Berita sebubu ngapa madahka Menteri Besai enda lama agi deka mantaika penerang pasal ‘pemeri murah ati ari Timur Tengah’ resia US$680 juta ti disimpanka ngagai akaun iya kejang deka napi pengawa bepilihbesai nyin kemari.
Sapit PM ti mega nyadika Sapit Presiden dalam parti UMNO enda nemu kuing pasal penatai duit nya, tang antu banggar Najib madahka duit nya dikena melanja pengawa kimpin ba bepilihbesai – lalu duit nya “ukai ke guna iya empu”.
Enti parti UMNO nya dipejalaika enggau betul sereta meruaan, semuaduit tukung enggau duit pemeri ke dalam parti tentu deka direkod enggau silik.
Penampak nya nyadika kaling pengamat lalu enti Najib endang enda salah dalam jaku tuduh tu, iya enggau orang ti meri iya duit ngemayuh nya patut beterus terang – orang mayuh patut diterangka pasal pemasuk duit pemeri tu lalu kitai deka pechaya ke siku tuai menua ti tebilang enggau ensera ti seruran bebali-bali.
‘Pemeri’, patut ngamatka diri nya endang orang ti bempu akaun ke Tanore Finance Corporation (BVI) di bank Falcon ti bisi pampang opis sida di Singapura dalam bulan Mach 2013.
Tu mih ti tau diperesa raban penerit undang-undang pekara bank, lalu tindak pemadu manah nya, anang mantaika pemula.
‘Pemeri’ nya mega enggau sekeda bank baka Wells Fargo patut meri penrang ti beguna pasal ‘pemeri’ enggau penerima duit ti agi mengkang ba surat-surat penerang duit nya, ti ke bendar nya dikumbai “bayar”.
Enti sida bank ke bisi kaul nya, nyengkaum Wells Fargo, puntan ngulihka lalu ngerejista penerang tu, sida iya tau dikumbai bepekat-pekat dalam penyalah ngubah duit – ba penyampau ti kelalu mayuh.
Ke beguna agi, enda tau nadai penampak ba pengawa 1MDB ngangkat duit nya lalu wang turu Aabar, dipeda baa ti senutuk enggau ‘pemeri’ 2013 ti udu nyelai lalu enda besukung ke penerang nya.
‘Dagangkunsi bestrategi’ 1MDB ti ditanggam enggau Aabar kena 12hb Mach nya udah ngujungka sebengkah bon US$3 billion diangkatka semina dua hari sebedau US$680 juta dipasukka ngagai akaun Najib Razak.
Enti kedua-dua iti pemindah duit ti kelalu mayuh nya sesebengkah, nama kebuah penerang pemindah duit nya enda dipadahka?
Al-Husseiny (atas) madahka iya udah melanja wang ti digaga anak tiri Najib, Riza Aziz. Tu nyadika jaku ambu ti udu nyelai dipansutka siku orang kereja perintah lalu penerang iya nya nadai disukung sebarang penerang.
Tu mih sekeda isu ti patut diputarka ngena penanmpak.
Akaun pengawa dagang 1MDB ti dikemataka dalam timpuh nya ditaga ba taun bepengabis bulan Mach 2014.
Nitihka repot ari Delloite, akaun nya kurang ba penerang, tang sida ulih ngamatka US$3 billion ti udah diangkatka anak kompeni 1MDB iya nya Global Investments nyadika ‘penih puku dagang’ ke projek dagang kunsi enggau Aabar ti benama Abu Dhabi Malaysia Investments Company (ADMIC).
Tu mih pemeri ari piak Malaysia ngagai ‘dagangkunsi bestrategi’ ti ditanggam kena 12hb Mach 2013 entara 1MDB enggau Aabar dikena sida ngemansangka projek ‘Tun Razak Exchange’ (TRX).
Ke pengujung iya, piak Aabar mengkang nadai ngeluarka bagi puku sida.
Duit nya udah diangkatka semina dalam timpuh seminggu ulih bank Goldman Sachs International (GSI) nitihka isi akaun tu, ti nunjukka duit nya udah diangkatka kena 19hb Mach 2013.
Ba pun pengawa GSI udah ngangkatka dua iti bon dikena meli pengeluar kuasa karan ke 1MDB, ti enda ulih dibayar pulai nitihka jamin sama ulih Aabar.
Semua bank nya udah ngangkatka US$6.5 billion duit jali ke Najib, lalu minta pampas pengawa US$590 juta.
Ke terubah iya madahka setengah ari US$3 billion ti udah diangkatka kena 19hb Mach 2014 nya patut dikena ke projek Tun Razak Exchange udah dipelanjaka ba pengujung timpuh akaun nya!
Duit ti nyampau nya lalu bedau dikena ba projek nya laban duit nya udah dikena nyadika puku kereja enggau dikena mayar utang iya nya diabiska baka nya aja!
Najib patut beraasai besak madamka pengirau ati orang mayuh pasal duit ti tiris ti kelalu mayuh nya ti disadang udah dikena iya melanja ‘pemeri resia iya’ ari menua Timur Tengah, ambi ke banding.
Repot pekara wang kompeni ke taun 2014 nunjukka pasal pengawa ngangkatka bon ti dikereja sida GSI.
Kebuah pia laban duit ti udah diangkatka ke guna projek nya aja datai ari piak 1MDB, tang piak Aabar lalu nadai ngeluarka sebarang belanja sesen pan.
Diatu kami nemu Aabar udah bulih untung udah bekau sida nyadi jamin besama dalam sempekat meli pengeluar kuasa (ba rega US$3.5 billion).
Goldman Sachs ti nyadi orang tengah dalam dagang ti nyelai nya udah mujur bulih komisyen ti besai sereta nyelai nya, ngena kebuah ti enda ulih diterangka.
Pemeri ti nelap ari bank Falcon ti udah ngemasukka duit US$680 juta nya dua hari udah bekau Goldman Sachs mindahka duit bon ti udah diangkatka nya.
Najib enda patut mutap ke spekulasyen ba pengelama bebulan-bulan skandal ti bekaul enggau pengelenyau duit bebillion-billion, lebuh maya bayar nya dipasukka enggau chara resia ba iya empu diatu dikejakuka, iya mengkang enggai meri penerang ti tau dikarapka orang mayuh.
Bala bakih pekara bank Najib diatu ngasaika pengangat skandal nya. Opis Goldman Sachs di KL udah diserungkai raban penerit undang-undang ari SPRM ti udah dijinakka ba hari ti sama, 8hb Julai, sida ti nyerungkai opis 1MDB.
Terang bendar raban pemansik tu mega udah bulih simpul penemu madahka kaul entara bon ti diangkatka nya enggau skandal 1MDB.
Tindak timbal Najib – pengawa penerit undang-undang ti beserungkaika opis, tangkap, mindahka bala pemesai perintah enggau ulah bebula penerang dikena nutup SPRM enggau jampat – mar bendar dikarapka orang mayuh. Bala pengarang berita enggau penerit undang entarabansa diatu udah belabuh mansik pengawa dagang ti salah ba sebuah bank pemadu pemadu besai di menua Amerika.
Perintah Singapura udah ngemekuka dua iti akaun dalam Aabar enggi bank Falcon (nyengkaum akaun enggi Tanore Finance Corp, ti udah mindahka duit ngagai Najib) enggau lima iti akaun udah mega dibekuka raban penerit undang-undang di KL.
Raban penerit undang-undang di Amerika diatu udah bulih semua penerang bekaul enggai pemindah duit dikena sida ngelala sapa ngirumka duit ngagai sapa lalu dini endur, nitihka dituliska suratberita Reuters.
Penampak endang lama udah lenyau lalu Najib patut nerangka iya empu enggau 1MDB nya enda salah.
Ba taun 2012, tu mih siku orang politik ti udah mansutka jaku gerah ngasuh semua parti politik di Malaysia patut tampat ba pengawa belanja pengawa politik sida, tang diatu iya ngasuh bala orang parti penyakal nunjukka teladan mantaika repot pasal penatai pemisi sida. Ni maya orang politik siku tu badu ngubah-ngubah ensera iya lalu mansutka penerang?