Siku blogger bepenemu jai di belakang mayuh laman ti diupah perintah BN dikena bejai Anwar Ibrahim enggau Sarawak Report udah dibuai ari pengawa ba kompeni suratberita ti tebilang menua US, The Guardian.
Kompeni suratberita The Guardian bisi udah ngambi repot kami pasal Josh Trevino nyadika penerang ti madahka iya enda tau diupah nyadi penulis agi dikena sida ngamatka pengawa sida ti ngemaduka ari pengawa iya kemari. Semua asil tulis iya endang dikena iya ngarika BN ba pengawa sida ti bejai Anwar Ibrahim lalu ngemanahka nama Najib Razak. Ba pansik kami agensi berita ti ko iya nya kompeni penabur berita FBC Media, sebengkah kompeni ti udah ditutup udah kami nuliska repot kami ba chara FBC Media dibayar RM84 juta ari opis Menteri Besai Malaysia dikena ngemanahka nama iya di menua luar enggau dalam menua Malaysia empu. FBC Media mega ditemu kami nerima upah kontrak RM15 juta ari Taib Mahmud dikena iya nimbal serang ari Sarawak Report lalu mega bejalaika kempen bejai kepala editor iya, Clare Rewcastle Brown enggau sida sebilik, nyengkaum Menteri Besai Britain ke dulu suba, Gordon Brown.

Suratberita The Guardian udah bejalaika promosi ngelakuka Josh Trevino nyadika penulis beluan kanan sida kena 15hb Ogos taun nyin kemari. The Guardian madahka diri udah saru ngambi Trevino bekereja enggau sida. Kami udah nuliska repot ti madahka penemu Trevino nya udu ngeringka Israel enggau ngelaban orang Islam. Dalam sebengkah repot iya Trevino bisi ngasuh soldadu nimbak sebarang orang ti bekereja ke ‘Mercy Flotilas’ ti nganjung bantu enggau pemakai ngagai bansa Palestine ti tasah. Sebarang orang ti nitihka disebut Trevino nya patut dibunuh nyengkaum rayat US enggau rayat Malaysia, ti endang dikumbai Najib Razak nya manuk sabung ketegal pemerani sida.
Nya alai, kami deka betanya ari Najib enggau Taib, nama kebuah seduai ngupah siku penulis ti ngembuan penemu benchi ke Orang Islam taja pan seduai empu nya tuai politik ti bepengarap Islam sereta ngembuah penemu begedika bansa Israel?
Nyangka meh laban kita rindu deka ngereja pengawa kamah, nya alai kita enda tau enda ngupah sapa-sapa orang ti sanggup ngereja ke kita?

Sarawak Report udah nerima penerang ari dalam ti diseretaka enggau sekeda bukti pasal Josh Trevino diupah FBC Media dikena sida nyerang laman blog tu enggau nyerang Anwar Ibrahim ti endang nyadika sebagi ari kontrak sida enggau Najib seduai Taib.
Beserimbai enggau nya FBC Media udah salah guna penuduk sida nengah stesyen TV bukai baka BBC, CNBC enggau CNN ngemanahka nama sekeda tuai politik ari menua Malaysia enggau tuai-tuai bekukut besi baka Hosni Mubarak ari Ejip, Nursultan Nazarbayev ari Kazakhstan enggau Gulnara Karimova, ti tebilang enggau nama gela iya “Anak Indu Pemadu Jai Di Dunya” ari menua Uzbeksitan.

Trevino ti nyadika penyanding penemu politik sereta pengarang ke jaku tuai-tuai politik beluan kanan di menua US, bisi numbuhka laman web ti benama Red State. Iya mega bisi laman bukai enggau nama Rogue Strategic Services ti ditagaka dikena mantu bala pelanggan iya merambu atur pengawa, aum dalam organisasi, ngaga kaul enggau media bansa baru.

Ngena peluang ke baka tu iya udah ngena laman-laman blog iya nyerang Anwar Ibrahim enggau Sarawak Report di menua US enggau di menua Malaysia empu.
Blog iya ti benama New Ledger (ti udah diasuh tutup diatu) bepalan di menua US lalu dikaitka iya enggau laman Red State iya, dipejalaika baka laman politik ti ngundan berita ditulis bala ‘pengarang berita ti ngatika diri’. Ke bendar iya, laman New Ledger nya kelalu balat ngeringka berita pasal pekara ti nyadi di menua Malaysia lalu nyau ka 50% ari berita nya ditagaka dikena nyerang Anwar Ibrahim enggau Sarawak Report. Kelimpah ari nya Trevino ditemu bisi numbuhka dua buah agi laman web. Siti ari laman iya nya benama Sarawak Report(s) ditagaka nyemakaka nama enggau laman kami tu, mega dikena iya nyerang Anwar Ibrahim. Sebuah agi laman iya benama Malaysia Watcher, ditagaka dikena nyerang Anwar lalu ngela iya baka “sodomis” enggau “kaki indu”. Ba pun iya, berita sida direpotka dalam New Ledger ngambika dipeda tulin lalu udah nya dipantulka ngagai laman Sarawak Reports enggau Malaysia Watcher ngambika dipeda tulin di menua US! Di menua Malaysia, kompeni suratberita ti ngeringka BN enggau agensi berita bansa, Bernama, deka ngambi berita ari laman-laman Trevino nya lalu ngerembaika ngagai serata menua di Malaysia.

Trevino enggau pengarang berita ke bukai endang enda kala madahka penatai belanja sida ari duit rayat dikena sida beserangka orang ti enda sepenemu enggau BN.
Tu meh kebuah Josh Trevino diasuh The Guardian badu kereja ba kompeni sida.

Kami bisi bukti ba pengawa ti dipejalaika FBC Media enggau Josh Trevino ba pekara “blogging khas” nya dikerembaika sida ngagai pengawa ngubah penerang dalam laman Wikipedia ti bisi kaul enggau Taib Mahmud enggau Sarawak Report.
Kempen nya endang dikena sida bejai Sarawak Report enggau laman web politik ke bukai ti chakah mantah atur Taib Mahmud enggau BN, nyengkaum pengawa sida ti mantah sereta bejai Menteri Besai Britain ke dulu suba, Gordon Brown enggau sida sebilik.
Belabuh ari 30hb Mac, sepengudah FBC Media ngelancharka kempen sida ngemanahka nama Sarawak, dia seraban penggodam laman ti ngena nama lalai sida Yaya222010 udah ngeruga laman web Wikipedia, ti dikumbai “sock puppet”.
Ke terubah iya sida ngaga sebengkah entry pasal editor Sarawak Report ‘Clare Rewcastle Brown’, ti numpuka tuduh bula sida ti dikaitka sida enggau skandal parlimen menua UK. Jaku petenah nya lama udah dikeluarka ari suratberita di Britain, lalu semua gantirugi udah tembu dibayar.
Entry ti jai sereta salah dalam laman Wikipedia nya mega dikaitka ngagai serang Sarawak Report(s) enggau Josh Trevino, ngambika browser lalu terus muka laman nya. Penggodam Yaya222010 mega ditemu nambahka pemaut ari Radio Free Sarawak dalam Wikipedia ngagai laman baru sida.

Serebak enggau nya, yaya22010 ditemu ngubah entry dalam Wikipedia pasal Andrew Brown, iya nya laki Clare Rewcastle Brown.
Yaya222010 mega ditemu nambahka jaku tuduh enggau petenah ngagai Clare Rewcastle Brown, taja pan kes pechara nya lama udah ditutup. Sida mega nambahka pemaut-pemaut dalam Sarawak Report(s).
Tuju sida ke bendar ngereja pengawa nya ngambika bala pemacha berita sida ngutuk Andrew Brown baka penyalah ti berat bendar, taja pan sida Brown sebilik udah menang dalam kes pechara nya suba.
Dalam sehari nya mega penggodam Yaya222010 udah ngubah entry Wikipedia enggi Menteri Besai UK dulu suba, Gordon Brown. Yaya222010 ditemu ngaga pemaut ngagai entry Wikipedia enggi Clare Rewcastle Brown enggau Sarawak Report(s) ti endur sida balat agi nyerang baka ti dituliska dalam berita sida. Ba hari nya mega Yaya222010 mega ditemu ngaga pemaut ngagai Wikipedia enggi Abdul Taib Mahmud ke dalam pemaut laman sida ngagai artikel berita pasal Clare Rewcastle Brown ngambi bala pemacha tau ngumbai sapa-sapa orang ti mantah Taib nya orang ti deka bejai iya!

Yaya222010 udah ngaga ubah ti positif ba penerang pasal Taib Mahmud ti udah nya lalu dipautka ngagai Sarawak Report(s)
Laman-laman Wikipedia ti bukai ti udah diubah Yaya222010 sehari nya nyengkaum laman enggi blogger penyakal ari Malaysia, Raja Petra Kamaruddin. Yaya222010 mega ngaga pemaut laman Raja Petra ngagai Sarawak Report(s) ti endur iya diayanka baka ti nyerang Anwar Ibrahim.

Pengawa bala penggodam nya endang ngarika Taib Mahmud dikena nyerang editor Sarawak Report, sebaka enggau sempekat kontrak Taib Mahmud ti ditanggam iya enggau FBC Media dulu ari tu.
Diatu, orang ti bempu laman Wikipedia udah ulih ngamatka penerang ti madahka Yaya222010 endang raban orang ti udah diupah, lalu dalam bulan Ogos taun nyin kemari sida tu udah nguji deka madamka berita kami ti bekaul enggau Kepala FBC Media enggau CNN John Defterios enggau Chairman FBC Media, Alam Friedman.

Diatu gerempung berita FBC Media udah ditutup sepengudah kami nuliska repot pasal pengawa kamah sida, ti udah mega ngujungka gerempung berita BBC enggau CNBC mega ngetu nganggam kontrak enggau FBC Media.
Deka tauka enggai Chairman FBC, John Defterios enggau blogger kamah Josh Trevino bebulaka jaku tuduh ti ngumbai seduai iya nya bejalaika kempen ngemanahka nama Taib Mahmud?
Diatu Sarawak Report udah nganjung sekeda jaku tanya ngagai orang ti bempu laman Wkipedia bekaul enggau pekara tu.