Kepala kompeni PetroSaudi International ti bepalan di nengeri London, Patrick Mohany, bedau lama ti udah ditemu kena pejal bebula ke berita sebubu ngapa pasal pengawa iya ti melanja siku indu pengelulu Hollywood, Lindsay Lohan.

Dalam siti berita ti ngena topik “Lindsay Lohan Sugar Daddy Revealed?” ti ditulis sebuah kompeni pengarang berita The Hollywood Gossip bisi nyebut:

“Kenyau ari beberapa bulan, kami udah betanya-tanya ke sapa ti melanja Lindsay Lohan, lalu diatu kami udah mujur bulih saut nya.

“Sekeda pemeri penerang madahka Lindsay suah nemuai ke London, lalu Lindsay mega dia begulai enggau Patrick Mohany – siku lelaki ti jauh tuai ari iya lalu bisi dua iku anak indu” [The Hollywood Gossip]

Lindsay Lohan ti kala dijil ketegal ditemu salah nagih dadah kokain enggau bejalaika kerita enggau chara ti enda bejimat lalu suah berubat dikena iya ngenyumanka tagih dadah iya, diatu udah nyadi orang ti suntuk, taja pan suba iya kala bulih belanja ti mayuh bendar beberapa taun ke udah.

Bisi beberapa iti cherita ti bekaul enggau pekara tu, entara bulan Lapan enggau Semilan, nyadang Patrick Mohany ulih meri penerang pasal pengerami-pengerami Lindsay Lohan ti mar-mar, seraya iya ti nyediaka diri bekelulu ke drama London West End:

Bup majalah The Hollywood Gossip nerangka enggau lenak agi:

“Enggau cherita lama “bala penyukung” ari bala orang lelaki ti tuai ari Lindsay, enda tekenyit …
Lalu sapa nemu? Patrick enggau bala anak iya disadang ulih ngajar reti pengidup. Terang bendar iya udah ngemataka pekara belanja Lindsay. Ba pun minggu tu kad kredit enggi Lindsay udah kena tulak udah bekau iya nguji mayar bil belanja ngirup ba sebuah bar ba rega $2,500.

Enti bisi siku orang ti ulih ngemataka pekara belanja Lindsay Lohan, nya mih orang ti ulih nelesaika belanja ngirup ai bisa ke Lindsay!” [The Hollywood Gossip]

Ba umur ti baru manggai 28 taun Lindsay Lohan dikumbai kelalu biak ke Patrick Mahony ti udah setengah umur nya, ti nyadi Kepala Pemesai Pengawa Beranakka Puku dalam kompeni PetroSaudi International udah bekau sida mujur nanggam sempekat ‘dagang kunsi’ beungkus $2.2bilion enggau 1MDB.

Sarawak Report udah kala nusui madahka wang turu dalam kompeni PetroSaudi nya nadai mayuh bendar sebedau belanja nya ditambah ngena duit orang mayuh ari Malaysia, 1MDB, ti dipunka Menteri Besai Najib Razak lalu dibantu siku orang kaya Malaysia ti balat beperindang, Jho Low.

Tang, ba eksekutif iya diatu ngasaika penyamai idup ti sereba bisi.

PetroSaudi International bepun enggau mayuh macham inisiatif udah bekau nerima duit agih ari 1MDB, nyengkaum meli bank UBG enggi sida Abdul Taib Mahmud sebilik dalam taun 2009.
Tu nyengkaum penerang ari Patrick Mahony empu ti nyadi siku pengari pengawa beranakka puku, taja pan PetroSaudi ditemu nyadika sebuah kompeni ngiga minyak.

Tang utai ti ngirauka ati bala pemerati di Malaysia diatu nya meda asil pulai ngagai wang turu nya mimit bendar enti dibandingka enggau puku $2.2bilion ti dipasukka ngagai dagang kunsi enggau PetroSaudi kenyau ari 2009 udah diakaunka.

Semua duit ti dipasukka ngagai dagang kunsi nya endang datai ari wang turu 1MDB aja lalu PetroSaudi nya endang ukai sebengkah kompeni ti beranakka puku, baka ti diiklanka sida empu.

Ketegal nya bala orang ti mantah pengawa dagang kunsi nya madahka pengawa nya meri malu ba taun 2011, laban sida udah meri belanja ke dagang kunsi nya.

Tang nyentuk ke diatu bala orang ti mantah atur pejalai 1MDB nya udah nekanka 1MDB nya mengkang enda tampa pasal duit asal, kelimpah ari ti meri penerang ti bebelit-belit sereta kelabur madahka wang turu nya benung dikemataka di Pulau Cayman!

Enggau pemayuh penerang pasal gaya pengidup kaya raya ti diasaika Lindsay Lohan sereta kaul iya enggau sekeda orang dalam kompeni PetroSaudi, dia bala orang ti mantah wang turu nya ngasaika sida bisi kuasa deka nemu, sekali ke bala pewaris ke wang turu 1MDB nya endang bala orang ti rindu berami ba sekeda endur baka di Hollywood, Las Vegas enggau di Mediterranean?

Bala pemerati 1MDB madah indu ti rua baka Paris Hilton kala berami begulai enggau orang kaya biak ari Malaysia, Jho Low, ti endur iya empu bisi dikaitka enggau wang turu Malaysia ti udu dibalut utang.

Iya ditemu mayuh bendar melanja Paris Hilton nyentuk ke sejuta dollar dikena ngulu tiap pengerami ti diatur iya.

Udah nya kita ninga pasal pengawa ngeluarka filem Wolf Of Wall Street, ti dipelanja Mohamed Ahmed Badawy Al-Husseiny, siku CEO dalam kompeni Aabar Investments ti mega nyadika bakih dagang ke 1MDB.

Filem ti berega $100juta dollar nya udah dikeluarka anak tiri Najib Razak.

Udah nya kitai ninga cherita pasal siku pengari ari kompeni PetroSaudi, ti dibayar upah penyampau $65,000,000 sebulan, ke bendar iya Menteri Besai UK ke dulu suba, Tony Blair.

Jho Low mega baru diterangka nyadi siku orang ti gerah jari, nyimpan $50juta ngagai palan perubat sakit kanser di menua Texas lalu $24juta da agi ke dalam sebengkah pampang opis dalam UN, lalu nyerumba nya, siku orang ti bempu PetroSaudi, Tarek Obaid udah nanggam dagang kunsi enggau Formula 1 lalu melanja Klinik Mayo di menua US ba ungkus $10juta.

Tuju ke bendar wang turu nya endang dikena ngangkatka penatai pemisi bala rayat di Malaysia ti suntuk enggau seranta, tang semua nya udah dipelanja enggau atur ti salah.

Orang mayuh udah nemu wang turu 1MDB $40bilion nya endang duit ti dinjau.

Kitai arapka duit ari wang turu 1MDB nya enda agi dikena melanja ulah enggau pendiau jai orang baka Lindsay Lohan!