Tumu sehari tu tadi dia Kepala Menteri menua Sarawak ti baru, Adenan Satem, udah senutuk penemu enggau Menteri Besai menua Malaysia ti dulu suba, Mahathir Mohamad, mantah penyalah makai suap ti lama udah Nanchang industri kayu batang di menua Sarawak!

Penemu dua iku tuai menua tu udah ngenyitka orang mayuh, laban seduai tu endang lama udah begulai gawa dalam dunya politik enggau Gabenor Sarawak ti baru, Abdul Taib Mahmud, ti suah didinga ngutuk laman web tu enggau mega raban NGO rampa menua laban suah inggar nyawa mantah penyalah makai suap tu.

Ba pengelama beberapa puluh taun Taib udah bebula penemu orang ti madahka penyalah makai suap nadai kala dikereja tauka bala rayat enggau rampa menua Sarawak merinsa ketegal dikeruga penyalah nya.

Diatu, Sarawak Report udah dipeda berubah ari ti seruran dikumbai ‘munsuh menua’ ngagai sebengkah gerempung ti bejaku sama penemu enggau bala pemesai politik dalam BN!

Tambah mega, udah bekau kami nusi pasal pengawa salah kompeni kayu batang nya lalu bejaku inggar pasal pengerusak rampa menua di pulau Borneo.

Lalu kami mega udah mantah baka ni raban bansa asal udah dikemulaka sereta diburu ari menua asal sida empu, ti endur pengawa salah kompeni kayu batang nya udah ngujungka sungai nyadi pabu lalu rampa menua udah balat bendar rusak.

Sehari tu, ba sebengkah aum ti diatur begulai enggau bala tauke kayu batang ba opis kampung, Adenan udah besetuju:

“Anang mayuh ulah enggau aku!” pia ku iya nangkan bala tauke kayu batang ti lalu tekenyit ninga tangkan nya, lalu meri gela sida nya Big Six iya nya KTS, Rimbunan Hijau, Samling, Shin Yang, Ta Ann enggau WTK ti bisi tanggungpengawa ba penyalah ti dikumbai iya “nerupak enggau chara berupai”.

Bala pengarah kompeni kayu batang Big Six nya udah dikangauka lalu bêtemu enggau kepala menteri nya ngambi nyain ‘sempekat integriti’ lalu sida lalu nemu diri benung napi sebengkah tanggungpengawa ngurangka pengelenyau pengeraja asil tanah menua.

Cherita Adenan udah nyadika buah kenang sekeda suratberita ti udah ngujungka bala tauke kayu batang nya tekenyit memagang, lalu mega bala pemesai opis kampung enggau bala pemesai ke bukai.

Ba jaku kutuk iya ba penyalah makai suap ngulihka kayu batang ti dikereja ngelama tu, Adenan bisi didinga mantah rara ti enda bebendar sekeda orang.

Ngelama tu kompeni ti mit-mit ti nyadika sab-kontraktor ke kompeni-kompeni raban Big Six nya, awakka sida tau bebulaka jaku dawa orang ti ngumbai sida bisi buya ngulihka kayu batang di luar konsesyen sida.

Iya mega nyebut pemuntan sekeda pemesai opis kampung ti nagang penanggul tu.

Sarawak Report kala udah mantaika pemuntan raban pemesai opis kampung ketegal ti kena suap kompeni ti besai-besai nya ngambika dikena nutup mulut bala pemesai nya.

Adenan udah madahka iya udah minta raban ari penerita adat opis SPRM ngambika mansik semua penyalah makai suap lalu udah nya nawa sida dalam kot.

Tang kepala menteri ny puntan nyebut nama pugu orang ti bempu tanggungpengawa dalam penanggul tu.

Iya mega nadai seleka jaku nyebut baka ni semua kompeni nya enggau bala penerit adat udah mujur ngelepaska diri nabanka perepasan sida?

Kelimpah ari raban sekeda menteri BN, penanggul ti bendar nya bepun ari bos iya empu, Abdul Taib Mahmud.

Sida tu mih raban orang politik BN ti udah kala nerima duit suap ti mayuh bendar ari bala tauke kayu batang nyadika pampas sida ti udah ngeluarka konsesyen nebang kampung.

Tebal agi ari sida nya nerima syer dalam kompeni ti nerima lisin kampung ba menua sida empu.

Ambi ke banding, dua buah rumah besai ti diterima sida Taib sebilik di nengeri Seattle di menua US ari kompeni Samling enggi sida Yaw sebilik dibeli ngena ungkus $1 dollar sebuah.

Tauka, syer ti mayuh ti diberika ngagai beliau Taib dalam Samling Global aja.

Ukai semina sida Taib sebilik aja ti buya bulih untung ari konsesyen kayu batang enggau pengawa muka kebun dandang besai ba endur ngaga tekat baka di Bakun.

Sampal orang politik ti beraban enggau Taib bisi bekaul dalam pengawa ngerampas tanah dalam konsesyen ti besai-besai. Jacob Sagan, Awang Tengah, Alfred Jabu, Naroden Majais, Billy Abit Joo, Lihan Jok, Daud Abdul Rahman nya sekeda ari ‘ikan yu’ ti kala ditusi kami dalam blog tu, tang sapa ti enda bulih sebarang utai ari pengawa nerumpak ti berupai tu?

Ke bendar iya, bisi siti ketegal, nama kebuah penyalah makai suap tu udah ditejuka nyadi riman di menua Sarawak, laban penyalah tu dipeda selama ulih bala kaban politik BN lalu penyalah tu endang dikemendarka Taib – nyengkaum Taib empu, nya mih orang ti pemadu jai dalam penyalah tu.

Lebuh Adenan mansutka jaku semaya iya ti enda ngemendarka sebarang lisin kampung diberi ngagai iya enggau sida sebilik lebuh iya ngangkat sumpah nyadi kepala menteri suba, iya mega minta bala bakih iya dalam BN nunda iya, tang nadai siku ari sida nya udah nyaut kangau iya.

Sehari tu siti jaku tanya ditujuka ngagai iya, lalu sekali agi iya meri jamin proses ngempung bala bakih iya ngambika nanggam ‘sempekat integriti’ … “enggau naka penyampat”.

Tang atur nya lubah bendar nyadi nyata.

Lalu berapa iku agi ari sida nya agi bekuasa dalam BN, lalu baka ni Adenan ulih arapka diri bulih putar penganggul ti tulin?

Aum Adenan enggau raban tauke kompeni kayu batang nya dipeda baka ti matak semua lisin lalu enda ngeluarka lisin baru, enti sema bala tauke nya enggai meri iya bagi 30% ngena duit suap!

Sekali ke tu sebengkah main Adenan, baka nya mih jaku tanya sekeda orang ti bisi irau ati ke chara iya mutarka penanggul tu.

Laban, enti juluk ati Adenan nya deka mai ubah ti tulin, iya patut mutarka penanggul nya ukai semina penanggul dalam industri kayu batang aja tang diubah mega ba raban penerit adat dalam opis kampung ti udah kelalu teleba makai suap semanjai umur sida bekereja.

Iya mega patut mutarka penanggul makai suap politik lalu ba tikas ti pemadu tinggi.

Enggau bantu ari pansik bala SPRM, Adenan patut ngemaduka bos iya empu, Taib Mahmud, ari pengawa Gabenor nya.

Udah nya iya patut ngemaduka semua kaban politik BN, ti ditemu udah nipu bala pengundi sida empu, ketegal ngulihka pengaya ke sida empu lalu nawa sida nya.

Dikena iya ngereja semua pengawa nya ngagai parti iya empu, iya begunaka semua bantu ti diguna iya!
Adenan patut belabuh ari minta bantu Dr Mahathir ti agi chakah bekuasa dikena iya ngemunaska penanggul penyalah makai suap nya.

Taja pan baka nya, dikena iya ngubah ulah bala kaban politik BN, nya endang pengawa ti mar bendar ba iya siku.
Diatu, riman udah ditemu, sida patut beserah ngagai jari beresi orang bukai.

Nya endang sebengkah utai ti dipesetujuka tebal agi bala pengundi.