Najib Razak nadai mimitpan ngayanka pengirau ati diri ke penendu ulah iya ketegal ngereja penyalah-penyalah tu, tang dipeda seruran lantang ati ke ‘pemenang iya’, sama mega enggau Adenan Satem enggau semua tauke kompeni kayu ti taluk ngagai Taib Mahmud.
Nyerumba nya, pengari penyakal baka Elia Bit betanya-tanya baka ni BN seruran dipeda menang sekumbang pengawa ngitung undi dipejalaika … nyentuk ke peti undi ti penundi pan penuh laban keretas undi ngagai BN.
Engka nya kebuah NGO Bersih patut mansutka pengirau ati sida?
Bala NGO tu deka nemu nama kebuah pemayuh orang ti nurun ngundi sepemanjai hari nya mimit, tang udah nya enda mukai-mukai engkechit ari 52% lebuh pengawa muai undi tembu lemai nya ngagai 70% lebih jaku gerah dipansutka ba tengah malam nya.
Pajakka Najib … lalu anang enda ingat mayar bonus bala pemesai SPR ti udah disemayaka nuan. Nyerumba nya mega dunya enggau Malaysia mengkang enggai arapka seleka ari jaku nuan nya.
Bala parti penyakal seruran bekelikuhka kerusi lalu sida patut disalahka laban enda ulih nguasa kelikuh enggau talat sida nya. Tang ari ketegal tuai sida, Anwar Ibrahim ti udah ditutup dalam rumah pasung, ketegal didawa Najib.
Raban media pan baka nya mega. Berita panas semanjai kimpin tu, nya pengawa meli undi, ngubah sempadan kerusi baru dikena ngulihka pemenang, enggau ti bukai.
Tang nengah media ti semina dikemendarka di Malaysia, berita pengawa bepilihbesai nya dipeda beresi, tulin, lalu nadai pengawa nipu dikereja sapa-sapa ari BN.
Ba pengujung minggu bepilihbesai, kitai tetemuka siku pengarang berita ari menua tasik ti udah narit perati orang mayuh.
Pengarang berita ke Channel 4 ari menua UK udah mujur ngaga repot pasal pejalai bepilihbesai lalu semak deka nembuka berita lalu lebuh sida deka nemu pasal pemutus nya nyerumba betanyaka berita pasal skandal Makai suap dalam 1MDB, ti endang disadang nyadika pun penatai belanja dikena bebelika undi, sida lalu diburu pansut ninggalka endur nya.
Utang 1MDB ti benung kena tagih ba penyampau bebillion-billion dollar deka mansau kena hari Tiga 11hb Mei tu ila. 1MDB mengkang madahka sida enda mayar utang nya enggau cara beprinsip, tang ke bendar iya sida endang enda ulih mayar utang nya.
Nyerumba nya raban penerit undang-undang Singapura benung ngeluit bala pemesai BSI pasal baka ni sida mindahka bebilllion-billion dollar duit Najib ari akaun sida di Hong Kong udah tembu bepilihbesai ke-13 nyin kemari.
Udah nya Malaysia tentu deka napi dua iti pengawa bepilihmit udah bekau pemati dua iku MP ari parti UMNO ba penusah helicopter terempas maya kimpin PRN Sarawak tu tadi. Kedua buah kerusi nya enggi perintah besai – lalu udah tentu Najib enda ulih nagang raban penyakal ngatur kimpin sida ba dua iti kerusi nya.
Tauka, sekali ke Najib deka ngereja utai nya? Sekali ke iya deka ngantung dulu pengawa bepilihmit ngena sekeda kedalih, tauka engka sida agi berundingka deka nempa cherita pasal serang raban penyelawai. Nadai siku ulih nyangka nama runding ari Najib ti udah balat dipalit pengamah enggau bala bakih iya.