Sarawak Report bisi udah nerima siti penerang ti udu ngemediska ati orang mayuh, ti nunjukka bank BSI udah nulak dokumen-dokumen ti dikenataika 1MDB bekaul enggau akaun Brazen Sky Limited di Singapura, ti endur sida BSI madahka semua surat penerang nya pelesu memagang.
Dokumen-dokumen nya udah bisi dikenataika ngagai mayuh bengkah opis ari CEO 1MDB, Arul Kanda Kandasamy, ti dikena iya ngayanka isi akaun sida dalam Brazen Sky Limited ba bulan November 2014 nyin kemari.
Tang, bank ti bejalaika pengawa ngati ke diri di Switzerland udah madahka ngagai opis-opis penerit undang-undang di Singapura ti endur sida madahka semua dokumen nya ukai datai ari sida, lalu dokumen-dokumen nya nadai ngarika akaun ti bendar pasal aset anak kompeni 1MDB nya.
Penerang tu udah diripotka ke menua Malaysia kena 13hb Mach nyin kemari.
Dua hari dulu agi ari nya, iya nya kena 11hb Mach, dia Menteri Pekara Wang (ti mega Menteri Besi Malaysia, Najib Razak) bisi didinga mansutka saut iya ngagai tanya parlimen ti ditanya pengari parti penyakal DAP, Tony Pua, ti ngamatka penerang madahka laluh $1.103 billion udah mujur “diambi pulai” ari wang turu dalam Brazen Sky di menua tasik, gempung pulau Cayman, lalu madahka, kenu ku iya, duit nya diatu benung “disimpan dalam mata duit dollar US” dalam bank BSI, Singapura.
Tang, pemeri penerang ari dalam ti diulihka ari Singapura madahka nadai sebarang duit tunai ti nyengala dalam akaun Brazen Sky ti bisi bekaul nya.
Penerang ti baru tu nyungkak pengirau ati ti tinggi bekaul enggau atur pengawa 1MDB besenutuk enggau hari Tony Pua mantaika penerang ti madahka bayar kuasa karan ti baru disadang deka ditikika 20%, nyadika sebengkah chara endur perintah mayar pulai wang turu pemansang ti majak puntan-sepuntan nengah beberapa iti atur dagang lisin ngeluarka kuasa karan ti dikerinduka.
Tony Pua madahka 1MDB udah dikemendarka nyual siti ari lisin, enggau chara ti buya kena bantah orang, udah meri enggau chara bepilih bulu ngagai sebuah kompeni enggau enda nitihka atur berebut tender ba bulan Februari nyin kemari, ba atur sida ti deka nikika bayar kuasa karan.
Pengerembai pekara tu udah ngujungka bala orang ti mantah nya minta diayanka penerang ti penuh awakka dikeluarka Menteri Pekara Wang ti mega Menteri Besai Malaysia, ti mega nyadi Pengerusi Komiti Penyanding Penemu ke 1MDB, nerangka ngagai orang mayuh dini endur ke bendar duit bebillion-billion ringgit nya lenyau, atas nama penampak.
Duit injau wang turu ‘pemansang ke menua’ nya diatu udah manggai RM42 billion lalu perintah seruran bebula penemu sekeda orang ti madahka duit benung digumpul nengah utang Petronas enggau sebengkah bon Sukuk ba penyampau USD$1.5 billion ba minggu nyin kemari ti endang digaga dikena nutup peniris nya.
Saut ti bebelit-belit bekaul enggau akaun ti dibantaika 1MDB sepengudah penembu dagang kunsi enggau kompeni PetroSaudi International dalam taun 2009.
1MDB madahka dalam penerang sida, lebuh sida pansut lalu ninggalka dagang kunsi enggau PSI, sida bisi tulihka pemulai puku dagang USD$2.3 billion.
Tang, semina ba bulan nyin kemari Sarawak Report udah bisi nunjukka puku duit $700 juta ari puku $1 billion ti ke terubah dalam PSI ari 1MDB udah disintak pansut ari projek nya ba hari ti sama sempekat ditanggam, ke dalam sebuah akaun lalu dikuasa siku orang dagang China ti kaya, Jho Low, ti ditemu nyadika bakih ti rapat enggau Menteri Besai Malaysia / Menteri Pekara Wang, Najib Razak, enggau sida sebilik,
Taja pan pengelenyau duit nya mayuh bendar 1MDB mengkang madahka sida udah mujur ngambi pulai puku ti udah diperanakka dalam pengawa dagang kunsi nya ti manggai $1.7 billion, nyangkaum penguntung ti diaku sida manggai $2.3 billion.
Lebuh ditanya dini endur semua duit nya, 1MDB madahka duit nya udah diperanakka di menua tasik, dalam sebuah ‘potfolio wang turu ti diseraraka’ di Gempung Pulau Cayman.
Udah nya mayuh jaku semaya ditaburka dalam taun 2014 kemari, dikena sida mai duit puku nya pulai ke Malaysia ngambi ke dikena mantu penanggul ti benung nuntung wang turu nya, lalu dalam bulan Januari 2015 tu tadi Arul Kanda Kandasamy, CEO 1MDB ti baru, madahka duit nya udah mujur ‘dibai pulai’ ari Gempung Pulau Cayman dalam dua bagi.
Kenu ku Arul Kanda, $1.22 billion ti udah dibai pulai dalam bulan September (lalu udah dikena mayar pulai utang sebebdau pengawa audit dipejalaika kena 5hb November) enggau laluh iya, $1.103 billion udah mujur ‘ditebus’ dalam bulan Januari.
Saut betulis ari Menteri Kewangan kena 11hb Mach ngagai jaku tanya parlimen MP Tony Pua, nama kebuah bagi ke-dua USD$1.103 billion, bedau dibai pulai dikena mandtu bebayarka utang wang turu ti mayuh bendar nya lalu mega betanyaka dini endur ke bendar duit nya disimpan.
Menteri nya madahka laluh duit tunai nya diatu benung ditanka ba bank BSI Singapura lalu enda deka dibai pulai ke menua Malaysia.
Penerang nya madahka, penanggul ketegal undang-undang Bank Negara ti ngujungka duit nya mar dibai pulai.
Penerang ti munyi nya udu bebida engga penerang ti dipansutka CEO baru 1MDB Arul Kanda Kandasamy, ti madahka ngagai bala pengarang berita ba bulan Februari, ti madahka duit ba bagi ke-terubah ba penyampau USD$2.2 billion udah dibai pulai ke Malaysia dalam tukuh mata duit dollar Amerika lalu udah nya dipelanja dikena mayar utang menua.
Enti bagi ke-terubah duit nya ulih dibai pulai dalam tukuh mata duit dollar Amerika ari akaun-akaun 1MDB, bala pemerati betanyaka, nama kebuah bagi ke-dua duit nya enda ulih ‘dibai pulai’ lalu ngena chara ti sebaka?
Orang ti landik ba pekara wang udah madahka ngagai Sarawak Report madahka undang-undang Bank Negara ti dalam penerang Menteri Pekara Wang nya endang nadai.
Nadai sebarang surat penerang dikena ngayanka pengamat munyi ti dipansutka ari Opis Menteri Pekara Wang tauka 1MDB.
Arul Kanda madah ngagai raban pengarang berita ba bulan Februari tu kemari nya iya kala meda surat-surat penerang nya.
Taja pan baka nya, Sarawak Report diatu udah bisi meda penerang ti dianjung Arul Kanda ari 1MDB ngagai bala pemesai, ngambika dipeda nyadika sukung ke jaku penerang iya ke dulu agi pasal akaun BSI enggi 1MDB di Singapura.
Penerang tu nunjukka nya CEO 1MDB nya udah nganjung surat penerang bank ngagai raban penerit undang-undang, lalu udah nya ngagai bank BSI di Singapura.
Tu nyengkaum surat penerang bank ke bulan November 2014 ke akaun Brazen Sky Limited di BSI.
Tang BSI udah madahka ngagai raban penerit undang-undang, atur pekara wang Singapura, madahka surat penerang nya pelesu lalu ukai datai ari bank nya empu.
Ba pengerembai berita ti ngenyitka ati, ti ngusak penuduk 1MDB bekaul enggau pengelenyau duit bebillion-billion ringgit ari akaun sida nya, penanggul tu begunaka peresa enggau pansik, lebih agi ulih bala penerit undang-undang pekara wang.
Nambahka nya, enam Kepala Audit ti diasuh Menteri Besai meresa bup kira-kira wang turu nya, nadai sebarang penerang bekaul enggau asil pansik tauka peresa iya.
Sarawak Report mega tetemuka nengah pemeri penerang ti bukai ti madahka siku agi penyimpan duti ti kaya di BSI Singapura benama Jho Taek Low, ti dikelala kami nyadika siku orang ti chakah bendar ngatur pejalai 1MDB enggau meri pemutus penemu beranakka puku, nyangkaum ngempung dagang kunsi wang turu nya enggau PetroSaudi, ti bisi kaul enggau pemindah duit puku $700 juta ke dalam sebuah akaun ti dipegai iya ngena nama Good Star Limited dalam bank RBS Courts di menua Zurich.
BSI mega nyadika bank ke-terubah dilawa PetroSaudi di menua Geneva lebuh sida minta muka bup akaun ke kompeni Good Star Limited dalam taun 2009, nyadika pemudah dikena sida nerima duit $700 juta ti disintak ari dagang kunsi nya.
Enggau nya Sarawak Report ngansak raban penerit undang-undang Singapura bejalaika pansik enggau peresa ti patut ke pengawa BSI ti bekaul enggau 1MDB enggau dagang kunsi sida enggau Jho Taek Low.