Pengerangka udah bekuasa atas Kepala Menteri ti ngujungka iya udah enda ingat ke diri ti suah bulih sebarang utai ti dikedekaka iya, di sebarang maya, ari menua Sarawak.
Projek ti deka dikereja iya enggau berupai nya udah dikeluarka dalam berita kemari bekaul enggau sebuah projek ti ke-4 pemadu besai dalam langgur atur pemansang SCORE di menua nya.
Projek besai SCORE nya nentuka rampa menua ti besai bendar diampuhka di menua Sarawak laban dikena meri awak ngagai projek ngulihka bekal kuasa elektrik hidro ngagai kilang-kilang ba kandang SCORE. Kepala Menteri nya udah nentuka tebal agi pengawa dagang dalam SCORE nya patut ditengali dagang iya empu aja.
Anak indu iya Hanifah bulih perais ti baru
Nitihka berita sehari kemari kompeni dagang kunsi Iwatani-SIG nya deka neruska langgur sida ngaga kilang dikena mekalka gas berai ngagai bala penguna sida di Sarawak, Sabah enggau Brunei, beduduk ba ‘Zon Industri’ baru ti dilanggurka Taib di pelilih menua Samalaju.
Surat-suratberita nya madahka “Iwatani-SIG nya sebengkah dagang kunsi 60:40 entara kompeni Iwatani Industrial Gas Pte Ltd ti beopis di menua Jepun enggau kompeni Southern Industrial Gas Sdn Bhd, sebengkah anak kompeni ti mampang ari kompeni SIG Gases”.
Tang semua pengarang berita nya udah enda mujur nyebut pasal konsortium ba piak Malaysia ti endur sebagi share ti besai dalam kompeni nya dipegai anak indu Taib, Hanifah Binti Taib.
Ke bendar iya, Iwatani-SIG nya sebengkah kompeni dagang kunsi chara Sarawak ti klasik, ti bisi 60% dikereja pemekal lalu 40% dikereja kompeni enggi Taib sebilik, lalu enti enda ngaga kaul dagang baka tu, pengawa nya enda bulih lisin.
Dulu ari tu Taib kala nguji numbuhka dagang kunsi entara CMS enggau kompeni Rio Tinto Alcan di pelilih menua Samalaju (sebedau kami mantaika repot pasal dagang kunsi bebalut enggau penyalah makai suap ti ngasuh malu, lalu udah nya kilang ari menua Australia nya matak diri).
Sama-sama bisi disengkaum dalam pengawa nya suba iya nya pengawa ngaga kilang dikena ngeluarka besi manganese enggi OM Holdings ti udah nyerahka sebagi share ti besai sida ngagai CMS lalu mega nyengkaum sebuah kompeni enggi Taib, KKB Builders, dikena ngereja mayuh macham pengawa ba tapak projek sida nya.
Share iya
Kaul Hanifah dalam projek SIG nya endang utai ti udah disadang. Laki iya Ahmad Asree Alwee dituduhka nyadi siku ari raban pengarah lalu iya empu nyadika pemegai share ti pemadu mayuh!
Hanifah ukai semina bempu sebagi ti besai share ba nama iya empu, tang iya mega nyadi orang ti bempu setengah ari share dalam sebengkah kompeni Phoenix SIG Holding Sdn Bhd.
Baka menyadi iya, Jamilah Taib, Hanifah mega patut berasai gaga ati enggai diri empu ti megai share pemadu mayuh dalam mayuh bengkah kompeni di menua Sarawak, nyengkaum sepeempat ari kompeni CMS (iya nya sebengkah konglomerat pemadu besai di Sarawak) enggau kompeni pengeluar suratberita Sarawak Tribune.
Laki Hanifah mega diberi penuduk ti tinggi dalam Raban Pengarah dalam kompeni CMS.
Antu Gollum?
Mar bendar ba Taib diatu deka ngulihka pengarap sapa-sapa ti endur kuasa pengerak di belakang langgur-langgur gila iya deka ngampuhka bumi Sarawak ngena projek-projek tekat ai lalu ngubah rampa kampung ti berega tinggi nyadika kandang menua industri dikena ‘mai pemansang ngagai rakyat’.
Tambah mega bala rakyat Sarawak deka meratika pemayuh tubuh orang Sarawak ti bekereja ba SCORE nya kurang bebanding enggau pengereja pengawa ari menua bukai.
Dulu ari tu Taib bisi udah nemuai ke menua India laban minta bala pengereja pengawa menua nya bekereja di Sarawak.
Nama penguntung ngagai orang Sarawak empu, tang sida semina deka dituntung penanggul kamah angin enggau rampa menua, penanggul diampuhka bah enggau lenyau tanah laban dibukaka kandang industri-industri SCORE nya.
Kepala Menteri nya suah digambarka bala blogger baka siku antu Gollum, sebengkah watak belengenda dalam filem Lord oF The Rings, ti kelalu angkunka pengaya lalu ngujungka iya dirusak reta pengeraja iya empu nya.
Sapa orang ti patut disalahka iya kelimpah ari iya empu?