Datai ke sehari tu kitai nadai ninga sebarang cherita ari raban penerit undang-undang pekara bank Australia, tauka ari opis lawyer bansa tauka ari bala orang politik sida pasal akaun bank ti nyelai-nyelai Najib Razak ti ngundan duit bebillion-billion dollar nya, ti dikemataka bank ANZ enggi AmBank KL.
Berebak enggau raban penerit undang-undang di serata dunya ti udah didinga madahka diri benung mansik skandal ti nyelai bendar tu ti endur mayuh ari bala pemesai bank udah napi pansik enggau tanya bala penerit undang-undang Switzerland, US enggau Singapura, tang perintah Australia agi mengkang enda engkeretik.
Baka nya mega Australia mengkang nadai didinga udah ngambi sebarang tindak ba asil pansik atas skandal ti balat nyelai nya.
Sarawak Report diatu udah bulih enggau chara beresia, di belakang tabir endur bala pemesai ti baru bekereja dalam AmBank KL udah ditekankan salah lalu dibuai ari pengawa taun nyin kemari, udah bekau Sarawak Report mantaika pasal sekeda akaun ti ngundan bebillion-billion dollar dalam AmBank.
Tu nyengkaum dua iku Pengurus Hubungan Senior enggau sekeda staf ti baru bekereja ba bank nya.
Ketegal ari ti tebilang baka ANZ enggau bala penerit undang-undang di belakang sida, sida patut ngelala penyalah lalu enda patut ngelepaskan sebarang bank, ti besalah bala pengereja pengawa ari ketegal ngemataka sekeda akaun beprofil tinggi, orang politik tauka enggi Menteri Besai siti-siti menua?
Bank ANZ ari Australia ti nyadika penegai sher pemadu besai dalam AmBank, ti endur Najib nyimpan akaun ti nyelai, ditemu nyimpan beratus-juta dollar enggau bebillion-billion ringgit.
Bisi sekeda ari pun penatai duit simpan nya ditemu datai ari wang turu sekim orang penchen KWAP, ti diinjau SRC ti nyadika akan kompeni 1MDB. Duit tunai nya dipindahka pansut ari SRC lalu masuk terus ngagai akaun Najib ba AmBank, nitihka pansik bala penerit undang-undang – dikena melanja sekeda kad kredit Najib sereta dikena mayar upah bala penyukung politik ke Najib Razak.
Terang bendar ba kitai mayuh, Najib diatu ngaku semua tuduh di atas nya.
Dalih Najib, munyi ti dipansutka Lawyer Bansa ti dipaduka iya ba bulan nyin kemari, Najib enda nemu semua duit nya tau tama ke dalam akaun iya nya datai ari SRC.
Tang Najib udah ditemu melanjaka sekeda ari duit nya! Tang Lawyer Bansa Apandi Ali udah bebendar nguji ngelamun tai mayau lalu meresi nama Najib – ti diatu benung dibantah sereta dichabar gerempung Lawyer Malaysia enggau gerempung ti bukai.
Bala pemerati pengerembai skandal tu di Malaysia enggau mega di Australia udah belabuh betanya-tanya, nama pekara ti udah dikereja AmBank bekaul enggau penerang tu? Laban ke bendar nya bala pemesai dalam ANZ endang udah nemu pasal semua akaun tu, ti semina ditemu orang mayuh di Malaysia kenyau ari bulan Julai nyin kemari.
Bala pemerati madahka enti Najib udah melanjaka duit orang mayuh ti enda ditemu iya tama ngagai akaun iya, ari nya sebarang bank patut nangkan iya … laban bala pemesai dalam bank nya patut dipadahka pasal pemayuh duit nya, nentu-nukuka pun penatai duit nya lalu nujuka mayuh bengkah jaku tanya ngagai orang ti megai akaun ba utai ti benung nyadi nya?
Dini endur penyaru runding AmBank/ANZ ti madahka semua utai tu enda nyadi?
AmBank nya diempu ANZ, ti siti ari sempekat enggau anak kompeni sida di KL, nyali semua pemesai sida ngagai AmBank. Sarawak Report udah nusui pasal CEO engga CFO AmBank nya diinjau ari ANZ Australia. CFO sida nya mengkang ba pengawa iya, taja pan udah ditemu bisi bekaul enggau pengawa pemindah duit beratus juta dollar ke dalam akaun Najib Razak.
Taja pan baka nya, CEO dalam AmBank Group nya udah pulai ke menua iya di Australia ba bulan April taun nyin kemari, sebelum timpuh bekereja iya tamat lalu nyau ka besenutuk enggau pengudah cherita skandal 1MDB/PetroSaudi dipansutka Sarawak Report.
Tang ANZ madahka pemutus penemu Ashok Ramamurthy ti badu bekereja ba AmBank di KL lalu pulai ke Australia nya nadai bekaul enggau skandal nya, lalu iya bisi ketegal iya empu. Nyerumba nya, ANZ nadai nyebut pekara bukai bekaul enggau ukum ti dikenaka Bank Negara Malaysia nya.
Lalu naa kebuah sekeda bala pemesai ti bukai nya, ti nemu pekara ba akaun tu, mengkang bekereja dalam bank nya, tang bala pemesai ti agi biak sereta baru bekereja kena buai ari pengawa sida?
Bisi sekeda ari sida ti pemesai ti mengkang bekereja nya, mengkang nerima gaji ti chukup besai dalam bank nya, ngemataka akaun Najib Razak. Sida nya nyengkaum CEO ke dulu suba, Mike Smith, ti udah ngetu bekereja dalam bulan September taun nyin kemari.
Mike Smith udah ngetu bekereja sereta skandal ti bekaul enggau bank nya ditemu nyadi. Tang orang ti nganti penuduk iya, CFO ke dulu suba, Shayne Elliot, endang nadai ngereja sebarang utai pasal kaul bank sida nya.
Bisi siku agi pemesai sida ti bekereja nagang sebarang pengawa salah ti ditemu bisi ngaul sebarang orang politik ba bank sida. Iya nya siku peranak menua Britain, Nigel Denby, ti nyadi Tuai Pemesai Risiko AmBank, ti bisi opis di Hong Kong – mega diinjau ari ANZ.
Nigel Denby baka ti enda ibuhka pasal penyelai angka dalam akaun ti datai ari KL. Iya mega nadai neripotka sebarang angka ti nyelai ngagai bos iya, Mike Smith.
Nyerumba nya, nama pengawa ti udah dikereja Mike Smith empu nyentu ke iya tau enda nemu utai ti dikereja Tuai Pemesai Risiko enggau akaun ti nyelai-nyelai nya?
Diatu raban penerit undang-undang pekara bank arapka tindak ti patut ba skandal nya bisi kaul enggau skandal politik ti nyelai di Malaysia nya.
Sekali ke Australia nya semina ngelanggur enda ibuhka skandal nya (kelimpanh ari ti ngelalaika Sirul) lalu nganti cherita ti tau meri malu nya lenyau baka nya aja?