udah besedia ngatur singkang ti nunjukka iya diatu besedia ngapuska pengawa ngulihka kayu batang ti kenu ku iya nya pengawa ti salah, tang ba minggu nyin kemari iya udah inggar didinga madahka juluk ati diri deka ngetuka pengawa ngulihka kayu batang ti bisi lisin mega.

Ba mayuh orang ti udah teleba enggau penanggul ti datai ari pengawa ngulihka kayu batang di Sarawak, sida nemu, atur ngukum sekeda kompeni kayu batang nya semina kelulu politik aja, lalu pengerusak balat ba kampung udah lama dikereja kompeni kroni enggi raban Big Six baka kompeni Shin Yang, Samling, Ta Ann, WTK, KTS enggau Rimbunan Hijau.

Raban nya udah nyadi kompeni ti besai bendar ba tikas entarabansa, terima kasih ke keruga sida ba rampa kampung di serata menua Sarawak lalu diatu sida belabuh nyual pengawa makai suap sida ke serata dunya lalu ngujungka pengerugi ngagai planet Bumi kitai tu.

Sida nya patut tegut agi dikemataka lalu semua lisin kampung sida patut diketuka terus. Baka nya mega bala orang politik ti udah kenyang makai duit ti disuap sida ukai semina diasuh nyain jaku semaya intergriti ti puang aja!

Bisi tauka nadai Adenan Satem pengering majakka singkang iya ke mua ke agi, lebuh maya bos iya ngatur pejalai ekonomi menua nengah kompeni-kompeni iya lalu mega lebuh atur bepilihbesai ti nyau semakin semak diatu? Tambah mega, baka ti suah dikereja, kenyau ari suba BN endang begigaka kompeni kayu batang ti besai-besai ngambika bisi meri bantu duit beratus juta ringgit dikena sida nyuap bala pengundi maya tiap kali bepilihbesai.

Suah agi bala orang politik nya enda kala ngamatka jaku ngena pengawa sida empu. Dalam taun 1987 suba Taib Mahmud kala narit pulai lisin ngulihka kayu kampung ari sekeda kompeni, lalu udah nya meri lisin nya ngagai kompeni bukai ti ba aruh ati iya dikena iya ngenegapka agi penuduk enggau kuasa iya di menua Sarawak. Sekali Adenan Satem deka nunda chara tu?

Dikena iya bebulaka jaku tuduhnya nya ba atas iya empu, Adenan Satem patut ngubah model dalam pengawa dagang kayu batang. Menua Sarawak patut ngetu nyual kayu batang ngagai menua tasik enggau rega ngemudah kayu machis, ketegal ti deka ngasuh bala kroni sida enggau kaban politik sida nyadi kaya. Iya mega patut ngaga atur ngetu ngambi bala anak kuli ti begaji murah ari menua bukai bekereja di Sarawak.

Selampur industri patut diubah, awakka tau mai penguntung ngagai rayat lalu ngurangka penanggul datai ari rampa menua ti udah rusak.

Semua ubah tu begunaka atur perintah ti tampak sereta lurus ti bisi kaul enggau tender tebuka, jurai enggau pengarap orang mayuh ba perintah. Ketuka pengawa mindahka duit untung di Singapura,

ngambika semua kompeni kayu batang Sarawak ulih nerangka pengerugi sida di menua Sarawak empu lalu ngapuska ulah lari ari kena chukai!

Jaku semaya ‘intergriti’ munyi ti ditebah Adenan Satem nya, aram kitai sama nganti nama asil ari nya ila!

Semua orang politik tu, bala bini sida, kaban belayan sida enggau bala anak uchu sida ti ngasaika penyamai pengidup ari lisin kayu batang enggau kompeni ti seruran mujuk bulih kontrak ti besai-besai patut diketuka ari pengawa enggau lengkas, lalu dipinta nyerah pulai semua duit suap ti udah diambi sida ngena chara ti salah sereta kamah. Bacha isi berita dalam Sarawak Report lalu angkat enchabar semua watak nya ngambika sida ngamatka jaku semaya ‘intergriti’ sida nya. Anang nejuka sida semina mansutka jaku semaya.

Kampung bungas Borneo ti kala dikenang sereta dikerinduka semua orang sereta ti berega tinggi ti tau nguntungka rayat iya.

Kaban politik pemerintah patut nemu nama patut dikereja sida. Adenan Satem udah ngaku semua pemuntan atur parti sida ke udah-udah enggau chara ngemendarka jaku kutuk kami bekaul enggau pengawa ngulihka kayu batang cahara salah sereta penyalah makai suap ari pengawa nya lalu ngeregaska agi ubah ba polisi perintah menua.

Tu mih maya sida patut ngenuluka semaya enggau tanggungpengawa sida, lebih agi ari sida ngenuluka pengerangka sida empu lalu ukai bejaku chebur-chebur ngapa, tauka sida patut nyurutka diri lalu ngawakka orang bukai meresi bekau pengamah ti dibai sida ngelama tu. Enggau chara nya, sida tau ngangauka bala temuai ari menua bukai datai ke menua sida, tang ukai belalai ari sapa-sapa temua ketegal ngasaika diri kena palit resia ti kamah berusakka rampa kampung di menua tu.