Lebih 40% nembiak bansa Penan ari baruh umur 5 taun datai ari genturung bansa Penan ti deka ampuh laban ai tekat Murum bisi ditemu kurang pemakai ti manah ke guna tubuh, lalu 12% ari sida nya ditemu balat agi dituntung penusah nya, nitihka penerang ari repot ti benung dilalaika Perintah Sarawak diatu.
Tu nyadika sebengkah jaku aku ti balat ngemaluka perintah bekaul enggau penyalah enda ibuhka pendiau orang bansa asal ti dikereja Taib Mahmud ba pengawa iya ngerusak kampung atas belanja perintah menua Sarawak ti dipegai iya.
Penanggul ke bukai nyengkaum pengawa pelajar enggau pekara pengerai.
Sekeda ari simpul penerang ari repot nya munyi tu:
“Bisi 46% ari ruang bilik bansa Penan tu seruran napi pengurang pemakai.”
“Klinik pengerai ti pemadu semak enggau genturung sida dalam menua Murum semina bisi di menua Sungai Asap. Nadai atur pengangkut ti meruan … ari genturung pendiau ti pengabis semak … pejalai dalam pengelama 2 jam nuju klinik, lalu genturung pendiau pengabis jauh, Long Luar, begunaka pejalai dalam pengelama 6 jam.”
79% kes beranak dikereja di rumah diri empu “ti enda likun” lalu “nadai statistik ti meruan ti ulih dikarapka bekaul enggau pemati nembiak ti baru ada tauka ti agi mit” tauka sebarang atur ti dipejalaika Opis Pengerai.”
Bala Penan diri sebilik ti udah pindah ngagai Sungai Asap ngambika semak agi enggau sekula sida nyau nemu diri diasuh nguan langkar rumah baka langkau manuk ti udah nya diseruri manah ke agi.”
Taja pan mayuh sida deka besekula semina 2% ari nembiak bansa Penan bisi peluang masuk sekula lalu 100% ari sida nya tanggul ketegal badu besekula ukai ba maya ti patut badu. Pemayuh sida ti puntan besekula nya 5 ari 8 buah genturung pendiau bansa Penan. Genturung ti pemadu semak, Long Peran, 90 kilometer ari pengentap pendiau Sungai Asap (ti bisi sekula) lalu ulih dilawa nengah jalai kompeni kayu batang, lalu genturung pendiau ti pemadu jauh nya bulih 250 kilometer.”
“Juluk ati bansa Penan endang deka direjista lalu ngembuan surat pengelala diri ngambika sida tau bulih bantu ari perintah lalu bantu ke bukai ti begunaka surat pengelala diri”. Tang 80% ari semua bansa Penan nya mengkang nadai ngembuan sebarang surat pengelala diri”.

Repot pansik Orang Bansa Asal Bekontemporari ba bansa Penan udah bisi dipejalaika dalam taun 2010 ti nyadika sebagi ari atur dikena ngabas Pangka Ngagai Sosial enggau Rampa menua ditagaka nyadika “pun pengawa dikena ngenataika diri ba “ikas standard entarabansa” endur ngentapka pendiau orang bansa asal ti kena tanggul laban tekat Murum”.

Ke bendar repot nya dipelalaika laban isi iya belaban reti enggau atur entarabansa bekaul enggau atur mindahka orang bansa asal laban projek tekat ai, nyengkaum Penetap Pengelantang enggau Pengelikun Orang Bansa Asal Gerempung Bansa Besatu (UNDRIP), ti endur menua Malaysia endang nyadi kaban iya.
Datai ke diatu nadai sebarang sempekat ditanggam enggau bansa Penan tu ti dituntung penanggul ampuh laban ai tekat nya ba pun taun tu ila.
Diatu kami ulih ngeluarka salin ke terubah asil pansik bekaul enggau bansa Penan, baka ti udah ditiriska ari Perintah Sarawak apin lama tu.
Isi ti silik ari repot nya ngayanka baka ni Taib Mahmud udah enda ibuhka bansa Penan ti nguan kampung menua Sarawak tu, ti ditejuka iya keberuran ketegal pengerusak rampa menua sida enggau pun penatai pemakai sida.
Pengawa ngulihka kayu batang enggau pengerusak rampa menua di Sarawak endang dikena ngulihka belanja bejuta-juta ringgit ti dikena mantu orang bansa Penan tu senutuk enggau atur “pemansang”, tang repot nya disimpulka:-
“Semua raban bansa ba endur nya diatu idup ari baruh ikas pemerinsa. Idup chara lama sida ti dulu suba nya tau dikumbai lantang agi ari diatu. Dulu suba sida bulih pengidup ari asil kampung lalu kelimpah ari ti dempa sida empu, asil kampung nya tau didaja. Taja pan udah mujur didaja, raban bansa Penan tau dikumbai idup lantang. Tang pekara nya nyau semakin mar laban asil dalam kampung nyau majak kurang sereta kusut”.

Enggau nya kami deka nanya Kepala Menteri, Taib Mahmud, ti udah dikamatka menantu iya, nyadika orang pemadu kaya di Malaysia lalu mega di kandang menua Asia Tenggara, nama penyadi ba asil kampung ti beungkus bejuta-juta ringgit enggi bansa Penan, ti endur sida ditejuka keberuran lapar, nadai bantu ari lutur, nadai besekula, nadai atur pengangkut?
Kami mega deka betanya ari kompeni Sarawak Energy Bhd enggau bala pangan dagang kunsi sida ari kompeni Hydro-Tasmania ti ngumbai atur ba tanggungpengawa sida ke raban bansa asal enggau korporat sida sama ikas ti ditetapka entarabansa nitihka atur Gerempung Pengeluar Kuasa Hidro Entarabansa, ti deka dipejuraika taun baru nyin ila nitihka standard UNDRIP?
Nyangka Taib Mahmud ngumbai raban bansa Penan tu endang nadai sekali di menua Sarawak.
Nitihka repot nya, raban bansa penan endang suah udah minta direjista lalu deka ngembuan kad pengelala diri, laban enti nadai surat penerang ke baka nya, mar bendar sida deka minta bantu ari perintah lalu pia mega mar endur bulih pengawa. Ba maya sida ti ngenataika peminta sida nya, mayuh bendar mega penanggul ba ikas opis perintah ti endang dipaduka nulung sida nya.
Pekara ti ngasuh kitai majak irau diatu nya, ikas ai tekat nya nyau majak niki lalu dipeda ngampuhka genturung pendiau, tanah temuda sida, lalu semina sida ti bisi surat pengelala diri aja ti bulih pampas ari perintah lalu dientapka ba palan pengentap pendiau ti baru ti disediaka perintah.

Sekali ke atur ti baka tu endang dikena ngelimat belanja perintah ari ti enda ibuhka pengidup raban orang bansa asal?
Tauka, sekali ke tu sebengkah chara Taib Mahmud nagang raban bansa Penan mechat lalu muai iya nengah undi sida?
Tauka, sekali ke tu nyadika balas ke orang bansa Penan ketegal sida udah ngayanka bantah sida dikena sida ngusaika pengerangka enggau penyalah makai suap ti dikereja Taib Mahmud enggau chara sida ti nirika empang jalai, lalu pengawa sida nya diatu benung diperatika orang di serata dunya?
Repot nya udah ngayanka baka ni orang bansa Penan idup ari baruh ikas RM850 sebulan ti tau dikumbai idup ari baruh ikas penyeranta di menua Sarawak, nadai nerima sebarang bantu ari perintah. Ba perengka dikena berumah, sida endang ngaku diri enda nerima bantu ari perintah.
Perintah Sarawak ti udah ngerusak pengidup enggau daya idup sida mega nadai ngagihka peluang bekereja ke sida tu.
Kelimpah ari ti enda diberi sebarang bantu, diatu rampa kampung sida udah dirusak. Dini endur sida deka bulih pengidup enggau pemakai?
Baka ni chara sida deka bulih bantu pengawa betanam-betupi dikena sida mantu diri empu?

Chara ngemunaska raban bansa baka ti benung dikereja Taib Mahmud diatu enggau chara ti alus nya tau ngenyaika nama Perintah Besai Malaysia, ti mengkang enggai mechat lalu nulak siku tuai perintah menua ti rangka tu. Suah bendar Perintah Besai udah ngasuh Taib Mahmud badu agi mangku pengawa iya nyadi tuai menua, lalu suah mega iya didinga besemaya deka badu, tang datai ke diatu iya mengkang enda nginsit ari penuduk iya nya.
Diatu Taib Mahmud dipeda baka ti deka ngapuska daya idup enggau main asal sebengkah raban bansa asal ti udu nyelai di Sarawak nya seraya iya ti nerumpak semua utai ti dikemisika sida, sebedau iya bepuas ati lalu badu ila.
Lalu Najib dipeda baka ti besetuju enggau Taib. Dalam Perambu Belanja Menua 2013 (budget) ti dibantaika iya apin lama tu udah, perintah BN udah ngurangka agih belanja ba pengawa pelajar di menua Sabah enggau Sarawak ngagai 80%! Tu chara dikena malas ‘penyalah’ ti dikereja raban bansa Penan?

Bala orang BN ti nuliska repot nya udah balat bendar dipeda ngerusak pemanah nama BN ari sida ti mansutka juluk ati enggau asil pansik sida ba bansa Penan ti endur, ko sida, 5 taun udah Murum digaga, 5 taun udah repot nya digaga lalu patut dikeluarka ngambika bisi ke penemu mensia mayuh lalu dipejuraika lalu udahnya dipesetujuka, tang repot nya mengkang dipelalaika.
Taib Mahmud bisi lima taun endur iya mutarka pengawa nya ti endur iya tau ngayanka penelap iya ngagai raban bansa ti udah nguan menua Sarawak jauh dulu ari dua serak tubuh iya empu, tang iya milih deka meda sida nya idup merinsa lalu lapar keberuran lalu (iya arap bendar ke) raban bansa Penan tu apus sereta lus ari menua Sarawak tu.
Kami meri besai terima kasih ke bantu enggau tulung ari menia mayuh ke Tabung Tasah Murum. Kami deka ngena semua bantu nya meli semua perengka ti dipeguna orang bansa Penan sepemanjai sida nirika sereta ngibun empang jalai sida nya.