Kaban politik ari parti DAP, Tony Pua, udah nekanka siti isu ti benung ngerembai ba orang mayuh diatu, ti nunjukka mayuh duit benung dipindahka pansut ari wang turu, sama sebaka enggau utai ti dikereja ba 1MDB.
Sama baka pengelenyau duit ari 1MDB ti udah masuk mayuh macham dagang ti enda tentu dikelala ti udah puntan ngeluarka repot kira-kira ti meruan lalu udah nya napi pengerugi ti besai, wang turu FELDA udah lenyau bebillion-billion ringgit kenyau ari empat lima taunt u – semua penanggul nya dikemataka Menteri Pekara Wang Malaysia Najib Razak.
Nama, ku tanya Pua, utai ti udah nyadi?
Bala pemansik udah madahka ngagai Sarawak Report nya perengka dagang FELDA iya nya FELDA Global Ventures (FGV) diatu udah ditinggang pengerugi sereta suntuk laban lenyau bebillion-billion dikena bebelika sekeda asset ba rega ti kelalu tinggi, ti dipelabaka dikena nugungka pengaya sekeda orang, ngena duit simpan bala orang kebun, nyengkaum bepuluh ribu iku orang kebun ti udah dipejal beranakka puku dagang enggau perintah.
Chara enggau ulah bebelanja ti kelalu ngerua FGV ulih tau dipeda dalam rekod orang mayuh, baka ti udah diperesa Tony Pua ba aum media iya sehari tu.
Tu mai reti nya bala orang kebun ti bepanggai ba rega duit simpan sida nya diatu udah dirumpak nyentuk ke 66% ari semua duit ulih sida, ba mayuh agi pengawa dagang ti mai pengerugi.
Tony Pua madahka semua duit ti didagangka nya udah mayuh bendar lenyau baka nya aja. Utai ti balat ngasuh orang mayuh irai ati nya ba dagang kunsi enggau sekeda kompeni ti enda dikelala ti endur bala pengurus FGV enggau enda berunding panjai sereta jauh timpai melanjaka bebillion-billion ringgit ti dipejalaika ngarika bala orang kebun ti mit-mit.
Ari ti enda terit atur ba pengawa ngemataka pengawa dagangkunsi ti dipasuk nya, dia mayuh bendar duit udah dibubuhka ngagai sekeda kompeni ti bedau ditemu tentu mujur meri untung, laban tuju ti bendar bala pengurus nya endang semina deka ngulihka untung diri empu aja.
Pemutus runding beranakka puku dagang UD$680 juta nya nyadika sebengkah tindak ti bisi bekaul enggau sebuah kompeni lading Eagle High Plantations ari menua Indonesia enggi Peter Sondakh, siku kroni Najib, dibeli ba rega tiga kali lipat.
Rega sher FELDA udah jauh bendar kusut ba empat lima taun tu, tang bala pengurus sida ti udah nerima gaji ti kelalu tinggi ngelama tu udah mujur nabanka duit beratus-ratus juta ringgit dalam kuchik sida!
Lalu sapa agi ti deka bulih untung ari pemutus runding nya – seninjik bendar bala pengurus enggau pengarah dalam FELDA nya bala orang ari UMNO lalu bisi kaul ti rapat enggau Najib seduai bini iya Rosmah Mansor.
Kwlimpah ari ti dikemataka raban orang ti endang ngemeranka pengawa dagang, FELDA diatu semina dikemataka bala orang politik enggau bala orang ti kereja perintah ti udah bekereja ba opis menteri besai.
Sama enggau utai ti dikereja dalam 1MDB, pemutus penemu ba FELDA enggau sekeda anak kompeni sida dikemataka Menteri Besai/Menteri Pekara Wang ti endang lama udah ngemeran juluk ati deka merah asil penatai pemisi orang mayuh ti nyimpan duit ke sida empu lalu nabanka duit sida nya ngagai menua tasik.
Pengawa meli ladang Eagle High Plantations ari menua Indonesia nya udah diketuka dulu, terima kasih ke sada nyawa bantah orang mayuh, ti endur FGV diatu udah besetuju deka mayar nya ke kompeni nya.
Bala pengurus FGV udah gaga bendar ati nginjau duit – agi mega orang ti bekebun nya ti mayar utang nya kelimpah ari bala pengurus nya ti bisi kaul enggai kompeni ladang semina duduk ngemataka pemasuk duit tama ke dalam akaun bank sida.
Tang taja pan pengawa dagangkunsi enggau kompeni Eagle High Plantations nya udah ditangguhka dulu, FGV mengkang ditanggam mayar pulai duit penulu dagangkunsi nya ba penyampau US$170 juta ti enda ulih dibatak pulai.
Enggau ulah bala pengurus FGV ti kempang ati bebasauka duit simpan bala orang kebun, nama agi utai dikarapka sida ari duit simpan sida nya ti endang datai ari ttik peluh sida empu nya?
Saut ke tanya nya, nadai
Ke bendar iya ba sekeda menua ti diperintah enggau meruan sereta menyana, pemuntan bala pengurus enggau tuai menua bejalaika tanggungpengawa sida deka dituduh, didawa ketegal kurang beduli ba pengawa.
Pua mega nunjukka langgur FGV ke diatu, ti deka bedagangkunsi enggau sebuah kompeni ari China ba pengawa ladang nanam kachang tanah di direjista di Cayman Islands.
Tang kompeni ari menua China nua, nitihka pansik Tony Pua nya, mengkang bedau ngeluarka repot audit sida kenyau ari taun 2013 suba!
Ba kes 1MDB, terang bendar baka ni duit orang mayuh ti diinjau nya dipasukka ngagai sekeda akaun bala kroni enggau kompeni ti dipilih, enggau akaun bank ti bisi kaul enggau Najib.
Chura endang udah ditetapka baka nya lalu semina siku lelaki (enggau bini iya) ti deka nguasa semua pengawa ti dipejalaika di menua Malaysia, terima kasih ke sistem parti beklien enggau kuasa ti bepusat ba jari siku tuai menua.
Enti Najib enda deka begunaka dagangkunsi ti ditemu tau mai pengerugi nya, penanggul nya tentu enda nyadi.
Utai ti ngeruga runding sereta ngemba orang Malaysia diatu nya baka ni penyalah ngerumpak duit ari wang turu ti dikereja raban pemesai dalam perintah ti endang diberi tanggungpengawa ngemataka wang turu nya.
Utai ti terang bendar diatu, 1MDB udah dikena melanja kempen bepilihbesai nya dituntung penanggul ti ngasuh irau ati, ti udah dikereja Menteri Besai ti mega nyadi Menteri Pekara Wang menua Malaysia, Mohd Najib Razak.