Berita enggau pengirau orang pasal penyalah makai suap ti bekaul enggau pengawa ngulihka kayu dikaitka enggau Kepala Menteri Sarawak diatu udah ngerekai ngagai menua UK.
Minggu siti nyin kemari nama iya udah disebut ba dewan tinggi dalam parlimen UK, udah bekau siti jaku tanya nuju perintah UK sekali ke sebengkah pansik pasal pemalat penusah ari pengawa ngulihka kayu kampung nuntung orang bansa asal ti beridup ba isi rampa menua, nyengkaum utai tumbuh enggau jelu siga ti diau dalam kampung-kampung ti kena keruga nya.
Bisi sama enggau baum dalam parlimen maya jaku tanya nya dipansutka nya siku ari menteri perintah ti nguasa Opis Pengawa Pemansang Entarabansa. Baroness, tauka Menteri nya nyaut, Perintah UK endang udah nemu pasal penanggul ti datai ari pengawa ngulihka kayu enggau enda besekat, tauka betagang nya. Pengawa ti baka nya balat nuntung bejuta-juta mensia di dunya tu, ku Baroness Verma.
Siku ari bala pekereja kempen ti ngemataka pemanah rampa menua Kampung Ujan Tropik udah mansutka jaku tanya bekaul enggau Abdul Taib Mahmud enggau pengawa iya ti mai penusah ngagai orang di Sarawak. Ku iya bediri, lalu nanya:
“Bisi tauka nadai perintah kitai tu deka nitihka atur ti benung dipejalaika perintah-perintah menua Switzerland enggau Germany mansik penyalah ngulihka duit enggau chara ti salah ti dikereja kepala menteri Sarawak di menua Malaysia? Nama atur dikena nagang pengerusak ti dibai kompeni-kompeni kayu batang entarabansa nya, awakka pengawa ngulihka kayu kampung manah sereta betul agi dikereja.
Baroness nya nimbal jaku tanya ti madahka iya enda ulih nyemetak nyebut nama orang siku-siku, tang semua atur endang benung dipejalaika dikena nagang pengawa salah ba ngulihka kayu kampung
“Ditu aku madahka, perintah kitai (UK tu) endang seruran beratika penusah-penusah ti nuntung semua orang ari pengawa salah ngulihka kayu kampung. Semua kompeni besai-besai entarabansa ti bekaul enggau pengawa nya deka diukum enggau berat.”
Reta-tengkira Taib di menua UK
Randau dalam dewan parlimen UK nya udah mai sebengkah ‘tangkan’ ngagai Kepala Menteri enggau sida sebilik ti bisi ngembuan pengeraja ti mayuh bendar di menua UK. Bala pekereja kempen ngelaban industri kayu kampung chara ti salah udah ngansak mayuh pansik dipejalaika di Switzerland enggau di Germany.
Ba minggu nyin kemari mega, perintah menua Canada bisi madahka sida endang udah nemu pasal pengeraja Taib sebilik ti bejuta-juta dollar di menua Amerika Utara. Taja pan baka nya, naka ke diatu, perintah Canada bedau deka ngamatka tauka bebula sebarang pansik ti dipejalaika.
Tabung Bruno Manser bisi madahka diri deka meri ripot ngagai perintah UK dikena ngansak sida bejalaika pansik ba reta Ridgeford di London, sebengkah kompeni ti nyimpan pengeraja bejuta-juta pound, nyengkaum sebuah rumah ti besemak enggau Bank of England.
Deka lubah agi dikangauka ngagai sebarang pengerami ila?
Dalam taun nyin kemari Kepala Menteri udah ngemunka sebengkah pengerami ba House of Lords ba penemuai iya ke UK dikena iya ngelakuka Tanjung Manis Halal Hub. Iya mega bisi ditemu melanja sebengkah pengerami ba Said Business School ba Oxford University, ti endur iya nya temuai ti bepeluang bejaku. Kedua-dua pengerami nya udah nerima jaku bantah mayuh bengkah orang, belalauka rekod-rekod jai Kepala Menteri, lalu iya tentu enda agi disambut sechara besai-besai agi ba maya ti deka datai.