Udah iya muai, nukar sereta nangkap sekeda ari bala bakih iya dalam kabinet, rayat Malaysia empu enggau mega sekeda bala pemesai perintah beberapa hari tu dia Menteri Besai Malaysia udah nempaka nama siku blogger indu orang putih nyadika pengeruga pemadu jai ngagai menua Malaysia.
Baka ni Najib ngereja semua utai tu?
Lalu kala enda kini Menteri Besai nya ngayanka chura diri empu enggau mansutka ulah enggau pendiau iya ti bebagi bansa enggau bebagi jalai pengarap – enggau chara nyerang sida semua, ti udah dianjung iya belajar ke menua tasik (baka iya empu mega) di UK?
Lalu dalam iya milih lalu nyerang blog tu ketegal ti diempu “orang putih” ari “menua tasik” tang iya nadai irau ke diri ngupah “orang putih” baka sida Paul Stadlen ngena duit menua ti mayuh bendar, enggau mega bala bakih Paul ti “orang putih” nya nuliska penerang media pasal ubah dalam kabinet iya minggu nyin kemari.
Ke terubah suba Paul Stadlen bekereja ke Najib nyadi Kepala sebuah kompeni PR US/Israel APCO – tang nama kebuah Najib bependiau hipokrit ti enda mukai-mukai deka ngelaban “orang menua tasik bekulit burak”?
Isu tauka pekara ti benung angat nyadika buah kenang orang mayuh diatu nya pasal pansik atas penyalah makai suap ti besai enggau mega pengawa enchuri duit menua ari wang turu menua 1MDB.
Isu nya mega bisi kaul enggau penyampau duit menua ti mayuh bendar ti udah dipasukka ngagai akaun Menteri Besai nya empu.
Lalu endang disadang mega guna sebagi ari pemayuh duit nya dikena nentuka pemenang ba pemutus bepilihbesai ti deka ditapi UMNO-BN ti deka datai ila.
Sarawak Report nya sebuah ari mayuh bengkah portal berita internet ti benung chakah mansik sereta nuliska repot pansik sida ba isu enggau penanggul tu, tang nama kebuah semina blog tu aja ti dikumbai nyadika “munsuh menua” enti dibandingkla enggau mayuh agi portal ti bukai ti semina ngauk-ngauk cherita ti dikeluarka kami tu?
Nama kebuah semina kami aja ti dituduh chakah ngiga chara “deka numbangka perintah ti udah dipilih ngena chara enggau atur demokrasi” enti dibandingka engga sida ti endang chakap nipu sereta ngelakar maya bepilihbesai ngena duit ari wang turu ti diinjau ari menua tasik ketegal deka menang lalu numbuhka perintah?
Patut tauka enda menua Malaysia, ti endur beberapa iti artikel ti ditulis siku indu ari menua tasik ti bekulit burak, ulih ngelemika kuasa sesebengkah menua?
Ke bendar nya, utai ti ngelemika perintah menua Malaysia diatu lalu nguji deka numbangka kuasa perintah nya endang penyalah makai suap ti enda ulih ditagang agi, ti lama bendar udah nyadi riman dalam moral perintah ari dalam.
Tu mih Menteri Besai ti nyebut sehari tu “aku semina begunaka orang ti taluk aja, bebanding enggau orang ti pintar” – siti ambu ti ngemalu diri ti pansut ari siku tuai menua.
Najib udah enggau chara tebuka ngaku kriteria iya milih orang ti tau bekereja enggau iya nya ari raban orang ti ulih ngelindung iya, kelimpah ari orang bukai di Malaysia.
Engka tu mih kebuah blog tu berasai kebal laban iya dilindung undang-undang enggau atur bebas nusui berita ba sebengkah menua ti digela Najib nya tau nganu?
Tauka, sekali ke Najib enda ulih beduan kami baka ti suah dikereja iya ba sebarang orang politik menua iya empu, bala pemesai-pemesai dalam opis perintah enggau rayat rama di menua iya empu, mayuh ari sida nya udah ditangkap ba minggu tu, semina ketegal sida nyungkit isu penyalah enchuri duit bebillion-billion ringgit ari wang turu 1MDB?
Engla Najib enda berasai nunjukka pengelemi diri ti nyadika siku tuai menua ti endang ngengkahka jari iya ba mayuh bengkah opis menteri ti dijaga iya, ti endur iya besalahka siku indu orang putih ari menua tasik, ti diau beratus ribu kilometre ari Malaysia lalu nadai sebarang pengaruh ti patut ulih ngeruga menua nya.
Baka Sarawak Report taun ngachau pengelikun di Malaysia – enti ukai Najib empu ti udah salah ba atur pengawa lalu labuh ngagai darung makai suap ti meri malu ke iya empu?
Salahguna kuasa ti benung dikereja Najib diatu nya iya udah masuk champur pengawa atur pengarap Islam di Opis Menteri Besai ti betuaika iya empu – JAKIM.
Jaku ajar lebuh sembayang ti nyadika peduman enggau lalau raban orang Islam di Malaysia udah balat bendar dicampurka enggau pekara politik ulih JAKIM, ti diatu diasuh ngemataka semua jaku ajar di mesejid enggau surau ti dibacha tiap minggu di serata menua Malaysia.
Reti nya Menteri Besai ti ngembuan penemu pengarap sekularis nya udah masuk champur dalam pengawa bala guru pengarap enggau tuai-tuai pengarap di menua Malaysia.
Lalu kena ke hari Lima tu tadi iya udah nyalahguna kuasa iya endur iya meri tangkan ngagai semua mesejid di serata menua Malaysia dikena iya ngelaban “kuasa ari menua tasik” ti kenu ku iya udah balat bendar “ngeleseka” menua Malaysia enggau bala tuai perintah iya.
Sebarang sapa orang Islam ti ditemu nguji deka nyungkit sebarang utai ti bekaul enggau 1MDB, nitihka jaku ajar ari opis JAKIM, deka nyadika sida tauk “tusah laban menua tasik” munyi ti dituliska dalam Channel News Asia ari menua Singapura kemari.
Sarawak Report meratika chara ti dikena Menteri Besai nya nulak pengasai ba jalai pengarap ti enda bepelasar ngagai orang ti enda besalah baka UMNO empu, laban Najib udah nadai agi chara nimbal jaku tuduh kami enggau ngena sebarang undang-undang ti bisi dikembuan iya, enti semua semua repot kami nya enda betul.
Kelimpah ari ti nyaman kami iya udah nyebut nama kami dalam tiap jaku ajar maya sembiang hari Lima orang Islam ti nyadika atur pengawa ti pemadu nadai betanggungpengawa dikena iya ngengkahka kami tu raban orang ari menua tasik pemadu jai ke rayat iya.
Pengarap Islam nya bisi kuasa ngutuk sebarang penyalah bekaul enggau ngenchuri, mansutka pemenchi enggau ngelimpangka pengelurus, lalu Islam mega enda semina begunaka sebarang “indu orang putih ari menua tasik” ngengkahka bala orang ti ditemu salah ba moral enggau ba undang-undang di Malaysia.
Tu mih nyadi isu ti benung diperesa raban penerit undang-undang di Malaysia diatu.
Penerang ti madahka Najib nya dipeda tepejal sereta tepansar meri timbal jaku enggau chara nangkap, muai pengawa lalu nukar semua orang, ti udah chakah nguji ngemetulka pekara tu ti endang nyadika tanggungpengawa ti ulih dilempaika mata-mata ba bauk Sarawak Report.