Nitihka ditusi dalam beberapa iti repot dalam suratberita enggi sida Taib Mahmud sebilik, Sarawak Tribune, ti dikemataka anak indu iya empu Hanifah, diatu Taib benung nemuai ke menua India ngena pangkat iya ti nyadi Tuai Menua.
Raban Taib nya udah dijamu ukai begulai enggau bala pemesai perintah tauka bala orang politik. Tang iya dibasa penuh siku pengerusi ari kompeni pemansang pengawa ngaga rumah, ETA Star.
Sekali ke kompeni CMS benung ngiga mayuh agi kompeni beranakka puku dalam projek sida lebuh iya ti kala nyadi Kepada Menteri suba?
Enti nya amat, penerang ti benung didingaka dalam kot dalam kes makai suap ngelaban Kepala Eksekutif kompeni Sime Darby nya tau dititihka.
Siku orang dagang Sarawak, Chew Chiaw Ann meri penerang sehari kemari madahka CEO Sime Darby nya kala betemu lalu baum enggau Taib Mahmud lalu udah nya iya madahka diri besedia mayar kompeni CMS RM400juta dikena iya ngulihka kuasa muka kebun dandang besai atas tanah-tanah NCR ngambika ulih dipasuk.
Sekali ke kompeni ETA Star nya deka terus ngemansangka kandang menua ba Itmus Kuching, terima kasih ke pengawa meli tanah nya ari CMS ba rega ti mar bendar – taja pan tanah nya udah diberi Taib ngagai kompeni iya empu ba rega ti pengabis baruh?
Tu mih siti ari semua batang kenang tauka isu ti dikupas bup ti nusi pasal pekara ti udah nyadi di serata menua Sarawak kenyau ari beberapa puluh taun ke udah, Money Logging, siti asil pansik ti silik ti digelumuka Dr Lukas Straumann ari gerempung NGO Bruno Manser Foundation (BMF).
Taib Mahmud diatu udah ngeluarka mayuh surat sama lalu raban apek bayat saiber BN suah bendar nguji nuduh orang mayuh madahka Taib udah ngambi ‘tindak undang-undang’ dikena iya nagang pengawa ngeluar, nyadung enggau nyual sebuah bup asil pansik ti silik sereta engkeman.
Diatu Taib enggau raban lawyer iya ari kompeni Mishcon de Reya di London patut berunding dua-tiga kali sebedau sida amat-amat deka ngambi tindak undang-undang lalu napi peresa raban akim dalam kot, tauka sida patut ngelarika diri selama-lama.
Di baruh tu simpul penemu ti manah bendar ari bup nya [tau mega dibacha ari Malaysiakini]
LEE HWOK AUN
Ari pemayuh cherita penyai raban mafia tauka cherita bechura penyai apek bayat ti ditusi, bup tu ngundan semua macham ulah: makai suap, pengeraja ti salah endur bulih, asil menua ti ditabanka lari ngagai menua tasik, pengasar, ruang bilik ti balat dikelangkungka ngena pengeraja ti salah sereta kamah, penyati, pemerinsa enggau pengelenyau nyawa orang bukai – enggau siku tuai apek bayat.
Tang jalai cherita dalam bup tu bisi nyelai ari bup bukai, laban tuai apek bayat nya siku ari tuai perintah ba sebuah menua, lalu pengeraja menua iya udah balat dikeruga iya nya kampung bungas ti manggai lebih 100,000 kilometer pesegi pemesai.
Empas ari keruga nya balat bendar mai pengerusak ke menua: 90 peratus ari rampa kampung puang enggau kampung bungas udah lus ditebang, lalu kayu batang dijual nya manggai ba rega US$50bilion.
Rampa menua udah jai bendar gamal. Tang cherita pasal siku tuai ti rangka, pengerusak rampa menua ti udah dikusaika di Sarawak udah ti enda ditemu dalam pengelama tiga puluh taun tu diperinta Kepala Menteri Sarawak ti dulu suba, Abdul Taib Mahmud (kiba).
Siti asil pansik ti udah digelumuka sereta ditulis enggau naka penyimat sereta manah.
Bup ti betopik Money Logging: On the Trail of the Asian Timber Mafia, ti ditulis Dr Lukas Straumann, mansik pasal pengawa ngerusak rampa menua lalu mungkar pengawa jual beli kayu batang enggau pengeraja dalam tanah ti dipelalaika entara Taib enggau bala kroni dagang iya, ngempuruka penerang pasal pengawa ngerusak rampa menua, ulah bepilih bulu dalam ngatur sapa sida sebilik patut dalam perintah enggau penyalah makai suap ti enda sebaka enggau penyalah selama ti kala dikereja di Malaysia.
Penulis bup tu siku Pengarah dalam gerempung BMF ti beopis da menua Switzerland, ti kenyau ari taun 1990 suba endang udah mai orang bansa asal di Sarawak ngetanka rampa kampung sida lalu pia mega suah udah nanya atur perintah ti betuaika Taib enggau mega pengeraja sida sebilik ti enda ditemu ari ni penatai.
Taja pan bisi pengari nyual bup tu di Malaysia, bup Money Logging enda mudah diulihka. Tang bala pemacha enda patut jampat putus pengarap. LEE HWOK AUN nya siku pengelicha dalam pelajar ekonomi ari sebuah institut pelajar tinggi Malaysia. Money logging tetap ulih dibeli ari sebuah kedai nengah laman web sida ba http://gbgerakbudaya.com/bookshop .