Tumu sehari tu, tuai gerempung ‘NGO’ ba jaku tuduh nyelai pasal pekat entarabansa dikena numbangka Menteri Besai udah masuk siri serang ti baru.
Ramesh Rao, ti nyadika presiden sebengkah gerempung ti enda tentu dikelala, Pertubuhan Minda enggau Sosial Prihatin udah mansutka jaku kutuk ngagai raban orang ti mantah sida ti udah kala bankrap enggau sebengkah enteri laman Twitter, nitihka sebengkah penerang dalam suratberita.
Ramesh didinga ngelindung ‘saksi’ iya, Lester Melanyi, siku pengarang berita ti udah ditetapka kot bankrap, ti nyadika pun penatai jaku tuduh lalu ti udah ngaku dibayar upah dikena iya mansutka ensera-ensera iya.
Ramesh udah mantah raban parti penyakal (ti ngaitka Lester dalam jaku tuduh ‘melesuka’ penerang) ti udah betanyaka integriti Lester lalu ngansak bala orang ti udah kala bankrap enda ngundi DAP tauka PKR.
Udah nya, baka ti bisi ditemu bala pengarang berita, iya nuliska entri twitter iya enda salah-salah baka ti mantaika sebengkah but:
“Enti aku nerima duit ari BN dikena aku ngereja sesebengkah pengawa, tentu aku deka telepas ari ukum bankrap tu ari dulu suba. Nama kebuah DAP enggau PKR deka kiruh ke nya,” ku Ramesh [dalam Malaysikini]
Asil peresa ba status Ramesh diatu udah diserahka ngagai Sarawak Report lalu sida udah ngamatka utai ti udah dipansutka orang ti bankrap nya. Ramesh mega siku orang ti udah ditinggang ukum bankrap!
Sapa ti mayar upah iya?
Sarawak Report sinu bendar ke pengasai ati Ramesh Rao ti udah kala bankrap, taja pan kami sinu agi ke bala orang ti udah nyali duit ngaga duit ngagai iya lalu udah puntan ngambi duit sida pulai ari iya ketegal ulah iya ti udu rua nya.
Tang, dalam konteks pengawa iya – nyediaka penerebai bilun pulai-mansang ke Lester; nyediaka endur Lester diau; nyediaka endur Lester betemu enggau pengarang berita; mayar pengawa ngambar Lester ngena video … kami deka betanya baka ni pemudah Ramesh melanja semua utai tu?
Patut tauka enda iya maya semua utang iya dulu?
Iya udah madahka enti iya udah diupah UMNO tentu iya enda bankrap.
Ramesh enggau Lester sama udah bankrap, lenyau pun penatai pemisi, ti sanggup besebutka sebarang utai dikena seduai iya mulaika diri ngagai solvensi?
Engka enti sida ulih meri siti penerang ti ulih dipechaya dikena sida nyukung semua jaku tuduh sida nya, jaku tanya kami deka dibatak kami pulai.