Menteri ti baru dipaduka mangku pengawa Salleh Said Keruak udah ngansak raban penyakal ngambi ke belajar ari bala bakih sida di Britain lalu enda ngerachun runding rayat menua Malaysia ngayanka pengeringat diri tauka ngatur pengawa bejalai bebala mayuh di semanjai jalai di nengeri ti besai-besai.
Menteri Komunikasyen enggau multimedia nya nangkan raban penyakal bejalai bebala mayuh lalu ngaga penyarut deka ngerusak pengelikun orang mayuh.
Ba sebuah asil tulih dalam blog, Salleh Keruak madahka baka ni perintah Britain udah nyual 5.4 peratus ari sher-sher ti dipegai sida dalam Royal Bank Scotland (RBS) ba rega £3.30 siti sher, ti udah dibeli sida tujuh taun ke udah ba rega £5 siti sher.
Iya mai bala pemacha blog nya ngingatka baru baka ni perintah Britain udah tepejal nebus pulai RBS ari ti ditinggang utang dalam taun 2008 ba rega £45 billion, lalu meri awak ke dui twang turu ti murah dikena ngelempungka iya. Tang tujuh taun udah nya bedau ga duit puku nya ulih tepulai baka ti dikarapka.
Salleh madahka tindak ke diatu nya udah ngundang jaku bantah raban penyakal, ti madahka bank nya patut diempu perintah kelimpah ari ti diasuh bedagang ngati ke diri.
Raban penyakal, kenu ku Salleh, mega betanyaka pemutus perintah Britain ti deka madamka £1 billion dalam pengawa nyual sher nya.
‘Bala penyakal patut bisi tanggungpengawa’
“Kebuah aku ti nyungkak pekara tu awakka kita nemu semua pekara endang patut nyadi, taja pan ba menua ti endang lama udah maju sereta bisi penampak baka Britain. Lalu pengelenyau bebillion-billion pound mega udah ngerugi perintah Britain.
“Tang bala penyakal di Britain, taja pan sida mantah tauka nyakal tindak perintah, sida enda ngasuh rayat sida ngena chara ti kasar laban enggai ke perintah nagang ngena pengasar.
“Sida tetap enda setuju enggau perintah tang sida ulih meda pekara nya ba rampa ti besai agi enggau runding ti tuai agi,” ku iya.
Salleh Said Keruak madahka tu mih maya bala raban penyakal di Malaysia, ngembuah pendiau ti tuai agi lalu enda ngena pengasar ketegal bebida penemu enggau perintah ari ti mandangka diri ringat lalu bejalai bebala mayuh.
Menteri baru Salleh Said Keruak tu udah bebudi enggau Menteri Besai laban udah mantu iya suba ngerampas kuasa paarti iya empu, enda patut sekali-kali nangkan orang mayuh pasal reti demokrasi.
Salleh Said Keruak udah meranika ngenesatka penemu rayat Malaysia enggau ngumbai raban penyakal di Britain udah tuai agi runding ti endur sida ngemendarka orang angkat mantah sereta ngayanka diri ringat tang enggau chara ti chelap.
Angkat lalu ngayanka diri ringat nya udah sebau enggau demokrasi di Britain.
Ke pemilih sida ti penudi ti endur sida udah puntan ngayanka pengeringat diri di menua sida empu, sida udah ngayanka diri ringat di semanjai jalai di Britain ngambika pesan nya dikenataika ngagai perintah sida empu di menua din.
Belanja raban polis di Britain ti diasuh nyaga pengelikun bala orang ti ngayanka pengeringat diri nya besai bendar. Tang bala polis Britain endang ngelala raban orang ti ngayanka diri ringat enda ngelui ari pendiau ti udah ditetapka.
Ba ujung taun nyin kemari dia beribu-ribu iku nembiak udah angkat mantah atur bekelimat di mua rumah Parlimen, lalu raban ti mantah pasal pekara dalam Wall Street udah bekupan dalam pengelama bebulan-bulan di negeri London.
Ngemendarka rayat mayuh mantaika jaku enggau serebana sida nya endang reti demokrasi ti bnedar.
Ari ti nguji mandingka penyalah ba pengelenyau bebillion-billion dollar ari wang turu nya, pemujur nyual RHB (ti udah diselamatka ari terus labuh ba taun 2008), menteri tu mengkang ngumbai rayat Malaysia nya beli sereta tambap.
Sida patut ngamatka penerang ti madahka menteri tu udah saru penemu.