Kimpin dagang temuai ti benung diatur di London dikena narit bala temuai ke Malaysia. Tang dalam kandang beberapa bulan ti deka datai tu Sarawak Report deka nunjukka semua pengamat ti tau ngasuh tekenyit ati bekaul enggau kimpin bula tu.
Gambar ti dikena Malaysia dalam kimpin dagang temuai nya, dipilih enggau naka bejimat dikena narit temuai ari menua Britain datai nemuai ke Malaysia, nya datai ari Kampung Borneo.
Ba sebelah-belah dinding bas ti mindah-mindah dalam nengeri London beserimbai enggau rambau nyambut hari Krismas tu, diiyas ngena gambar jelu ti jarang ditemu tauka nyau deka punas ari kampung Sabah enggau Sarawak, iya nya jelu Rasung enggau Mayas.
Tang iklan ba dinding bas nya nadai sekali-kali nyebut pasal jelu nya enggau pendiau sida dalam kampung din ti majak punas, ketegal dikeruga pengawa ngulihka kayu batang ti enda betagang enggau muka kebun dandang besai sawit ti dikereja raban orang ti ngatur pengawa ngelakuka kimpin dagang temuai “Malaysia Truly Asia”, tauka enggau jaku ti bukai, dikereja raban tuai-tuai parti BN.
Anang ngena gambar dalam iklan ke utai ti udah dirusak kita
Tiga puluh taun ke udah bala temuai ti datai ke Borneo endang ulih ngasaika pemanah rampa kampung enggau jelu sereta utai tumbuh ti bendar. Sida ulih meda sereta ngasaika penyelai daya idup ti asal enggau chara diau begulai serumah enggau orang bansa asal di menua nya.
Enggau chara tu pengawa nya ulih meri penguntung enggau penatai pemisi ti meruan ngagai raban bansa asal dikena ngemansangka pengidup sida ngambika lantang agi sereta berubah nyerumba pemansang dunya.
Tang lebuh Taib Mahmud ngambi-alih kuasa, iya udah majakka pengawa aya iya empu ti udah dikutuk iya, iya nya betebangka kampung enggau naka penyampat.
Diatu iya udah nukar rampa kampung bungas nyadika kebun dandang besai sawit lalu mega kebun kayu akasia, ketegal ti deka ngulihka pengeraja ke iya empu.
Perintah Besai di KL enda ulih nagang pengawa ngeruga kampung ti dikereja Taib enggau chara makai suap ti kelalu balat tu, laban sida deka ke Taib meruan duduk dalam opis iya megai perintah ti udah nya ngujungka sida ulih majak megai kuasa ke serata menua Malaysia.
Enggau nya, sida berani mandangka iklan gambar Kampung Bungas Borneo ngagai bala temuai, enda salah-salah kampung bungas ti besai bendar rampa nya agi meruan?
Raban jelu ti deka dipeda tauka diperatika bala temuai maya sida datai ke Sarawak ila iya nya jelu ti ditupi dalam sangkar. Lalu rampa kampung bungas ke dulu menya endang ngasuh bala temuai balat alit sereta rindu ati, diatu udah dikurangka ngagai 3% aja ketegal udah balat ditebang enggau enda betagang di menua nya.
Tambah mega kampung bungas ti digalau perintah mega sama udah ditebang enggau chara enda beradat, ti endur perintah menua nadai ngambi sebarang tindak lalu kebuah sida baka nya endang ulih disadang kitai.
Pengamat
Kelimpah ari nya gambar iklan ba dinding bas ijau di nengeri London udah ngena gambar ekologi ti tau ngasuh orang saru runding pasal gaya utai ti bendar di menua Malaysia, kami deka mantaika pekara ti bendar:
– Malaysia MENGKANG ba ikas pengerusak kampung ti pemadu jampat di dunya tu
– Malaysia MENGKANG nyadika menua penyual kayu batang pemadu mayuh di dunya
– Malaysia beduduk ba ikas lumur 3 pemansut duit ngagai menua tasik (duit ti ulih chara enda beradat) nangkan menua China enggau Mexico
Raban temuai ti nengah ruang langit ke Sarawak mayuh agi nya deka tekenyit meda penyelai gaya rampa bumi ti udah penuh ditanamka ngena sawit. Kampung bungas ke dulu kelia ti diuan raban jelu siga enggau utai tumbuh, diatu udah lenyau, ti endur bala saintis rampa menua baka sida Alfred Wallace udah bebendar ngiga pun kayu pengidup.
Diatur bemalam ba bilik hotel ti manah-manah (mayuh agi nya enggi sida Taib Mahmud sebilik) bala temuai nya ila tentu enda berasai kelalu gaga lebuh sida disambut bala ‘orang bansa asal’ ti bengepan enggau gaya lebih ari patut, ti ngiring sida enggau ajat nyentuk ke ngagai bar-bar koktel. Enda lama endur bala temuai nya ila deka meretika gari ke bendar dikena bala orang bansa asal ti udah diseliahka Taib dikena iya ngulihka pengaya ke iya empu.
Pejalai ngena bas ngagai ‘kampung budaya’ tauka meda jelu kurung tauka ngena penerebai bilun ti enda lama nemuai ngagai ‘resot kampung’ Taib di Mulu nya tentu deka diatur ke bala temuai meda gaya kampung bungas ti bendar. Lalu pejalai nya ukai semak.
Manah agi sida enda ninggalka nengeri London tang semina nemuai ngagai zoo London lalu sida tentu deka jampat agi ngelala sereta ulih ingatka jelu dia lebuh sida pulai ke rumah.
Tang, bala orang BN di Malaysia ngelakuka dagang temuai tu endang beduduk ba pengelandik sida nipu tauka ngelakar orang dikena ngulihka duit sida ngena semaya bula tauka main ngeluluka diri.
