Semina beberapa hari udah bekau Kepala Menteri madahka dalam rumah DUN, iya “enggai mayar satu senpan” pampas ngagai raban bansa Penan Murum, Sarawak Report ulih mantaika berita baka ni bala pemesai ari Sarawak Energy Berhad (SEB) udah NYUAP bala orang diri sebilik nya ngambika sida badu ngempang jalai ti didirika sida!

Nyerumba nya SEB mega ditemu MEJAL sida ti endur jalai enggau andau nuju tumpuk pendiau sida deka dirusak, ti deka nanggul sida mindahka barang sida sebedau tumpuk pendiau sida nya ditiki ai tekat Murum.

Ba sebuah jaku randau enggau Radio Free Sarawak, dua iku bansa Penan ari raban orang ti enggau nirika empang jalai nya madahka sida enda tau enda setuju badu majakka pengawa sida nya, udah bekau bala pemesai ari SEB datai ngagai palan empang jalai sida lalu besemaya deka meri RM23,000 dalam mata duit ke tiap ruang bilik, sereta sida mindahka barang lalu datai ba palan pengentap pendiau ti baru di metalung ti bedau tembu nya.

Lebuh ti berandau dalam program radio nya kemari, sida nyadang penyampau pampas nya mimit bendar lalu sida berasai lebu (laban ke terubah suba sida udah minta RM500,000), tang diatu sida berasai lebu agi lalu mega berasai lelak bendar udah bekau 77 hari ngemataka empang jalai ba endur ti tebuka lalu pia mega berundingka tumpuk pendiau sida ti majak ditiki ai tekat.

Nitihka jaku ari pengari ke bansa Penan nya sida deka majakka bantah sida ngena atur undang-undang ngulihka pengelurus ti deka disukung siku lawyer kuasa pengelantang mensia, Abun Sui.

Dipejal

Pengeluar program RFS madahka raban bansa Penan napi penanggul ke terubah udah bekau seraban polis nangkap sekeda ari bala sida ketegal bisi bekaul enggau empang jalai, lalu udah nya dipechara ketegal dituduh tama enggau enda beradat (ngagai kandang menua sida empu).

Disuap

Udah bekau nya, nitihka jaku randau bansa Penan nya, SEB udah nyuap sida ngena mata duit ba penyampau RM7,500 ke sebuah ruang bilik nyadika duit tambah ngagai RM15,000 ti udah diberi dulu suba.

RM500 agi diberi nyadika duit penulu ke tiap ruang bilik bansa Penan lebuh sida ninggalka tumpuk pendiau sida.

Bayar nya udah nyadika sebengkah atur ti manah ti lebih agi ari penyampau kusung ti udah dipadahka Kepala Menteri nya dalam aum DUN bedau lama tu udah.

Tambah mega, nitihka tusui orang Penan nya, mata duit ti disemayaka nya endang disempulang enggau keduan, ngena penatai raban polis ti nyempulang bala pemesai ari SEB nya.

‘Setuju’ nya udah ulih enti orang diri sebilik nya ngemendarka diri sida dibantu mindahka barang diguna sida besehari-sehari tekala nya ari menua lama sida ngagai palan pengentap pendiau ti baru, tang balat bendar dibalut debu lalu bedau tembu digaga, sida deka diberi mata duit tambah lalu pia mega enggau anak kunchi rumah baru sida
Mata duit ti mayuh bendar

Nitihka atur nya, dia bala Penan lalu ‘dientapka pendiau’ ba sebengkah palan ti udah kala dikereja nyadika kebun dandang besai sawit ti udah ditinggalka kompeni Shin Yang.

Bansa Penan nya mega madahka ngagai pengeluar program RFS nya, lebuh maya nya nadai sebarang surat penerang dikena bejalaika atur pengawa, lalu pemindah sida ngagai endur ti baru nya baka ti nadai besempekat entara sapa-sapa.

Perintah mega nadai nyediaka sebarang bantu undang-undang ke bansa Penan nya dibai ‘bejuraika’ pengawa pemindah nya.

Sempekat ti semina disebut ngena mulut ‘ngambi-kira’ peminta ba pampas ba penyampau RM500,000 taja pan nadai sebarang chara dikena ngamatka jaku nya.

Nyerumba nya, bala tukang gambar ti dikelala bala Penan nya udah mujur ngeluarka asil tulis sida dalam suratberita Borneo Post ba hari ti nangkanka nya, terang bendar ngayanka asil tulis nya semina penerang media ti dikeluarka SEB aja!

‘Asil tulis’ ti dikeluarka nya endang dikena nusui pasal pengaga sereta pengandal ati bansa Penan, tang nadai ngayanka penatai raban pengarang berita ari Borneo Post empu ngemataka pengawa nyerahka anak kunchi ari SEB nya. Asil tulis nya mega nadai nusui pasal penyampau duit suap ti dibayar ngagai orang diri sebilik lebuh pengawa nyerahka anak kunchi bilik baru sida, tauka sebarang chara keduan ti ditapi sida bekaul enggau pengerusak andau enggau jalai nuju tumpuk pendiau asal sida.

Bekal ai enggau kuasa elektrik?

Asil tulis dalam Borneo Post nya berupai bendar diberi ngambika dichelak suratberita ti dikemataka BN ari SEB nya ti mega becheritaka pasal nasit enggau pengidup bansa Penan diatu nyau majak manah.

Ke bendar iya, nitihka pengari Penan ti berandau enggau pengari RFS, pun penatai ai ti bisi di Metalung nya semina ai ujan ti ditimbunka dalam tangki-tangki plastik!

Di Metalung nya nadai digagaka orang rumah sekula, klinik, chapel tauka sekula anak mit lalu bansa Penan dia serebana ke sida dipejal nerima RM850 ti diberi dalam chara bukai (bantu ba beras enggau minyak makai), taja pan penyampau nya ari baruh ikas penyeranta lalu deka diketuka udah 4 taun.

Bekal kuasa elektrik mega suah tanggul di Metalung. Nama reti orang bansa Penan ti dulu suba diau semak sungai ti chiru, beresi ti endur sida bebasu lalu ngulihka ikan tauka nyauk ai ke guna besehari-sehari?

Agi mayuh suap dilanggurka?

Berupai bendar perintah Taib Mahmud deka meri pampas ke pengabis mimit, tang orang dalam SEB udah belabuh nemu chara nya enda manah ke raban bansa asal ti diburu pansut ari menua lama sida empu.

Diatu berita sebubu ngapa udah balat ngerembai ti madahka mayuh agi duit suap deka diatur.

Pekara tyu udah nambahka mayuh agi jaku tanya bekaul enggau pengelurus dalam pengawa siku pemesai bebansa Norway ti bekereja dalam SEB.

Torstein Sjotveit udah beguai-guai niki opis suratberita ti endur iya nerangka pasal penuduk iya ti enda salah udah bekau pengelurus iya bekereja munyi ti dituliska dalam suratberita Norway, Ny Tid, pasal ulah enggau pendiau iya ti seruran ngenuluka pengawa meri kontrak besai-besai ngagai sida Taib sebilik lalu berebak enggau nya muru orang bansa asal ari tumpuk pendiau asal sida.

Mujur tauka enda Sjotveit ngumbai bala orang di Norway deka enda ibuh ke pejal enggau suap iya lalu penemu salah nya beduduk ba ikas ti pemadu tinggi?

Pekara nya enda baka nya. Tang pekara nya mengkang nyadika chara ti jai beduan orang bansa asal ti mudah bendar kena keruga nya.