Tuai UMNO pampang Sri gading Datuk Abdul Aziz Kaprawi madahka Allah udah ngasuh raban orang Islam patut nurutka peneka bala tuai sida, tang raban bansa Judah enggau bansa orang kiulit burak seruran nguji deka ngemuntanka asuh Allah nya.
“Ku Allah, titihka peneka Allah, bala nabi kita enggau tuai kita ti udah diberi kuasa ari raban kita empu. Tuai kita nya Najib, nya kebuah aku tu nyaga iya.
“Tang enti bisi bala orang ti di baruh tuai kitai tu enggai mendingka jaku bala tuai, sida deka agi ningaka utai ti ditusui bansa Judah, orang kulit burak, WSJ enggau Sarawak Report, nama penyadi ba raban orang Islam ila?
“Raban orang Islam tentu deka runtuh,” ku jaku iya lebuh aum besai ninting taun pampang parti nya di Parit Raja, Johor, sehari tu tadi.
Aziz, ti mega nyadi sapit menteri pekara pengangkut, ngansak raban bansa Melayu enda mudah tama panjuk orang Judah enggau orang putih ti balat naburka cerita “bula” sida nengah Sarawak Report di London enggau WSJ di New York.
“Kitai deka nanya, nama tuju bansa Judah enggau orang putih ari London enggau New York, ti balat betenahka tuai kitai?
“Aku bisi bendar pengarap ke tuju sida nya endang dikena ngerusak raban orang Islam, raban bansa Melayu di Malaysia tu.”
Kenu ku iya media menua Barat mega besaum penemu jai enggau parti penyakal DAP dikena sida ngerampas kuasa orang Melayu.
“Anang mudah tama panjuk media ari menua Barat. Sida bisi tuju sida empu, sida bekerejasama enggau parti DAP dikena sida ngalahka kitai ba bepilihbesai ke-14 tu ila.
Aziz patut madahka kitai nama kebuah Malaysia minta merintah diri nyadika sebuah menua bedemokrasi lalu nama kebuah bepilihbesai patut diatur?
Tentu semua pekara tu tau ngasuh Allah ringat, enti munyi ku ajar iya?
Tambah mega, tanggungpengawa dalam jalai pengarap tiap iku nya taluk ke sapa ti nyadi tuai (enda ngira baka ni iya ngulihka penuduk nya) lalu nadai sapa tau betalatka nya, nya kebuah bepilihbesai nya nunjukka sesebengkah pekara ti enda menuku.
Tinjau Aziz pasal menua Malaysia nya bebida ari tinjau komuniti entarabansa. Kelimpah ari pemayuh-mayuh orang bansa Judah, nadai mayuh sida nya ngelala orang ti bebansa Melayu, tang Aziz bisi bendar pengarap ke langgur ti jai orang Judah nya deka ngelemika bansa Melayu ti sebansa enggau iya.
Dalih-dalih pasal konspirasi nya enda mudah diterangka Aziz. Nama kebuah ‘bansa Judah’ enda tau enda ngupah ‘orang kulit burak’ ngelemika orang Melayu – nadai isu bukai ti balat ari nya ditapi sida kini?
Lalu baka ni artikel-artikel Sarawak Report nya ngembuan sebarang empas enti semua artikel nya bula memagang?
Iya ti bendar nya Najib empu udah ngelemika perintah ti betuaika iya empu enggau chara ngatur tindak ti udah ngujungka iya empu udah puntan.
Ti bendar mega, Najib nya siku tuai perintah ti ditemu udah ngupah ‘orang Judah’ ba pekara bank ti ngujungka Malaysia mayar yuran pengawa ti besai bendar ke pemindah duit ti nyelai ngarika iya.
Iya ke bendar mega, Aziz udah ngemalu raban bansa Melayu ti manah pendiau ngena jaku tuduh ti pansut ari runding iya suntuk, lalu majoriti bansa Melayu ti manah pendiau nya enda mendingka jaku ngerichau tuai baka Aziz nya.