Bala pangan dagang kunsi Taib di menua tasik ditemu bebendar amat nyaga pemanah nama Sarawak bekaul enggau pengawa ngulihka kayu kampong tauka program-program nanam kayu kampong.
Ba minggu nyin kemari Kepala Eksekutif kompeni Ta Ann Tasmania, David Ridley, bisi didinga bebula sebengkah repot ti ngayanka kayu sayat ti dikeluarka Ta Ann nya ukai kayu bansa “eco-wood”.
David Ridley bepenemu, di Sarawak, kompeni Ta Ann betebangka kampong ti kala ditebang lebih ari sekali ulih Taib enggau kaban belayan iya. Ba penemu Ridley, enti kampong nya suah ditebang, nya nadai pulai ke penanggul.
Kami bisi udah ngayanka repot pasal 30% share dalam Grand Perfect, iya nya kompeni ti bejalaika projek kebun nanam kayu acacia ti pemadu besai ba kandang menua China Selatan Asia, ti udah ngeruga tanah adat bansa asal ti pemadu besai. Angka David Ridley ulih madah ke kitai berapa agih kebun nya dikemataka boss iya, Hamed Sepawi sekali ke nengah Ta Ann tau ke Grand Perfect?
Kitai patut nerima pengamat penerang ti madahka semina 5% aja kampong bungas agi tinggal di Sarawak, lalu bala tukang tumbang di bekerejaka Taib endang seruran beduan bala Penan ti mengkang ngetan ke nya. Enti kitai beratika jaku Ridley, SEMUA kampong di menua Sarawak tu udah diempu Ta Ann!
Diatu udah salah maya Ridley mansut ke penerang nya laban menua Holland diatu udah ngamatka penemu raban NGO Greenpeace ti mantah chara menua Malaysia ngeluarka sijil nya jauh baruh ari standard dunya, lalu pengawa ngeluarka kayu ramu di Malaysia enda tau dikumbai manah tauka meruan!
Reti nya perintah menua Holland udah enggai agi nerima semua bansa kayu ramu taja pan dikemendarka nengah skim Malaysia Timber Certification (MTCS).
Paul Harriss enggau pemansang kaul Tasmania enggau menua Sarawak
Dalam ‘perati’ iya ngarika kompeni Ta Ann, Ridley bisi mai kaban parlimen ti ngatika diri ari sitak Huon Valley, Paul Harriss ngambika bisi nambahka penerang pasal pemanah pengawa Ta Ann di Sarawak.
Paul Harriss bisi ditemu nemuai ke menua Sarawak lebih kurang tiga kali. Taun nyin kemari iya bisi ditemu datai ke Sarawak nyereta David Ridley ti nemuai meda sebengkah kilang Ta Ann.
Surat berita The Borneo Post (ti dikemataka Taib) madahka penemuai Harriss nya “sebengkah penemuai ti betuju ari Perintah Menua Tasmania”! Tang di menua iya empu di Tasmania, Harriss madahka pejalai iya ke Sarawak nya sebengkah penemuai “makai angin” lalu semua ungkus pejalai iya dipelanja iya empu!
Ba penemuai nya Harriss bisi digambar surat berita The Borneo Post benung berandau enggau dua iku orang kuat Taib iya nya Kepala Opis Kampung Len Talif Salleh enggau Menteri Pengeraja Asal Sarawak Awang Tengah. Enda lama udah nya Awang Tengah bisi ditemu nemuai ke Tasmania laban nanggam sempekat enggau Hydro-Tasmania ngaga tekat-tekat hidro-elektrik.
Repot surat berita The Borneo Post nya udah berupai bendar bebida entara jaku puji ari Harriss ngagai Ta Ann lalu mantah bala orang NGO ti nyuikung pemanah rampa menua ti udah kala ngayanka pemula “eco-wood” kompeni nya.
Sarawak Report minta penetap ari Harriss, enti penemuai iya nya dipelanja iya empu, tauka pejalai iya nya endang pejalai pengawa perintah, baka ti ditusui The Borneo Post? Enti pejalai nya makai angin, patut tauka enda iya ngulu sebengkah aum perintah enggau perintah menua Sarawak?
Sekumbang bala pemacha nganti saut ari Harriss pasal pejalai iya ke Sarawak, kami ba Sarawak Report tu enggai enda nangkan bala pemacha kami, penemuai Harriss nya endang bekaul enggau pengawa dagang ngati ke diri sereta dikena meresi nama kompeni Ta Ann, ukai penemuai perintah.