Ngelama tu mayuh orang belabaka ni maya Najib deka ngemeranika diri mansutka jaku gerah ti endur iya madahka maya ngatur pengawa bepilihbesai. Mayuh orang mega bisi pengarapka sehari tu mih hari ti deka disebut iya, hari Satu, lalu hari endur muai undi nya 9hb Enam ila.
Taja pan baka nya, deka kini Najib ngena peluang iya ti benung bekempen di 02 Dome di nengeri London mansutka jaku gerah nya? Tang kami mega deka mai bala pemacha meratika kelai-kelai ti bukai ti endang tentu betul agi. Kitai sama bela nganti semua bala kroni dagang Taib Mahmud belabuh bekeridun minching beg berisi duit lalu bebaris nganti gintir diri betemu enggau iya!
Enggau kelai ti baka nya mih kitai deka nemu BN udah besedia napi pengawa bepilihbesai ti dianti-anti kitai ngelama tu!
‘Kami bebaris mai beg ti ngundan duit ti mayuh bendar!’
Bala orang ti meri kami penerang bisi madahka kami sida udah nemu bendar chara-chara ninting kali Taib nyediaka diri napi pengawa bepilihbesai di menua Sarawak. Kebuah pia tu mih maya Taib deka ngangauka bala kroni dagang ti endur iya minta-nyanda duit, bala sida ti udah kala diberi iya kontrak enggau lisin nebang kayu kampung.
Kami mega dipadahka pasal Taib ti selalu minta diberi duit keretas ti udah dikena ti dibai dalam beg tama ngagai rumah iya di Demak Jaya! Mayuh agi ari duit nya deka dianjung ngena bilun jet iya empu ke Singapura ngambika bisi dibagi-bagi iya ngagai kaban politik iya ti deka disuap iya.
Tebal agi bala kaban politik iya nya bala tuai-tuai parti politik ti ditagaka iya ngenanka penuduk sida empu dalam serakup BN!
Bala pemeri penerang ngagai kami bisi bendar pengarap bala taukey ari kompeni ti dikangauka iya ke rumah ninting kali kejang deka bepilihbesai nya ari kompeni ti besai-besai baka kompeni Rimbunan Hijau, KTS, WTK, Shin Yang, HSL, Samling ti tau dikumbai kitai ‘kontraktor emas’, ti endang selalu dikarapka iya meri duit ti mayuh-mayuh ngambika dikena sida ngetanka penuduk sida dalam pengawa dagang sepenembu pengawa bepilihbesai.
Siku pengereja pengawa ari sebuah kompeni kala ngaku diri diasuh mai duit keretas dalam penyampau RM50 juta ba pengawa bepilihbesai tu tadi, lalu nyerahka semua duit nya ngagai Taib Mahmud, taja pan iya berasai malu bendar ngereja nya:
“Bala orang dagang ti bukai bisi bebaris nangkan aku datai enggau tuju ti sebaka enggau aku sehari nya”, ku iya nusui asai ati diri ti malu bendar ngereja pengawa nya.
Duit suap ari BN
Kami mega diterangka duit ti dianjung ngagai Taib nya ukai semina dikena nyuap bala pengundi iya ti merinsa-mensena nya, tang mega dikena iya mampas penaluk ati bala orang ti udah taluk ati ngagai iya.
Dini endur rega moral bala kaban politik bebansa Dayak ti udah mutus ati nyual bansa sida empu ngambika diri bulih pangkat enggau penuduk ari Taib, ba ninting kali pengawa bepilihbesai?
Orang dagang ti udah nusui cherita nya tadi bisi bendar pengarap laluh ti mayuh agi ari duit suap nya deka disimpan Taib ke guna iya empu!
Telepas ari ti dikemataka iya
Ke bendar, taja pan pekara tu dipelalaika, tang diatu udah ditemu, nya mega nyadikia kelai ti endur sistem makai suap Taib udah ba pengujung iya laban nyau enda ulih dikemataka iya agi.
Ngelama tu Kepala Menteri nya endang selalu nyukung bala kaban politik iya ngena rega ti tinggi bendar!
Nambahka nya mega orang tuai tu kala udah besemaya deka badu agi gawa ba pengawa bepilihbesai tu tadi, baka semaya ti kala disebut iya dalam taun-taun 1990 suba!
Diatu terang bendar mih iya bepagut ba kuasa iya ngena duit makai suap ti diberi bala kroni dagang iya kenyau ari 30 taun tu udah, lalu pia mega iya endang merah sida kroni iya ngambika nyuap bala pengundi ti merinsa-mensena.
Enggau nya, aram mih kitai sama-sama nengkilunka penemuai bala orang ti nepan kerita pacuan 4-roda tama nengah pintu pagar rumah iya, lalu nya deka ngelai penatai hari ti keramat ti endur kitai patut madamka ulah makai suap ti udah kelalu lama nyadi sebengkah penyakit dalam pendiau enggau pengidup kitai!