Tu mih keterubah iya dalam 30 taun Abdul Taib Mahmud enda nyadi datai ngagai aum suratberita, ti suah diaduka ba Wisma Bapa Malaysia seminggu udah tembu aum Kabinet.

Nambah ke nya, bala pemerita mega ditagang ari tama ngagai rumah wisma nya, digaga baka pendiau orang ti enda diterima niki.

Nyelai bendar utai baka tu udah nyadi dipeda ba Kepala Menteri nya.

Nama enda kini utai ti ngasuh pendiau enggau ulah Taib baka nya. Nama utai ti ngemba sereta nekan iya enggau bala menteri iya ari betemu enggau bala pemerita ti ngelama tu seruran didinga nyagu-nyagu ke sida?

Kitai tau ngaga simpul penemu madahka Taib udah enda ulih belalai ari penerang ti udah bedunjung ti tau nyadika jaku tanya bekaul enggau penyalah makai suap enggau pengeraja ti enda anchi-anchi pemesai dikembuan sida di menua Sarawak enggau di menua tasik.

Belalauka batang-batang berita ti ayan ba surat-suratberita dalam menua Malaysia lalu pia udah ngelekai ke menua tasik, bala pemerita di Sarawak ti balat dikemataka perintah pan enda ulih nyeliahka diri nanya jaku tanya bekaul enggau pekara nya. Lalu, enggau chara enda nyadi betemu enggau bala pemerita nya, terang bendar Taib enda nemu baka ni chara deka nyaut bala pemerita nya.

Tu mih siti tanda pengelemi perintah rejim Taib nyau enda berani betunga mua enggau bala pemerita.

Kitai patut ingat, diatu Taib udah tepekul bendar ninting kali maya baum ba Dewan Undangan Negeri.

Taja pan Taib mujur nipu ba maya bepilihbesai apin lama tu udah lalu menang ngena majority 2/3, disempulangka enggau penyalah bebelika undi enggau chara tipu ke bukai, bala YB penyakal diatu nyau majak berani nekanka iya, dibandingka enggau dulu suba.

Baka ni mih chara iya deka nyaut tanya-tanya sida bekaul enggau penyalah makai suap enggau penemu bechiping? Baka ni chara iya deka nyaut tanya bekaul enggau atur iya meri tanah enggau kontrak-kontrak ngagai bala anak enggau menyadi iya, ari ti ngena chara tender tebuka awakka tau pulai ke penguntung semua orang di Sarawak?

Ari penekul enggau penyekut runding iya, iya udah dipeda madamka mikrofon bala YB penyakal maya aum DUN, muai semua jaku tanya ti dikenggaika iya ari surat rekod hansard lalu mega nendang siku-dua bala YB penyakal pansut ari rumah aum DUN!

Tu terang bendar ngayanka iya udah enda nemu chara nyaut tanya, lalu nya kebuah iya ngeluluka diri nadai kala ditanya sapa-sapa bekaul enggau penyalah nya.

Jaku-jaku tanya munyi ti dipansutka bala YB penyakal nya disadang sebaka enggau jaku tanya ti deka dipansutka bala pemerita, nya kebuah iya nutup pintu dikena nagang bala pemerita nya tama!

Sekeda jaku tanya ti dikenangika Taib

Enggau nya, enti iya besetuju betemu enggau bala pemerita nya, kami ulih belabaka lima bansa tanya deka ditanya bala pemerita nya:

“YAB Kepala Menteri, baka ni ku nuan deka nerangka US$1.5 billion ungkus pengeraja ti udah ulih kita sebilik nengah 14 ari 400 buah kompeni kita nya?”

“YAB Kepala Menteri, nuan kala madahka nuan enggau kita sebilik ke bukai ‘nadai ngereja pengawa dagang di menua Sarawak, laban ku nuan enggaika dikumbai orang ngena peluang nuan ti nyadi menteri nya nugungka pengeraja ke diri empu’. Tang baka ni ku nuan deka nerangka pasal lebih 300 buah kompeni ti endur kita sebilik megai share?”

“YAB Kepala Menteri, niang bini nuan kala ditemu nyadi siku pemegai pemadu mayuh share dalam kompeni pemadu besai di menua Sarawak, CMS. Diatu iya pan udah mati. Agi iya idup suba iya nerima share ti mayuh nya ari menyadi nuan, Onn, lalu diatu sapa bagi kita sebilik nyadi waris share niang bini nuan nya?”

“YAB Kepala Menteri, nama kebuah nuan agi majak ngelepaska tanah menua berega tinggi enggau kontrak-kontrak ti besai-besai ngagai kita sebilik enggau chara resia, ari ti ngena chara tender tebuka?”

“YAB Kepala Menteri, ngembuan dua bansa peranak menua nya ngelanggar atur enggau undang dini-dini menua. Baka ni ku anak nuan, Jamilah, sekali ke iya nya agi peranak menua Malaysia (ti endur iya mengkang megai share ba 87 kompeni di menua Sarawak), tauka udah nyadi peranak menua Kanada, munyi ku diterangka laki iya, Sean Murray?”

Kami nemu, agi mayuh jaku tanya ti patut ditanya bala pemerita ngagai Kepala Menteri, tang kami minta bala pemacha kami nuliska jaku tanya sida ba ruang komen kami ditu. Jaku-jaku tanya baka ti dituliska kami ditu mega tau ditanya raban Polis Di-Raja Malaysia (PDRM), Suruhanjaya Pencegahan Rasuah Malaysia (SPRM), bala kaban politik Taib, enggau Menteri Besai Malaysia empu!

Diatu Taib udah belabuh enda rindu ditanya bala pemerita lalu tu dipeda nyadika penanggul ba pengawa bala pemerita nya. Ngelama tu surat-suratberita di menua Sarawak bepanggai bendar ba berita pasal pejalai Taib enggau bala menteri iya kulu-kili di sekayu menua Sarawak, enggau nadai begunaka sebarang jaku tanya tauka bantah.

Kompeni suratberita The Borneo Post ti diempu kroni kayu kampung Henry Lau ari kompeni KTS enggau kompeni suratberita The Sarawak Tribune ti setengah nya diempu petunggal iya, Hamed Sepawi, lalu diserenihka baru anak indu iya empu Hanifah Abdul Taib.

Taja pan baka nya, enti Kepala Menteri nya nyau enggai agi ngasuh bala pemerita nya nusui berita pasal pemindah iya, enggau nusui cherita pasal pengawa-pengawa pemansang dalam menua, nama berita patut ditusui sida dalam surat-surat berita nya?

Kami deka berasai gaga ati enti bala pemacha ulih nuliska komen sida ba laman tu. Tang kami mega deka minta bala pemerita ari kompeni-kompeni surat berita di Sarawak belabuh tama ngagai menua pesisir enggau ulu-ulu sungai lalu meda enggau mua-mata diri empu pemesai rampa menua ti udah ditebang lalu dirusak bala kroni Taib, lalu pia mega nemuai ngabas orang bansa-asal ti enda dikibuhka Taib?

Bala pemerita nya mega enda tau enda mansik nama kebuah mayuh agi raban orang di menua pesisir enda chukup ai beresi dikena besehari-sehari, lalu sungai ti dipangkang sida nyau nadai agi utai idup ti tau digigaka lauk. Sida tau mega mansik lalu nuliska pasal penanggul rampas tanah. Sida mega enda tau enda nusui berita pemalat pengerusak laban tanah tusur. Sida tau mega nusui pasal penanggul tusah ngulihka atur pengerai enggau perubat ti menuku ari ketegal penyalah makai suap ti nuntung raban orang ti diau di menua pesisir.

Sida tau mansik nama kebuah pengawa besekula agi tanggul ba raban nembiak bansa asal di menua pesisir? Nama kebuah sistem jalai enda ulih digaga ke pengelantang raban orang di menua pesisir baka ti seruran disemayaka bala menteri ngelama-lama tu? Sida tau nuliska pasal raban bansa asal ti diau di menua pesisir ti suah kena keruga raban samseng ti nyaga bala tukang tumbang ti begigaka kayu kampung.

Bala pemerita mega tau nulis pasal pemerinsa pendiau raban bansa asal di Sarawak, ari ti betusuika berita pasal Abdul Taib Mahmud, siku Kepala Menteri ti mengkang takut lalu mengkang ngetanka penuduk iya nyadi kepala menteri, laban takut enggaika sapa-sapa orang ti nukar iya jemah ila deka ngusaika semua but enggau pekasam iya!