[Ben Fogle tu siku ‘bintang TV realiti’ bebansa British beberapa taun tu udah – lalu kami nuliska surat tebuka tu pasal penemuai iya ke menua Sarawak bedau lama tu udah]

Tabi basa ke nuan Ben Fogle,

Kami udah beratika enggau silik repot nuan dalam majalah Hello, nyengkaum penerang-penerang media enggau Tweeter pasal penemuai berani nuan tama kampung-kampung bungas di menua Sarawak, seraya “ngajar bala anak jelu mayas baka ni sida ngidupka diri dalam babas”.

Kami diterangka repot pejalai nuan nya sebengkah kontrak kereja enggau sebengkah kompeni PR pengatur pejalai temuai Hills Balfour, ti ditemu kami nyadika orang ti melanja penemuai nuan nya. Tang amat nuan nya temuai ti tulin baka ti dikeluluka nuan, ti enda salah-salah kelulu nya endang amat batang pengawa nuan?

Pia mega, bala klien di belakang Hills Balfour enggau surat-surat dokumentari sida pasal menua Sarawak nya datai ari Perintah Menua Sarawak ti diperintah dalam pengelama 30 taun ulih siku Kepala Menteri ti bependiau kleptomaniak, Abdul Taib Mahmud.

Endang udah nyadika polisi-polisi iya ngurung anak jelu mayas, baka iya ti benung dipangku nuan ba “tengah-tengah kampung bungas” Borneo, ti digambar siku indu bajik Sharon L Sagan (bisi penerang ti silik agi pasal iya tu lagi).

Enti nuan amat-amat kala macha penerang pasal kampung di Borneo sepemanjai penemuai nuan nya, nuan tentu deka nemu a) nadai agi kampung bungas ke bendar ti tau ditagaka nyadi endur semua jelu mayas diau, b) laban Taib Mahmud enggau bala kroni kayu batang iya udah nebang kandang kampung bungas ti besai bendar di menua nya lalu ditanam ngena sawit lalu c) sekayu menua nya udah kelalu balat dituntung penyalah makai suap lalu nadai siku orang dalam perintah iya deka kiruh pasal pemanah rampa menua tauka pasal pengelantang raban orang bansa asal lalu d) empas ari pengawa nya, makai angin enggau ngelantangka ati di menua nya tau nyadika pengingat ti enda ngerinduka ati sapa-sapa.

Tang nama kebuah semua penemuai ti berani sereta tambap dalam kampung puang nya disebutka nyelai sereta ngasuh ati alit? Terang bendar nuan udah nanggam sebengkah kontrak ari Lembaga Pelancongan Sarawak ari pun nyentuk ke pengujung penemuai nya lalu jelu-jelu babas mega digambar dalam sangkar sida nyadika sebagi ari utai ti dikumbai jurugambar nuan nya “produk eko-temuai”.

Kami ulih ngaga siti simpul penemu ti madahka nuan dibayar pampas ti mayuh beduduk ba kontrak Hills Balfour, ti endur nuan besedia diasuh ‘bemain enggau anak jelu mayas nya’ lalu ngayan gaya kelulu ti bula ngambika dipeda bala pemacha majalah Hello di menua Barat, lalu sapa agi ti deka diayanka sida Hills Balfour enggau chara pechuma enti enda ketegal ditanggam syarat ti tendu ari Kepala Menteri Sarawak, dalam pengawa beputus asa iya nutup rekod kamah iya ti ngemalu iya empu sekumbang iya megai perintah.

Nuan enggau agensi Hills Balfour ke bendar iya enda tau enda nitihka penemu bala orang PR nya ti enda irau ke chara ngayanka sesebengkah pekara baka ti amat, enti sesebengkah utai nya tau ngasuh ati bala klien sida nya nyima.

 

Dulu ari nuan, bedau tentu lama tu udah kompeni FBC Media, iya nya sebengkah kompeni media PR ti udah direpotka kami laban udah ngeluarka dokumentari-dokumentari TV ti ngelanggar atur pengerembai berita nengah BBC enggau CNBC betuju ngayanka gaya positif menua Sarawak ti bula lalu ngangkatka jaku dawa Taib Mahmud ti madahka menua Sarawak agi bisi 85% kandang rampa kampung puang ti bedau dikeruga.

Kompeni FBC Media udah mujur bulih upah $5 juta setaun ari Taib Mahmud ke servis sida nya lalu mega dikena mayar upah nuliska petenah sida dalam blog berachun dikena iya nyakal bala orang ti mantah iya nengah randau pasal pengerusak rampa menua di Sarawak, ba blog tu.

Sepengudah kami mantaika pasal kontrak BBC enggau CNBC sida enggau tekala nya matak kontrak sida ari FBC Media ti lalu ngujungka kompeni nya terus ditutup. Nya alai kami diatu agi betanya-tanya berapa pemayuh bayar Taib Mahmud ngagai Hills Balfour dikena sida nganjung nuan nemuai ke Sarawak lalu mega ke reputasyen nuan ti nyadi cover-boy ba kimpin ngemanahka cherita pasal kampung bungas Sarawak ba maya ke diatu?

Sekali ke nuan arapka gamal nuan ti sigat nya senutuk enggau pengawa nuan nya, lalu nyerumba nya orang mayuh deka pechaya ke nuan udah enda kiruhka pengawa ngerusak rampa kampung bungas ti pemadu tuai di dunya lalu ngulihka upah ari siku tuai diktator ti pemadu rangka di dunya tu dikena iya nipu bala temuai enggau chara ngumbai agi mayuh kampung bungas ti besai rampas di menua Sarawak?

Tang siku bintang pop ari menua Korea, Psy, ti udah nerima upah ari BN ke pengawa belagu iya di Pulau Pinang bulan nyin kemari, udah enggau naka bejimat enda ngayanka diri besetuju enggau perintah ti benung dituntung penyalah makai suap, pengawa ngelanggar atur pengelantang mensia enggau pengawa ngerusak kampung bungas ti besai bendar rampa ti enda besekat.

Tang nuan baka ti enda besedia mansutka seleka jaku dikena nuan ngenggaika kontrak nya dikena ngangkatka nama menua Sarawak nyadika sebuah menua ti bisi kampung bungas endur temuai datai.

Kala nuan ninga berita pasal raban orang bansa asal ti nirika empang dikena sida nagang kompeni kayu batang tama ngagai kampung bungas lalu mega pasal projek ngaga tekat ai ti ngempang mayuh sungai di Sarawak lebuh nuan nemuai kin?

Bisi nuan beratika penyeranta tauka ninga baka ni raban bansa penan, baka jelu babas, udah ditejuka idup lapar pungkang ketegal dituntung penanggul ari pengawa orang ngulihka kayu batang lalu muka kebun dandang besai kelapa sawit?

Nama kebuah pekara ti baka nya enda kena pansa dalam Hello tauka sebarang filem ti bisi bekaul enggau penemuai nuan ke Sarawak nya? Nama kebuah nuan enda nangkan orang bukai ti deka nemuai, ti madahka Sarawak diatu udah lenyau rampa kampung ti besai, ketegal udah balat dikeruga lebih sepuluh taun tu udah?

Kami dipadahka gambar nuan diambi raban sida ‘BBC’. Udah sida berasai malu ketegal skandal FBC Media suba, kami endang ngumbai kompeni nya terus ngenyauhka diri empu ari Taib Mahmud!

Diatu terang bendar raban pengarang berita bepansik ari BBC nya benung kiruh meresa lalu mansik Taib Mahmud enggau kaul iya enggau dunya mafia penebang kayu batang, tang raban pengarang berita pasal pejalai temuai ba kompeni nya agi mudah bendar nyambut upah nusui pemula ari iya!

Makai suap

Enda ibuh nuan madahka kami, Ben, pasal nuan ti enda nemu Sarawak nya sebengkah menua ti dituntung penyalah makai suap, ti betuaika Taib Mahmud enggau bala menteri iya?

Nadai siku orang di menua Sarawak deka bulih sebarang utai enti enda ngaga kaul enggau Taib Mahmud.

Lalu selampur sistem nya ti ngujungka pengerusak rampa kampung bungas ti ditusui nuan baka rampa kampung ti diintu enggau manah ulih sebengkah perintah ti amu, ti diarika Lembaga Pelancongan enggau Opis Kampung, ti melanja penemuai nuan nya.

Aram kitai sama beratika tukang gambar ti udah disengkaum dalam kontrak ditanggam senggau Perintah Menua Sarawak enggau Hills Balfour nya.
Sharon Leraine Sagan gaga bendar ati udah iya nemu gambar ti diambi iya nya dichelak Hello dalam majalah sida. Nyerumba nya mega Hello bisi ngayanka sekeda ari cherita pasal iya ti madahka iya nya siku orang ti bekereja enggau perintah Malaysia.

Tang, sapa iya nya ke bendar?

Sharon nya siku anak indu Jacob Sagan, iya nya Sapit Menteri Pengawa Dagang enggau Industri ti mega nyadika siku ari kroni ke Taib Mahmud.

Kami mega kala ngayanka Sharon enggau apai indai iya nyadika waris ba lisin ngulihka kayu belian ti diterima sida ari Kepala Menteri.

Sharon mega siku pemegai share dalam siti ari dua iti kompeni ti bulih lisin ngulihka kayu belian ari sitak menua Baram ti diarika apai iya, ti ngujungka rampa menua nya rusak, tang lalu nadai nguntungka orang bansa asal di menua nya.

Lalu kami mega kala mantaika berita baka ni Winnie Jolly, iya nya indai Sharon, nyadika siku Pengarah dalam beberapa iti kompeni ti kaya-kaya ti udah bulih kontrak ari perintah menua.
Ben, nuan patut nemu diatu nya sida Sagan sebilik nya nyadika seraban orang ti bisi kaul enggau pengawa ngerusak rampa kampung ketegal pengamu sida nerima lisin enggau kontrak ari perintah ti jai. Tang nama kebuah nuan majak ngangkatka nama sida ketegal nuan ti deka ke duit pampas ari sida, ngemesaika eko-temuai Taib?

Tiap iku kitai tu endang begiga ke belanja, tang nuan patut nemu ngaga sempadan ke pengawa nuan nya?

Diatu Hills Balfour ngena laman Tweeter sida ti madahka sida deka enggau National Geographic Society di nengeri London ngena sebengkah licha nusui pasal pejalai nuan dalam kampung lalu pengasai ati nuan meratika pemanah rampa kampung ti jarang dipeda. Terang bendar juluk ati sida nya enda ngangkatka nama menua lalu mega ngulihka upah ari Taib Mahmud.

 

 

 

 

 

 

 

 

 

 

Kami tentu deka berasai takut enti kami tu ba endur nuan, Ben. Bala orang ti udah ngelala menua Sarawak enggau silik tentu deka ngambi berat ba kandang menua ti makin ngasuh sida nyau enda rindu ati.

Ngenataika jaku umbuk PR nuan ngagai raban besaintifik ba National Geographic Society nya sebengkah ari singkang ti besai ngelui artikel-artikel ti tambap dalam majalah Hello nya tau bendar ngasuh orang pedis ati.
Nuan disadang deka betemu enggau bala audien ti nemu agi ari nuan pasal menua Sarawak lalu sida mega disadang deka nanya nama tuju ke bendar nuan ke menua Sarawak ti tau pulai ke pemanah penemu mensia.
Nyerumba semua klip filem nuan ti tambap nya ti deka besakal reti enggau sekeda pekara ti deka dibantaika bala pengarang berita ti tulin sereta bendar, ti benung mansik pasal pengamat penyalah makai suap ngulihka kayu batang enggau pengawa ngerampas tanah ti dikereja bala orang ti mampas penemuai nuan nya, baka Taib Mahmud.

Nama utai ti deka dikereja bala krew filem BBC pasal utai nya ila lalu baka ni nuan deka nyelamatka gaya nuan ari kimpin PR ti deka mangkung diri empu ila, Ben?