Stesyen TV ti tebilang ari menua Timur Tengah, Al Jazeera, udah meri penemu sida udah sida nemu sekeda ari isi berita sida bekaul enggau Bersih 3.0 kena hari Enam nyin kemari udah ditapis stesyen TV satelit menua Malaysia, Astro.
Ba penerang sida sehari tu, pengari stesyen Al Jazeera nya nyebut:
“Sebedau tu isi berita kami nadai kala ditapis baka tu ba dini-dini platform berita di dunya.”
Penerang tu nambahka jaku bantah komuniti penabur berita di serata dunya ba senentang atur napis berita di Malaysia ti bechura authoritarian, ba sebengkah menua ti ngumbai diri ngemeranka perintah demokrasi.
Nyerumba nya mega, stesyen BBC udah mega nemu isi berita sida kena tapis bekaul enggau Bersih 3.0 nya, lalu diatu sida udah ngeluarka jaku tanya sereta mega ngena atur undang-undang lalu deka ngambi tindak undang-undang ba pekara tu, nitihka sebengkah penerang ari dalam.

Nyarung diri

Beserimbai enggau nya Al Jazeera, ti bepalan di Qatar nya, diatu bisi ketegal dikena sida madahka isi berita sida nya udah dikachau.
Lebuh Bersih 3.0 dipejalaika mensia mayuh di KL apin lama tu udah, Al Jazeera bisi nganjung siku penusui berita jaku English sida, Harry Fawcett, ke KL, ngambika bisi ngaga ripot berita lalu ngatur jaku randau enggau sekeda orang lebuh maya nya.
Tebal agi isi berita ti diripot iya nya ngayanka sechara dramatic lalu mega bisi ngayanka pengasar ti dikereja bala polis ba orang mayuh.
Lebuh maya iya benung bejaku ba mua kamera, bala polis bisi dipeda bejalai kelang-kelut ari belakang iya lalu udah nya iya bisi ngeripotka perengka iya dirusak – sebengkah serang ti diripotka dikereja bala polis ba bala penusui berita.
Ripot ari Fawcett nya tau disimpulka, kedua-dua piak raban orang lebuh maya Bersih 3.0 nya diatur, sama bela tau ditekanka ngereja penyalah. Tang stesyen nya arap bendar sida nerima penerang pasal Astro ti udah napis isi berita sida sebedau dipandangka dalam TV di menua Malaysia.
Ngeruga nama?

Al Jazeera nuduh pengawa napis isi berita sida nya dikereja perintah Malaysia ti bechura authoritarian ti kala ngeluarka belanja bejuta-juta ringgit dikena meresi nama diri ba ikas entarabansa. Semina agensi berita ti setanah enggau perintah aja diberi lisin pemendar nabur berita di Malaysia.
Kompeni Astro ti enggi siku kroni BN, Ananda Krishnan, lalu diberi pemendar naburka berita pasal perintah semanjai 24 jam sehari, lalu mega naburka berita ti diterima ari menua luar baka BBC, CNN enggau Al Jazeera ngambika bisi dipeda orang di menua Malaysia.
Udah sida nerima jaku bantah enggau jaku tanya ba minggu nyin kemari dia sida Astro lalu ngaku sida bekereja nitihka “atur penabur berita menua”, ti endur palan berita enda tau enda napis berita ngati ke diri sebedau berita tau ditusui ngagai mensia mayuh.
Al Jazeera minta padahka baka ni gaya isi atur penabur berita nya lalu baka ni sida udah ngelanggar atur nya. Al Jazeera ngayanka pengeringat sida ngagai Astro ti udah sepeneka ati napis isi berita enggau enda madah dulu pengawa napis nya ngagai gerempung ti meri sida berita, tauka nerangka ngagai mensia mayuh nama kebuah isi berita nya ditapis!

“Pengemata Berita”
Sarawak Report diatu ulih ngayanka tu mih keterubah baka ni pengawa napis isi berita dikereja Astro. Stesyen TV Astro endang bisi ngupah seraban orang ti ngemataka berita ti diterima Astro lalu napis isi berita ti patut enggau enda patut dipeda orang di Malaysia. Raban orang nya dikumbai sida “Pengemata Berita”.
Ba stesyen berita ti tebilang ba ikas entarabansa baka Al Jazeera nya, ripot sida ti bisi tuju nya nyau betukar nyadi berita ti berat sepiak, tang bala orang di Malaysia deka ngumbai isi berita nya endang penemu ari stesyen berita entarabansa.
Enti gerempung berita BBC enggau Al Jazeera udah nanggam sempekat ti ngemendarka pengawa napis baka nya, pekara ti bekaul enggau pengamat berita tau nyadi pekara ti ngerusak.
Tang ba pengujung iya, raban authoritarian Malaysia ti bekereja enggau chara belalai nya deka tebantai mega utai ti dipelalaika sida.

Sehari tu mega kaban MP Tom Greatrex ari menua Britain, siku ari kaban All-Parliamentary Group ke menua Malaysia bisi mansutka bantah penemu iya ba pengawa Malaysia ti udah napis berita BBC nya.
Atur Penabur Berita

Semanjai hari sehari tu Sarawak Report enda mujur betanyaka penerang ari pemesai-pemesai ti bekereja ba Astro.
Kami udah minta sesalin Atur Penabur Berita Menua ti dijadika lalau sida bekereja lalu deka beratika nama lalau ti dikena sida napis isi berita ti diterima sida.
Mayuh menua luar ti bukai ngumbai pengawa betapiska berita nya sebengkah penyalah ti berat.
Tang kami semina bisi nerima sekeda dokumen pasal Atur Napis Filem ari opis Menteri Dalam Menua, lalu kami ngumbai pengawa napis berita nya pengawa ti besai rampa lalu dikereja ba sebarang utai ti ngelanggar peneka rejim politik ti benung megai perintah!
Pugu kategori atur ti ke terubah nyengkaum 4 sukut baka ti dirintaika Perintah nya bekaul enggau ‘semua pekara ti bekaul enggau pengelikun enggau atur mensia mayuh’.
Semua bansa penyalah dikena nerangka bantah tauka ngayanka perintah enggau agensi-agensi sida ti enda manah endang enda tau enda ditapis dulu. Reti nya, semua pengasar ti dikereja bala polis dalam isi berita nya enda tau diayanka ngagai mensia mayuh lalu enda tau enda ditapis dulu!

Ba atur tu, terang bendar pengawa napis nya enda tau enda nyengkaum sebarang isi berita ti ngayanka penyalah makai suap ti dikereja orang perintah BN tauka sebarang sapa ti bekereja ke sida.
Diatu terang bendar Malaysia, sebengkah menua ti seruran rauh-rauh madahka diri bejalaika atur demokrasi tang perintah sida mega ngembuan atur napis isi berita ti senutuk enggau gaya menua ti pemadu authoritarian enggau dictatorial di dunya tu.
Patut tauka enda gerempung berita Al Jazeera, BBC tauka CNN ngemendarka pengawa napis isi berita sida enggau enda ibuh dipadahka dulu ni maya atur penabur berita nya deka dipejalaika?