Peneleba perintah nuduhka ‘kontraktor besai’ dikena ‘bejalaika projek’ pemansang ti besai-besai suah udah nyungkak jaku bantah orang mayuh di Malaysia enggau di Sarawak.
Lebih agi enti orang tengah dipaduka ngereja projek nya enggau chara enda ibuh nengah atur tender tebuka.
Kebuah pia, laban kompeni-kompeni ti bisi kaul enggau bala menteri enggau orang politik nya mudah bendar bulij projek-projek kerajaan, sebedau sab-kontraktor ngereja pengawa nya ti bendar.
Kepala parti DAP Sarawak, Chong Chieng Jen, udah mansutka jaku tanya bekaul enggau atur projek besai ngaga Jalai Besai Pan Borneo, ti munyi ku iya, udah diatur chara belalai lalu diberi ngagai kompeni “Ali Baba” ti bedau kala didinga nama tauka dikelala orangmayuh.
Chong udah betanya, nama kebuah kompeni ti tulin ari menua Sarawak ti enda diberi kontrak menua, tang diberika ngagai sebuah kompeni ti dikuasa penuh raban Melayu.
Menteri Kerja Raya nya Fadillah Yusuf, siku Kaban Parlimen Sarawak (ari parti PBB-BN) ti bidik bendar diberi pengawa nya ari Najib Razak udah bekau BN Sarawak udah mujur mantu BN Perintah Besai menang lalu mengkang bekuasa (Fadillah mega nyadika Tuai “Nembiak” PBB Sarawak).
Sida Fadillah Yusuf sebilik udah nyadi bepengaruh enggau bekuasa di menua Sarawak kenyau ari menyadi tuai iya, Bustari Yusuf, nyadika penyukung Taib Mahmud ngelaban aya iya empu dalam taun 1980-an suba, dalam perang politik ti udah nya ngubah chura politik Sarawak dalam pengelama tiga puluh taun setengah, lalu deka dipajakka.
Bustari bekereja nyadi tukang kira-kira ke parti PBB Taib (diatu iya mengkang nyadi tuai pampang parti PBB di Sibu) lalu suah mujur bulih lisin nebang kampung ti besai-besai di Sarawak.
Pengawa dagang sida sebilik udah angkat bendar, lalu menyadi iya semakin mujur dalam politik ketegal ngembuan ulah “au mih, tuan” dalam perintah.
Kontrak besai-besai di Sarawak suah diberika ngagai sida Bustari sebilik kelimpah ari lisin nebang kayu enggau mega lisin numbuhka kebun dandang besai sawit.
Kompeni-kompeni nya nyengkaum kompeni KACC Construction, ti udah nerima mayuh kontrak ti besai-besai beungkus bejuta-juta ringgit enggau kompeni OBYU Holdings Sdn Bhd ti nguasa mayuh bengkah kompeni ba pengawa reta tanah enggau kebun dandang besai.
Sida Bustari Yusuf sebilik bisi dagang dalam kompeni kebun dandang besai, Austral Plantations, ti suah nerima lisin bekebun ti besai-besai ari perintah menua, lalu ba tikas perintah besai kompeni sida sebilik nguasa siti ari kompeni pengeluar kuasa karan pemadu besai di Malaysia, Petra Energy.
Pekara ti narit ati orang mayuh nya, mayuh pengawa dagang Bustari Yusuf nya bisi kaul politik, baka bekaul enggau sida Sapit Kepala Menteri Alfred Jabu sebilik, ti udah chakah bendar mantu ngulihka sukung undi raban bansa Iban ngagai Taib ari raban bansa Melanau ti mimit agi tubuh.
Anak Jabu, anak Bustari enggau mega anak Fadillah sama bela bekunsika pengelangkung nyadi raban pemegai sher dalam sekeda kompeni besai-besai, baka ti kala ditunjukka Sarawak Report dulu ari tu.
Tulang belakang ke semua utai tu nya Taib Mahmud, siku tuai menua ti bempu tanggungpengawa beberika pengaya enggau pengeraja menua Sarawak dalam pengelama beberapa puluh taun, diatu diganti Adenan Satem ti mega lama udah bekelala enggau Bustari Yusuf (kompeni enggi Bustari ditemu melanja penerebai bilun Adenan Satem sebilik nemuai ke menua UK ba ujung minggu tu).
Diatu Bustari yusuf ti udah kaya raja nya udah dipeda majakka pengawa iya ke Semenanjung Malaysia lalu ngerapitka kaul iya engga Najib Razak seduai Rosmah Mansoh.
Rosmah enggau Bustari, nitih ke penerang, endang lama udah bekelala, lebuh seduai sama bekereja enggau sebuah kompeni pengawa pemansang, Island Peninsular Sdn Bhd.
Lalu Bustari yusuf mega bisi kaul ti manah enggau Menteri Besai Malaysia, Najib Razak empu.
Kompeni Bustari, iya nya Petra Energy (penerima kontrak dalam pengawa dagang bekaul enggau minyak) bisi pemegai sher ari sida Najib menyadi.
Mohd Nizam Abdul Razak, bebini enggau siku ari raban sida Taib Mahmud.
Enggau nya, nama kebuah kontrak nya diberi Menteri Kerja Raya Fadillah yusuf ngagai kompeni ti enda dikelala orang mayuh ngambika ngaga Jalai Besai Pan Borneo?
Chong Chieng Jen udah balat bendar kena ransi raban BN ketegal ngumbai pengawa ngeluarka kontrak besai nya berat ngagai diri sebilik, tauka kronisme.
Enggau nya, sapa orang ti megai sher enggau nyadi pengarah dalam kompeni LBU nya, lalu nama penau sida diberi kontrak ti besai ti nyau manggai RM15 billion lalu enda diperebutka ngena sistem tender tebuka?
Siku ari pengarah ti mega pemegai pemadu mayuh syer dalam kompeni LBU nya Mohamad Zaidee Bin Awang Hipni, ti dibai masuk nyadi kaban kompeni nya kena 2hb Disember 2014 nyin kemari.
Dua buah kompeni ti sama bisi megai sher dalam LBU iya nya Multimur Resources Sdn Bhd enggau Jalinan Rejang Sdn Bhd.
Mohd Zaidee Abang Hipni megai 40% sher dalam Multimur Resources, ti ngujungka iya megai 55% sher dalam LBU, reti nya iya megai 22% sher kompeni nya chara diselampurka. Bisi enam iku agi orang ti megai sher dalam dagang nya.
Enggau nya, sapa orang ti benama Zaidee nya, lalu bala orang ti meri penerang madahka ngagai Sarawak report, iya tu siku pengari ke Bustari Yusuf.
Ke bendar iya Zaidee, sebedau LBU diberi kontrak berega besai bendar nya ngaga Jalai Besai Pan Borneo, nyadika siku pengereja pengawa ti taluk ngagai Bustari Yusuf.
Iya udah bekereja nyadi Pengarah Pekara Wang dalam Petra Energy, ngetu bekereja dia kena 3hb Disember 2014, iya sehari udah iya nyadi Pengarah dalam LBU.
Sebedau iya bekereja enggau Petra Energy, Zaidee udah bekereja dalam pengelama beberapa taun dalam kompeni OBYU Holdings ti dikuasa Bustari Yusuf.
OBYU Holdings nya kompeni dagang puku ti besai ti bepalan di Sarawak ti ditumbuhka sereta Taib Mahmud bulih kuasa dalam taun 1983. Lebuh maya nya, Bustari Yusuf nyadika Pengerusi kompeni nya.
Serebana YB Chong ari DAP Sarawak ti madahka kontrak nya berat agi ngagai kronisme patut dipendingka sereta diperatika, taja pan iya napi jaku putap enggau jaku kutuk raban BN ti nyukung Fadillah enggau Bustari anak Yusuf nya.
Baka ni chara nerangka pasal pengereja pengawa ke Bustari ti ngemaduka diri ari pengawa lama iya lalu udah nya mangku pengawa ba kompeni ti baru ti bedau tentu dikelala semina beberapa minggu sebedau kompeni nya diberi kontrak ti besai bendar, baka ti nemu pemesai ungkus projek nya?
Nama kebuah Zaidee bengat berani ngambi risiko ti tinggi baka nya, engka mih iya endang nemu kompeni nya enggau tuan iya deka bulih projek ti besai baka nya?
Sapa-sapa pengari rayat ti kena pilih rayat sida empu endang bisi kuasa betanyaka pasal sebarang pengawa ti belaban enggau batang pengawa, lalu nambah ke nya enti pengawa meri siti-siti kontrak nya enda nengah atur tender tebuka.
Tang lebuh tuai penyakal DAP Sarawat betanya pasal pekara nya lalu mega betanya berapa penyampau untung ti dijangka LBU ba agih belanja projek enggau agih belanja ti deka diberi ke ngagai bala sab-kontraktor nya, iya balat bendar kena kutuk dalam aum DUN minggu nyin kemari.
Tu kontrak ari Perintah Besai, pia ku tegah Menteri Pemansang Infrastruktur enggau Komunikasi BN, Michael Manyin Jaong, seraya ti enda ibuhka peneka rayat Sarawak ba dagang nya.
Siku agi pemegai pemadu mayuh sher ba penyampau 16.5% dalam LBU nya kaban politik ti mega kala nyadi Speaker DUN Sarawak ke dulu menya, kaban PBB Abang Ahmad Urai, ti bekaul rapit enggau sida Bustari Yusuf diri menyadi.
Tang Michael Manyin majak madahka MP Chong nya enda patut nyungkak jaku tanya ba pekara nya dalam rumah aum DUN Sarawak, laban kenu ku iya kompeni nya ukai kroni ke BN Sarawak, baka ti udah diberi Tuai Nembiak PBB, Fadillah Yusuf, bempu sebarang kaul enggau rampa politik di Sarawak.
Tambah mega, Manyin berebana madahka YB Chong ngembuan ulah ti ‘tambap’ laban betanya ni pemayuh untung ulih kompeni ti ‘bejalaika projek’ ari kontrak ngemesai nya, laban sapa-sapa orang pan enda nemu pasal pemesai untung nya ila?
Orang bukai tentu deka ngumbai perintah Sarawak nya tambap laban meri kontrak ti kelalu besai baka nya ngagai sebarang kompeni ti nadai ngembuan mayuh penerang kelimpah ari ukum ti tau ninggang sida enti tiap-tiap sen dibasau ba endur bukai?
Taja pan YB Chong balat kena kutuk dalam rumah DUN Sarawak, tang gerempung-gerempung professional di Sarawak mega angkat sereta mansang ke mua laban beserebanaka chara projek nya dikeluarka ngagai kontraktor.
Sebuah penerang ti dikeluarka Gerempung Kontraktor Kereja enggau Sivil Sarawak (SBCECA) minggu nyin , udah nyukung jaku sara YB Chong, ti madahka, ba peneleba ke dulu suba, atur meri kontrak nadai ngena tender tebuka, suah meda rega projek dikusutka “ngagai 30%”.
30% ari RM15 billion nya RM4.5 billion – engka tu penyampau untung ti dikarapka datai ngagai kuchik kompeni LBU enggi sida Bustari Yusuf diri menyadi?
Nama kuasa bala pengari rayat BN balat bendar ringat sereta nyida, ransi lebuh pekara ti ditanya, lalu nama kaul bala pemegai sher dalam LBU ti enda diperesa dulu dikena nyeliahka penyalah makai suap tau dikereja bala kroni politik, ti bekelala enggau Menteri Besai Malaysia Najib Razak enggau mega Kepala Menteri Sarawak, Adenan Satem?
