Sebengkah suratberita ti tebilang di menua Britain, Daily Mail udah madahka penemuai Wlliam enggau Kate ke Sabah tentu deka ngamahka pemanah nama Istana di UK nya. Kebeuah iya? Laban penemuai seduai kena hari Lima tu ila deka disambut Kepala Menteri Sabah, Musa Aman ti “benung dipansik laban bisi kaul enggau penyalah makai suap pengawa ngulihka kayu batang di Sabah”, baka ti kala ditusui suratberita nya dulu ari tu.
Pekara ti baka nya mega udah ditusui portal berita internet Malaysikini ti nyebut pasal pengirau ati mensia mayuh ke pemutus penemu ti ngasuh William enggau Kate ngelala siku orang politik di Sabah ti bisi tanggungpengawa ngerusak rampa menua sekumbang 20 taun ti megai menua nya. Raban NGO Malaysia, SUARAM, udah nulis surat ngagai Istana St. James di UK madahka pengirau sida ke penemuai William enggau Kate betemu enggau Musa Aman, lalu bisi mega nyebut pengawa Musa ti nguji meresi nama diri udah ti ditemu ngeruga rampa kampong di menua nya.

Tang ba Musa, penemuai di-raja William enggau Kate nya tau nyadika sebengkah ‘berekat’. Ngelama tu iya nguji ngelamun jaku bantah bala orang ba iya kejang deka bepilihbesai enda lama agi. Musa mega ditemu enggai nyurutka diri ari penuduk iya taja pan iya benung dipansik raban pemansik penyalah makai suap ari menua Malaysia, Hong Kong enggau Switzerland.
Mayuh bendar penerang udah diayanka ti nunjukka baka ni beribu-ribu juta dollar duit suap ari pengawa nebang kayu batang di Sabah udah diatur nengah akaun-akaun bank bala pengari iya, Michael Chia enggau Richard Christopher Barnes.
Tang Opis Menteri Luar Britain enda ibuhka jaku bantah bala orang ke penemuai di-raja William enggau Kate nya, laban penemuai nya ila dipeda deka ngemanahka kaul dagang nyengkaum dagang senyata entara Britain enggau Malaysia.
Ba minggu nyin kemari bala orang ti mantah penyalah makai suap ari menua Malaysia udah begelumu ba mua Istana St. James di London laban minta William enggau Kate enda dikemelika Musa ba pengawa iya ti nguji meresi nama diri ti kamah laban penyalah makai suap.
Diatu tekan ba pansik penyalah Musa nyau majak nambah udah Perintah Besai Switzerland ti ditanya MP sida, Carlos Sommaruga bekaul enggau pansik perintah Hong Kong ba reta Musa nya.

Penemuai William enggau Kate nya dikena nimbal penemuai Kepala Opis Kampung menua Sabah, Sam Mannan ngagai Istana St. James ti ngelakuka menua Sabah nyadika sebuah menua nelap-ekologi.
Kejang ti nganti penatai penemuai William enggau Kate nya, Sam Mannan udah madahka besai agi rampa menua Sabah bisi kampong ti ‘dijaga’ enggau manah.
Tang rampa menua di Sabah ti dikenang Sam Mannan nya ke bendar udah ditebang magang, taja pan endur nya udah dititah nyadika “Heart Of Borneo” ari gerempung WWF sebedau sempekat nya ditanggam suba.
Penerang ari dalam industri penebang kayu batang di Sabah bisi madahka kampong puang di menua nya udah dikeruga kenyau ari 20 taun ke udah ari pengerangka Musa Aman nengah pengawa iya ti ngeluarka lisin nebang kayu batang lalu nerima duit suap ba rampa kampong ti kena jaga nya.

Musa Aman enggau Sam Mannan mega napi dawa ti madahka seduai udah ngubah kar rampa menua di menua Sabah ti ngayanka rampa ti betebiang suba nyau dibali ngambika tau ditebang!

Nya alai, diatu pengirau ati orang enggau jaku tuduh orang udah digelumuka enggau penerang bukai ti dikena mansik beratus juta dollar udah diterima ari kompeni-kompeni kayu batang dipasukka ngagai akaun-akaun enggi Musa Aman ti diatur bala pengari iya, Michael Chia enggau Rickard Christopher Barnes dikena sida ngulihka untung udah ti ngeluarka lisin nebang lalu ngerusak kampong di menua nya.

Taja pan Musa Aman udah didinga madahka diri enda ngelala sapa orang ti benama Michael Chia, tang dalam semua surat bank terang bendar ngayanka duit ari akaun Chia nya dikena melanja pelajar sekula dua iku anak Musa Aman lebuh seduai di Australia, nyentuk ke seduai iya tembu belajar din, ti dikemataka siku pengari Musa ti benama Imbang Bin Bujang.

Tugung penerang ti baka tu meh ti udah diserahka ngagai perintah Switzerland ti nyadika penerang dikena mantu pengawa mansik penyalah ti dikereja Musa Aman enggau bank UBS.

Penerang-penerang ti sebaka mega udah diayanka kami dalam laman blog tu udah Lawyer Bansa menua Malaysia (Abdul Gani Patail, ti mega kaban belayan Musa Aman empu) udah enggai bedawaka Musa taja pan Opis MACC udah ngeluarka repot sida ti deka nuduh Kepala Menteri nya ngena 40 iti chas dalam penyalah nya.
Tang bala sida ti udah ditemu bisi bekaul enggau penyalah ti mengkang mangku pengawa sida patut nyurutka diri dulu nyentuk ke ngagai maya nama sida diperesi!
Diatu peluang ti deka dikena ngayanka William enggau Kate nya nyadika soldadu dalam kampong puang Sabah ngambika bisi dipeda bala orang di Britain nyau nyadi tanda tanya.
Penyalah makai suap Musa Aman nya tau bendar nyadika sebengkah keruga ba pemanah nama Istana di Britain.