Menteri Besai Malaysia udah ngasaika pengamat reti demokrasi lebuh iya bediri ba atas panggau dalam Arena O2 di London demalam lalu jaku iya maya nya dilamun penginggar panjung nyawa sekeda pengabang iya!
Pekara tu ukai utai ti dikedekaka Najib enti iya diasuh bejaku di menua iya empu, di sebengkah menua ‘ti bejalaika adat demokrasi ti pemadu manah dalam dunya tu’, ti betuaika perintah BN bekuasa ngena chara kasar.
Di menua UK mega, jarang bendar orang meda bala pengabang kurang basa ba mua tuai-tuai ti benung bejaku ba mua orang mayuh.
Tang bisi mega maya pekara nya tau nyadi enti siku-siku Menteri Besai udah ngaga pendiau diri enda agi dikerinduka orang. Menteri Besai Britain ti dulu suba, Tony Blair pan kala mega ditibarka pengabang ngena panjung jaku putap dalam taun 2000, lalu lemai kemari nya mih maya Najib Razak empu gintir ninga panjung jaku putap ari bala pengabang ti nyebut “Bersih! Bersih!”, maya iya baru belabuh bejaku ba mua mayuh.
“Tau nuan badu?”
Nitihka penerang ari sekeda bala pengabang lemai nya, penyampau semua pengabang ti bisi datai kia kurang lebih 500 iku berasai enda puas ati maya sida tama ke dalam stadium Arena O2 di London laban penampak dalam endur nya enda tentu terang seraya sida makai sandwich enggau popia ti enda nyamai. Taja pan kualiti utai diirup enda ngemuaska ati sida, tang abis kurang pan bisi mega mantu sida bekelimat ba belanja makai sida lemai nya, tang bala orang ti datai jauh baka ari Edinburgh balat berasai enda puas ati!
Bantah ti diayanka sekeda pengabang Najib lemai nya endang diatur lalu endang disadang deka nyadi. Mayuh pengabang ti datai kia endang deka belabaka stadium ti enda terang maya nya enda dikena ngelamun sebarang utai ti deka nyadi baka nya. Enti baka nya mih chara pengerami lemai nya diatur, chara nya udah dipeda enda mujur laban mayuh orang ulih ngambi gambar enggau video ba utai ti nyadi maya nya.
Sereta Menteri Besai niki ngagai panggau it endur iya bejaku, iya semina ditenggau siti lampu sorot, lalu tekala nya didinga panjung ari sekeda pengabang ti manchal-manchal dia!
Bala pengabang bukai mega berasai enda lantang ati laban meda pemayuh tubuh bala pemesai ari opis Special Branch ti kiruh beambika gambar enggau ngerekod penerang batang tubuh bala pengabang ti datai kia.
Tang mayuh agi bala pengabang dia agi ulih ketawa lalu sempat ngambi gambar bala orang ti manjung-manjung nya tadi.
Peminta-peminta Bersih di London
Najib tentu enda nyangka diri betemu enggau penanggul ti baka nya ba mua orang mayuh maya penemuai iya ke London nya kemari. Beratus ribu iku peranak Malaysia ti diau di menua tasik berasai ringat ketegal ti enda dikemendarka ngundi ngena chara pos, iya nya sebengkah chara ngundi ti dikemendarka mayuh menua bukai di serata dunya tu.
Sereta Najib belabuh bejaku, becherita pasal perengka pengangkut ba mua bala pengabang iya, iya tekenyit bendar ati ninga panjung sekeda ari bala pengabang ti bediri ba mua panggau ti endur iya bejaku.
“Ulih nuan badu manjung-manjung?” ku pinta Najib malu-malu.
“Bersih! Kami dekaka undi (pos) kami!” ku panjung raban pengabang ti manchal nya, nyawa sida majak inggar!
“(Aku) minta kita badu (inggar)” ku pinta Menteri Besai, “Aku besedia deka berandau enggau kita udah tu lagi”, ku saut Najib ti ditimbal orang mayuh enggau ketawa ngelesay.
Udah nya Najib dipeda enda tentu mujur ngerara bala orang ti manchal nya, lalu bala sida ti inggar nya diasuh bala penyaga pengelikun pansut ari stadium Arena O2. Udah nya Najib nampung jaku iya taja iya dipeda berasai lembau sereta kesal udah nya.
Enti pengerami lemai nya diatur dikena nyambut penemuai Najib ke London lalu beserumpu enggau bala nembiak ti benung belajar di UK, berupai bendar iya dipeda ngemalu mua iya empu, siku tuai ti kering.
Sekali agi, jaku pesan ti ditujuka ngagai pengerami nya kemari iya nya ngambi ke menua Malaysia tau nyaut peminta-peminta Bersih ti mengkang minta pengawa bepilihbesai diperesi lalu chiru.