Menua UK udah betukar perintah 11 kali kenyau ari menua Malaysia udah merintah diri, lalu berebak enggau nya mega menua Peranchis udah diperintah 20 iku Menteri Besai.
Tang dalam 55 taun UMNO/BN udah bekuasa di menua Malaysia, sida iya udu rindu rauh-rauh manjung ngumbai menua Malaysia nya sebengkah menua ti bepegai ba atur demokrasi ti tulin.
Pemutus nya endang ulih disadang. Bisi seraban bala orang ti megai perintah udah nyadi kaya-raja enggau enda mukai-mukai, lalu sida enda tentu ibuhka utai ti diguna bala pengundi sida empu ti udah milih sida.
Raban sida ti udah lunggar umur dalam BN mega seruran bejaku ke atur nyerahka kuasa perintah, tang sida tu berunding ke kuasa, ukai ngena chara muai undi!
“Aku rindu ngereja pengawa enggau naka pengelengkas”

Snowdan Lawan nya siku ari raban nembiak BN di menua Sarawak ti udu rusak ulah enggau pendiau, ti udah nerima penuduk politik ari apai sida ketegal ti nyadi kroni ke Abdul Taib Mahmud.
Snowdan rindu ngeluluka diri rinduka tindak ti jampat ba sitak pengawa bepilihbesai, tang rekod iya ngayanka iya semina rinduka kerita lumba ti laju-laju sereta berega mar aja. Apai iya, Donald Lawan, ti kala nyadi menteri, udah nyadi kaya raja ari ti suah nerima lisin enggau AP nyual kerita nengah kompeni sida sebilik, M & D Enterprise.
Kompeni M & D Enterprise bulih status dalam taun 1980 lalu udah mujur nerima kira-kira 200 – 250 iti pemendar-pemendar AP meli kerita ari menua tasik ninting taun. Siti AP dipelabaka kira-kira RM30,000 ke sebuah kerita.

Penyeranta enggau pengawa ngerampas tanah di pelilih menua Balai Ringin

Rekod Snowdan Lawan ti rinduka kerita lumba ti mar-mar berupai agi ari iya ngira pengawa pemansang ke sitak ti diarika iya di Balai Ringin.
Sitak Balai Ringin nya sebengkah sitak ti diwan tebal agi bala rayat ti seranta, taja pan dulu suba rampa kandang menua nya meri penatai pemisi ke sida tang diatu menua nya udah dirampas bala kroni BN. Ba minggu nyin kemari Awang Asfia ti nyadi speaker DUN dalam perintah Taib udah nagang sebengkah sara penemu ti dipinta DAP endur bejuraika penanggul rampas tanah ti nuntung orang di Balai Ringin.
Bala rayat ti seranta ari sitak Balai Ringin udah nirika langkau arau beberapa hari di Kuching ngayanka bantah sida, lalu minta kes rampas tanah nya dipecharaka ngelaban kompeni-kompeni kebun dandang besai ti ngeruga menua sida.
Siti ari kompeni nya enggi menteri BN suba, Federick Bayoi Manggie. Tu siti chunto kaban politik BN diberi lisin ngerampas tanah ari orang Sarawak empu!
Snowdan Donald Lawan, siku orang ti rinduka gitar pop, endang nadai dipeda mua-mata lebuh bala pengundi iya ari Balai Ringin ngayanka bantah sida nya. Snowdan udah nejuka penanggul nya diputarka bala kaban politik ari parti DAP ti kala udah dikutuk iya suba. Tang diatu baru iya nemu penyeranta bala pengundi iya. Ba sebengkah jaku tanya enggau iya dalam surat berita Borneo Post, dia Snowdan udah nerangka penanggul ti balat bendar nuntung sitak Balai Ringin nya pengurang ba jalai alun ti meruan, kuasa elektrik enggau ai beresi.
Gaya jalai alun ti bisi di menua nya diatu tentu iya enda ulih ditengah kerita lumba Lamborghini iya, ti endur apai iya ditemu nyuap munsuh politik iya ngambika Snowdan tau menang dalam taun 2006 suba!

Kenyau ari iya ti udah nyadi orang politik enam taun tu udah, YB BN ti kaya raja nya lubah amat ngemansangka sitak iya empu.
Tebal agi bala pengundi ba sitak iya nadai endur bulih ai ti beresi enggau kuasa elektrik.
Portal berita internet, Free Malaysia Today udah ngayanka mayuh pekara ti bekaul enggau pengelubah pemansang ba kandang menua nya. Ba sebengkah menua ti endur bala rayat bisi ai sungai ti beresi disauk, tang bala pengundi Snowdan semina nyauk ai parit ti kamah!
Ba taun nyin kemari bala rayat Balai Ringin ngemataka sebengkah palan nupi enggau mela jani ti bisi kuasa elektrik enggau ai 24 jam sehari, tang bala pengundi Snowdan empu lalu bedau ngasaika penyamai ngena kuasa elektrik enggau ai beresi!

Bala pengundi mega tentu betanya-tanya sapa mih ti bulih penguntung ari palan nupi enggau mela jani nya? Laban sida endang nemu, orang ti untung nya ila ukai sida.
Sida nemu palan nya tentu deka nguntungka sapa-sapa ti bisi kaul enggau kaban-kaban politik BN – siti ari pekara ti suah dikereja dalam perintah Taib Mahmud di Sarawak!
Ngambi tindak ngelaban Radio Free Sarawak!
Tang nembiak rusak BN ti kaya raja nya rindu bendar ke kerita lumba ti mar-mar lalu enda nemu nama utai ti patut diberika ngagai orang ba sitak ti diarika iya kelimpah ari ti seruran nguji deka nutup mulut sapa-sapa orang ti mantah BN.
Ba minggu nyin kemari Snowdan bisi direkod mansutka jaku ngambi ke sebengkah tindak dikereja ba Radio Free Sarawak, sebengkah radio jaku Iban internet ti benung regas bendar ngarika raban bansa asal ngulihka hak asasi sida lalu mega ngutuk pengawa makai suap ti dikereja perintah parti BN!

Snowdan patut ngena pangkat enggau penuduk iya ngereja utai ti manah-manah ke raban orang di sitak ti diarika iya, ari iya ti ngiruh diri deka ngambi tindak ba orang ti nunjuk ngagai iya utai ti enda tau dikereja sapa-sapa ti nyadi YB.
Terang bendar Snowdan bisi pengarap ba diri empu ti bulih penuduk dikena iya merintah, laban iya enda nemu utai bukai lebih ari nya.
BN nya baka universiti ti tebilang-tebilang!
Agi mega, nembiak BN ti rusak nya udah kala diketawaka orang lebuh iya ngumbai parti BN nya enda patut dibuai, laban iya pechayaka BN udah lama megai perintah lalu enda nyalah-nyalah baka unversiti ti tebilang-tebilang, baka Oxford, Cambridge tauka Harvard! Komen iya nya beli didinga lalu munyi ti ngeleseka jaku bantah ti tau pulai ke pemanah.

Sekeda orang ngumbai Snowdan nya tau dipasukka dalam seraban orang ti ngelusu berunding, rindu sereta merindang diri ngena kerita lumba ti mar-mar, duduk ba penuduk ti tinggi laban apai sida udah kelalu tuai endur terus bekuasa.
Bala nembiak BN ti sama bela rusak baka Snowdan nya, iya nya baka bala anak Taib Mahmud, Abdul Rahman Sulaiman (ti bulih sitak Kota Samarahan, tang udah nya ngerarika diri ke menua Eropa), enggau Abu Bekir (ti diasuh apai iya bediri, taja pan iya diatu benung napi kes sarak RM400 juta enggau bini dulu iya).
Sida Lawan sebilik patut badu nyerang bala orang ti mantah sida lalu belabuh ngereja utai ti manah-manah ke bala pengundi sida.
Tang Snowdan tentu enggai badu, laban iya enda nemu lebih ari nya. Semina sebengkah chara dikena muai iya ari penuduk menteri iya, iya nya ngena kuasa undi baka ti dikereja di menua-menua bukai, dikena nangkan sida, sapa ti endang bos!
Kepala parti PRS ti diarika Snowdan nya, James Jemut Masing, udah kala didinga nangkan bala pengundi iya sapa ‘taukey’ ke bendar tang diatu iya mega udah ditemu berampaska tanah orang di menua Serian. Bala orang di menua luar ngena chara undi muai tuai-tuai perintah sida ngambika tuai-tuai ti jai penemu enggau jai adat nya patut ingatka tanggung pengawa diri ngemataka pengelikun enggau pengelantang raban pengundi sida empu, ari sida ti ngira penyamai pengidup diri empu aja.