BN benung chakah sereta enda badu-badu ngatur serang, enda salah-salah baka pendiau nembiak ti mit, nguji nutup semua jaku tuduh kami enggau chara nyerang laman web tu enggau laman-laman web Radio Free Sarawak enggau Radio Free Malaysia.
Sida mega udah ngeruga program-program ba kedua-dua stesyen radio nya, tang enda mujur.
Taja pan ketiga-tiga buah laman web nya udah balat diserang lalu enggau enda ngetu-ngetu ngena chara ti dikumbai orang serang DDoS (Distributed Denial of Service), tang semua serang sida nya ulih diseliahka sistem-sistem komputer kami.
Serang-serang nya mega udah ngelekai ngagai serata menua US enggau menua-menua bukai, tang kami nyadang serang ti ngemalat nya mega begunaka agih duit ti mayuh lalu mega disikap enggau atur ti serangkap genap dikena nutup sada nyawa kami sekumbang pengawa bepilihbesai tu, ti kenu ku sida BN nya nadai besekat, lurus sereta bedemokrasi.
Nama utai ti dikenangika sida ulih dibacha enggau didinga kita?
Kelimpah ari portal kami tu, portal-portal berita internet ti ngatika diri di menua Malaysia mega kena serang. Portal Malaysian Insider enggau Free Malaysia Today nya udah nyadika tagit sida.
Serang-serang ti baka nya endang udah disadang sereta dipelabaka kami, laban BN endang ngembuan rekod timayuh ba chara sida mampul mulut media-media ti ngatika diri, lebih agi maya bepilihbesai baka ke diatu.
Parti ti merintah Malaysia nya dipeda baka ti enda arapka diri empu ulih napi sebarang jaku bantah munsuh sida, tang sida udah milih mampul mulut sapa-sapa ti ngelaban sida enggau chara ti kamah, ngena chara ti dikumbai sida “perang cyber”.
Kami meragam, baka ni gaya berita ti tau ngemba sida ti patut ditemu bala pengundi sida? Sekali ke berita nya pasal penyalah makai suap ti benung balat nyadi baka ti dikereja bala menteri sida, ti bediri baru minta pilih?
Tauka ketegal asil pansik ti enda muji polisi perintah enggau jaku-jaku tanya baka ni sebuah menua ti kaya minyak mengkang nyadika sebengkah menua ti seranta, taja pan nyerumba nya bala kaban parti UMNO empu ditemu enggau orang meli kandang menua ti nyau ka setengah ari nengeri London?
Tauka sekali ke sida deka mampul arus penerang ti ulih mantaika penyalah makai suap rambau bepilihbesai ti deka datai tu ila?
Kami ulih meragamka semua peransang tu benung dipejalaika lalu kami meri buah penemu awakka peransang-peransang tu patut tampak ngambika ditemu semua orang baka sida ti tampak ditemu kami.
Sebengkah parti politik ti ngembuan runding ti surut sereta tinggal di belakang
Chara BN bejalaika pengawa bepilihbesai ngelama tu endang berupai bendar chara ti lama sereta tinggal singkang ari menua bukai. Ba sida enggau chara ti nyuap bala pengundi beberapa ringgit lalu ngelalaika penerang-penerang ti patut ditemu bala pengundi pasal chara-chara sida bejalaika pengawa merintah menua nya nyadika pemujur ti dikena sida kenyau ari taun-taun 60-an nyentukka 90-an.
Tang dikena sida neruska chara lama sereta korup nya tama ke dalam rambau internet rebak ke diatu nya semina nunjukka sida udah jauh bendar tinggal di belakang perintah menua-menua bukai ti jauh udah mansang, tang UMNO mengkang changguk-changguk ba tangkal tangga ti lama.
Nya udah nyadika peneleba sida ti udah puntan ngulihka utai ti dijuluk ati sida ti deka terus ngena chara ti lama – taja pan mayuh portal berita diatu dipejalaika ngena sistem pengelikun ti manah dikena napi serang lalu nusui pasal sapa orang ti nyerang sida ti ngujungka penyerang sida nya dikeleseka.
BN diatu berasai takut lalu sida benung chakah ngiga chara dikena sida mampul mulut enggau sada nyawa ti enda besekat di Malaysia, laban sida diatu udah puntan chara.
Enti sida ngembuan runding ti menuku sida tentu besedia deka besaraka penemu lalu napi jaku bantah bala orang ti ditujuka ngagai sida. Sida tentu deka mantaika polisi-polisi sida lalu ngalahka munsuh sida ngena chara jurai ti manah, lurus, baka bala demokrat ti udah mansau penemu enggau runding.
Tang ke bendar iya, raban BN nya nadai ngembuan pengarap ke diri empu ti tau ngasuh sida menang maya besaraka penemu. Lalu ati sida enda terang, tauka ngembuan pengelandik bebulaka semua penerang pasal penyalah makai suap ti benung ditugungka sida sekumbang 50 taun tu.
Terang bendar mih semua serang sida ngagai raban orang ti mantah sida nya nyadika kelai sida nya udah enda nemu nimbal lalu sida nadai pengarap ke diri empu ulih napi serang enggau chara ti lurus.