Ba minggu nyin kemari Najib Razak ti nyadi Menteri Pekara Wang (ti mega nyadi Menteri Besai) Malaysia udah didinga mansutka saut ti formal nimbal jaku tanya ti enda putus-putus ari kaban MP parti penyakal DAP, Tony Pua, ti nanya ke pasal duit injau RM4 biliion ari Wang Turu Pinchin Malaysia ti udah diperanakka.
Tang, ba kira-kira kami nunjukka saut iya nya semina 5% ari semua penyampau duit nya!
Duit nya udah diinjau ari Kumpulan Wang Amanah Persaraan (KWAP) urung taun 2011/12 ulih sebuah kompeni ti benama SRC Sdn Bhd, ti nyadika anak kompeni ke kompeni 1MDB ti diatu benung napi skandal.
Udah nya kompeni nya lalu diambi alih Opis Menteri Pekara Wang Malaysia
Tony Pua udah ngenataika serebana madahka akaun ti laun dikeluarka SRC ti semina dikeluarka ba bulan March 2014 nya nadai meri sebarang penerang baka ni duit ti diinjau nya udah dipelanja.
Enggau nya, nama utai ti udah disebut Menteri Pekara Wang ba minggu nyin kemari pasal pengawa beranakka puku ngena duit nya?
Nitihka Tony Puaa, saut ari Menteri Pekaara Wang Najib Razak nya enda tegap ba isi ti nyengala. Tang menteri nya majak nyebut pasal pugu pengawa beranakka puku ti ngena duit nya.
Tony Pua nunjukka ngagai Repot Kira-kira SRC nya nadai nyebut pasal puku ti diperanakka ba Gobi Coal ti endur saut nya bebida enggau repot kira-kira ti digaga Deloitte.
Tang, enggau penerang ti bisi kaul ba sebuah kaban dagang kunsi ti enda diberi nama ba pengawa beranakka puku munyi ti disebut Menteri Pekara Wang bekaul enggau kompeni SRC, rayat Malaysia bisi kuasa ngumbai Gobi Coal dagang SRC nya patut bempu tanggungpengawa ke pengelenyau RM4 billion.
Penyampau ti nyengala agi nya RM3.81 billion.
Enggau nya, Sarawak Report gaga bendar ati nerima sebengkah asil pansik ari siku pemacha blog tu ti bekaul enggau kompeni nya, ti disukung enggau akaun-akaun awam ti disimpan bala orang dagang China ke bukai ba Gobi Coal, ti diberi nama Origo Partners Plc.
Penerang ari CEO kompeni Origo Energy ti bisi disempulangka iya ba kira-kira kompeni nya ke timpuh ti abis ba bulan Jun 2014 nyin kemari nunjukka sebengkah gaya dagang ti enda regas ke Gobi Coal, ti munyi ku iya, nama kebuah kompeni iya matak semua sher kompeni iya.
Dagang nya dipeda ukai sebengkah pengawa dagang ti menuku.
Penerang ti udah nya mantaika pasal Origo Energy diatu bisi 14% sher ari Gobi Coal, ti munyi ku iya, sebengkah rega ti jelan ba USD$13.3 juta (iya nya RM49 juta, terima kasih ke pengusut tukar mata duit ringgit).
Ari penerang ti baka tu kita ulih ngira rega 50% sher ti dipegai kompeni SRC ba dagang kunsi nitihka munyi ti dipadahka Menteri Pekara Wang, Najib Razak nya.
Enggau sher kompeni 14% ti berega $13.3 – $14.9 juta, kitai tau ngumbai tiap peratus dalam Gobi Coal nya berega satu juta dollar.
Reti nya 50% sher baka ti disebut SRC nya berega USD$50 juta.. Ba maya diatu rega tukar mata duit nya urung RM189 juta – tauka RM0.2 billion.
Enggau nya, kini ke tunga pengelenyau laluh RM3.6 billion ti diinjau SRC?
Tentu Tony ua bisi ngembuan kebuah ti endur iya ngenataika serebana iya, bisi penimpang ba penerang kira-kira ti disediaka Deloitte lalu udah nya dibantaika Menteri Pekara Wang, lebuh sebuah kompeni arang batu di China udah mantaika mayuh agi penerang chara ti tebuka ba penyampau puku ti diperanakka sida ba kompeni ti sama?
Lalu nama kebuah ba saut iya nya, Menteri Pekara Wang begunaka kelalu mayuh jam nyebut pasal sebengkah pengawa dagang ti ngembuan peratus ti mit bendar dalam bajet SRC?
Enda patut kitai ngarapka saut pasal laluh 95% ari duit ti, kenu ku sida nya, udah didagangka?
Baka ti kala udah ditusui, SRC dikuasa siku bakih ke bakih dagang Menteri Pekara Wang, Jho Low, iya nya Nik Faisal Ariff Kamil.
Nik Faisal masuk 1MDB udah bekau iya ninggalka bank UBG, nyadi Kepala Pemesai Dagang dalam bank nya lebuh wang turu pemansang nya nyali duit ti kelalu mayuh ngagai PetroSaudi International, ti daitu ulih dikamatka kami udah dipindahka dikena meli lalu ngambi alih bank UBG.
Diatu Sarawak Report enggai agi nerima jaku ambu betandu ari Jho Low ti madahka iya nadai bekaul enggau atur ngaga pemutus runding pengawa dagang dalam 1MDB.
Mayuh emel enggau surat penerang ti udah ba jari kami lalu nerangka Jho Low nya nyadika penyungkak ba atur pengawa dagang 1MDB semanjai taun 2009 enggau 2010.
Enggau nya, patut kini orang mayuh berasai irau ke Jho Low majak, nengah bakih iya Nik Faisal, nguasa dagang duit skim pinchin ti diinjau SRC.
Agi mega kaul rapit Jho Low enggau dagang kunsi ti bukai lalu bakih dagang iya dalam 1MDB dalam 2011 – 2013 udah diterangka dalam surat enggau manah.
Ke lebih agi bekaul enggau wang turu dagang Aabar ari menua Abu Dhabi udah dipejalaika sama ba sekeda dagang kunsi ti enda sama enggu Jho Low, ti bekaul rapit enggau 1MDB.
Ba kes ke bukai Jho Low udah direkod bekenaka nama-nama kompeni ti nyau deka sebaaka munyi ti dipelabaka dikena iya ngabur mata orang pasal asal pun penatai wang turu.
Ba kes PetroSaudi, kompeni ti dikaul iya ba dagang kunsi ke terubah 1MDB, Jho Low enggau chara enda bemunyi numbuhka siti agi kompeni ti ngena nama PetroSaudi International Seychelles, ti ke bendar nya ukai sebagi ari struktur asal ari menua Arab Saudi.
Nya kebuah, ke bendar iya, PetroSaudi International Seychelles, nyadika sebuah kompeni dikena meli bank UBG, awakka kompeni nya dipeda baka kompeni asal ti meli, tang ke bendar ukai.
Dalam taun 2014 Jho Low bisi ditemu ngena sebuah agi kompeni ti benama SRG (Strategic Resources Global) dikena masuk dagang kunsi enggau Aabar dikena meli lalu ngambi alih kompeni Coastal Energy ari menua Kanada.
Nama nya nyau deka sebaka enggau SRC International dala 1MDB, ti maya nya bedagang kunsi enggau Aabar ti ngena nama Aabar-SRC Strategic Resources Ltd ba bulan Disember 2011, ti beranakka puku ba pemayuh USD$60 juta.
Enggau nya, sekali ke Jho Low udah ngena duit ari 1MDB tauka jamin ari 1MDB dikena nyukung pengawa dagang iya meli SRG?
Terang bendar, munyi pemutus pechara dalam kot di menua UK, lebu Jho Low dikaitka enggau Aabar dalam taun 20111 ti meli seraban hotel Maybourne di London nengah sebuah kompeni ti ditempa iya nama JQ2, Jho Low udah ngena sepuchuk surat sukung ari 1MDB enggau mega sepenyampau duit €57 juta euro ari 1MDB dikena nyukung iya meli nya, ti sama enggau kompeni Aabar.
Enggau nya orang mayuh di Malaysia patut dikemendarka bulih penerang bekaul enggau akaun kira-kira SRC International, dikena nentuka duit ti udah lenyau nya enda dikena sengapa ulih Jho Low ba chara ti sebaka.