Ke sekali tu Abdul Taib Mahmud udah berengkah nimbal bala orang ti mantah iya ba perambu iya ti deka ngaga 50 buah agi tekat ai ba mayuh bengkah batang sungai di serata menua Sarawak.

Nitihka penemu Taib, sapa-sapa orang ti mantah iya, baik ke sida nya raban blogger, raban ari gerempung NGO tauka raban bansa ti mit-mit, nya dikumbai iya orang ti jai ti deka bejalaika “sabotaj ekonomi”!

Kleptokrat ti nyau semakin tuai nya udah mansutka jaku ti endur iya enda bebatak-asur enggau bala orang ti mantah sereta ngelaban iya taja penyampau tubuh sida nya enda mayuh, lalu iya seruran madahka raban sida nya nerima bantu belanja ari menua luar, ti kenu ku iya bebendar nguji deka ngeruga ekonomi menua Sarawak ti benung mansang diatu. Tang, nama kebuah Taib Mahmud irau bendar ati ke perambu iya ti besai nya tau tanggul laban bantah ari raban orang ti mimit bendar tubuh nya?

Enti Taib ngembuan ketegal ti manah dikena iya ngaga tekat lalu tau pulai ke penguntung semua raban bansa asal di Sarawak, nama kebuah Taib ti udah dipilih enggau chara demokrasi, tau ringat lalu berasai enda lantang ati ke jaku bantah ti ditujuka ngagai iya?
Nama kebuah Taib ringat enti projek-projek iya ti betinjau jauh ke mua nya napi jaku bantah ti beresi?

Tauka empas ari jaku bantah nya nyau nyadika jaku emba ke semua orang luar ti deka beranakka puku dagang enggau bank-bank ti deka meri bantu belanja duit jali dalam projek-projek ti diperambu nya?
Tauka, bala orang ti deka nyali duit bantu ba ikas entarabansa enggau bala konsultan diatu nyau belabuh berunding dua kali deka neruska kaul sida dalam projek ti dibalut penyalah makai suap enggau genggam rejim autokrasi Taib, enggau sada nyawa jaku bantah ti mit-mit ti diatu semakin terang didinga?

Diatu kaul dagang entara SEB enggau Hydro-Tasmania dipeda baka ti kena keruga.

CEO Roy Adair ari kompeni Hydro-Tasmania enggau Chairman sida, David Crean, ti dulu ari tu udah terang bendar madahka anak kompeni sida, Entura, ti bejalaika batang pengawa sida di Sarawak. Roy Adair udah nyemakaka kompeni SEB enggau menua Sarawak nya dikuasa seraban orang ti “beintegriti tinggi”, lalu sida mega ngemesaika pemujur program sida ti nyali bala pengereja pengawa dikena ngemujurka projek SCORE.

Diatu sida Hydro-Tasmania madahka batang pengawa sida di menua Sarawak nya “enda besai” lalu pengari sida madahka SEB udah “saru tusui” laban nyau kelalu ngemesai-mesaika pengawa sida baka ti bisi dalam repot taun sida suba.

Beserimbai enggau nya mega, Hydro-Tasmania kala nyebut pasal batang pengawa siku ari pengereja pengawa sida, Andrew Pattle, nyadike pengereja pengawa ti dijali sida ngagai SEB. Penatai Pattle dalam SEB nya nyadika sebagi ari pengawa Hydro-Tasmania meri bantu ba pengelandik ngatur pejalai projek besai baka ti udah direpotka sida ba repot taun sida nya.

Diatu Pattle nyadi Pengarah Projek ba projek tekat Murum lalu mega nyadi Pengurus Kanan ke projek tekat Baram enggau Baleh. Kelimpah ari nya, bank-bank ti nyali duit ke pejalai projek SCORE baka Deutsche Bank Asia ti sama beranakka puku dagang enggau Kenanga Investment Bank lalu mega enggau kompeni besai CMS Berhad enggi sida Taib sebilik. Sekali ke bank-bank entarabansa nya diatu nyau belabuh ngumbai kual dagang dalam projek SCORE nya pekara ti betul?

Lalu baka ni ku kontraktor pengereja pengawa ari menua Britain, the Prudential, ti mega nyadi pemegai bon pemadu mayuh dalam SEB – sekali ke sida irau ke pekara-pekara ti bekaul enggau basa ke mensia ti kena keruga diatu?

Sekali ke nyangka nya kebuah Taib udah enggau enda mukai-mukai enggai kiruhka jaku bantah bala orang bansa asal ti deka ampuh rampa menua laban ai tekat nya ila?

Taib patut nyeliahka mayuh jaku tanya ti bekaul enggau SCORE enti iya endang ngena atur pengawa ti betul sebedau iya berengkah bejalaika projek ngaga kandang menua industri pemadu besai di Asia nya ti deka ngeruga mayuh sistem sungai di Sarawak.

Cherita lama mayuh kamah laban pengerusak ti dibai raban tuai menua ti kering tang sida nadai ngembuan pengeliat ati enggau pengelandik, ti enggai napi jaku bantah lalu ngumbai bala orang ti mantah sida nya nyadika “sabotaj ekonomi” sida.

Uji kitai beratika “Projek Nanam Padi Bedandang Besai” di Kalimatan baka ti dipejalka Presiden Suharto. Suharto udah enggai ningaka jaku ajar raban orang ti landik ba pengawa bumai menua iya empu ti madahka tanah gambut di menua nya enda manah endur nanam padi. Nama kebuah kitai majak nerima ‘juluk ekonomi’ enggi Taib, taja pan perambu iya nya bedau tentu nyengala mujur?

Taib Mahmud udah besedia beranakka puku ngena pengeraja asal tanah menua Sarawak nyadika projek ti deka ngubah gaya menua Sarawak, lalu iya seruran asai ke kena kemeli enti tiap kali bisi orang deka betanyaka pemanah perambu iya nya.

Tambah mega Taib suah bendar madahka rakyat iya deka bulih mayuh penguntung ari pengawa ngulihka kayu batang enggau pengawa bekebun dandang besai sebedau kampung sida abis dikeruga. Perintah Taib udah didinga mansutka penerang ti madahka pengawa kilang di Sarawak deka begunaka pengereja pengawa ti dibai masuk ari menua bukai lalu enda begunaka tulang rakyat menua iya empu.
Ba taun nyin kemari Taib bisi nemuai ngagai sekeda universiti Islam di menua India laban deka ngiga raban graduan 600,000 iku ari sida nya endang orang India enggau orang ari menua bukai ti deka dibai tama ke Sarawak dikena iya ngemujurka projek SCORE iya.

Orang ti endang amat deka bulih penguntung ari SCORE nya Abdul Taib Mahmud enggau sida sebilik aja.

Enggau chara nguasa semua dagang semin, nguasa pejalai kompeni besai-besai ti bulih kontrak ngaga jalairaya, nguasa semua share dalam pengawa kilang ari menua luar, enggau nguasa Sarawak Cable ti diberi kontrak besambungka kuasa elektrik ari kompeni SEB, Taib enggau sida sebilik nya meh raban orang ti dulu bulih penguntung.

Nya kebuah, tiap kali iya ngenang pasal “sabotaj ekonomi”, engka iya endang ngumbai dagang sida sebilik nya deka kena keruga orang ti, kenu ko iya, jai ati ngagai menua Sarawak?