Lima taun udah bekau kali ke terubah Sarawak Report mantaika pasal kaul nyelai Taib Mahmud enggau Universiti Adelaide, universiti pemadu tebilang di menua Australia nya udah meri pemutus penemu sida nulak Kepala Menteri Sarawak ke dulu suba nya.

Dalam sepuchuk surat ti diterima sehari tu ulih gerempung NGO rampa menua Bruno Manser Fund (BMF), dia Sapit Chanselor universiti nya, Prof Warren Bebbington udah mansutka sebengkah jaku gerah matak pulai polisi sida ti endur sida suah berunding deka ngetanka nama sebengkah tapak dalam universiti nya “Taib Mahmud Court”, dikena sida meri basa ngagai siku orang kaya raja nya dalam taun 2008.

Ba kelese nya, Professor Bebbington mega mansutka penerang ti madahka universiti nya udah nulak peminta Taib ti deka ngulu Pengerami Makai Lemai dikena sida ngelai umur universiti nya genap 140 taun, ti enggau chara ofisyel ngela nembiak sida nya enggau nama persona non grata (orang ti enda diterima agi) di universiti nya.

Pemutus penemu ti dikeluarka siku ari professor menua Australia di universiti nya dikena sida nyerara diri ari Taib enggau chara tu nyadika siti kelai pasal pengerembai penemu orang mayuh di Australia ba penyalah makai suap enggau pengerusak menua Sarawak ti dikeruga Taib enggau sida sebilik lebih ari 40 taun tu udah.

Beberapa taun tu udah, lebuh Taib diberi basa nyadika nembiak ti kala besekula dia; dipaduka nyadi patron lalu diberi tanda basa pemadu tinggi Australia, the Order of Australia.

Bala orang ti rinduka pemanah enggau pengelikun rampa menua udah inggar bendar jaku mantah tanda basa ti diberi ngagai Taib, nyadika tanda terima kasih sida ke semua macham bantu ti diberi iya, deka ngerami pemujur sida, ti udah suah enda dikibuhka orang ngelama tu.

Bala sida tu nyengkaum enam iku nembiak ari Malaysia enggau ari gerempung nembiak Sarawak, ti udah nuliska surat nuju Sapit Chanselor ti dulu suba, Professor James McWha dalam bulan Dua Belas 2010 suba pasal pekara tu, tang surat sida nya udah enda dikibuhka bala pemesai di universiti nya.

Bala nembiak di universiti nya, ti kala ngatur beberapa bengkah gempuru mantah dikarapka deka berasai gaga meda ubah ba polisi universiti nya. Tang ripih utai ti nyadi nya udah nunjukka pemutus nya datai ari mayuh penerang ti diterima sida bekaul enggau pendiau enggau ulah Taib Mahmud.

Raban orang ari BMF udah nyuaka bup Money Logging ti ditulis Dr Lukas Straumann ngagai Professor Bebbington lalu bup nya dikarapka udah nyungka Bebbington ngaga pemutus pemutus iya.

Gerempung orang ti rinduka pemanah rampa menua ti bepalan di Tasmania mega nunjukka tu mih maya ti patut endur muru kompeni Ta Ann enggi sida Taib sebilik, ti nyadika sebuah kompeni ngulihka kayu batang ti udah balat ngerusak laluh rampa kampung di pulau nya.

Dalam repot ti dikeluarka kami terubah dalam 2010, kami udah nusui enggau silik sereta lenak baka ni Taib udah balat diberi basa universiti nya ketegal pemesai sukung iya, siku pelajar undang-undang, ti endur sida sebilik mega bisi bempu hotel Adelaide enggau beberapa bengkah pasar besai-besai di tengah-tengah nengeri nya.

Nitihka asil pansik kami, pemeri iya ti keterubah ngagai universiti nya, enda lama udah iya bulih kuasa penuh atas menua Sarawak dalam taun 1987, lebuh iya meri bantu ngagai Fakulti Undang-undang lalu enggau chara ironi numbuhka Palan Undang-undang Rampa Menua di Australia. Ba taun 1994 iya diberi tanda pangkat Doktor Kehormat.

Dalam taun 2002 universiti nya udah mansutka jaku gerah madahka Taib udah meri bantu mata duit ba penyampau AU$300,000 lalu sekeda ari duit nya udah dikena universiti nirika siti bilik ti digela enggau nama ‘Malaysia Room’ dalam universiti nya.

Udah nya Taib udah ngerembaika pengawa iya dalam universiti Australia nya nyadi patron gerempung nembiak entarabansa lalu mega nyadi pengerusi wangturu pelajar Malaysia-Australia. Mayuh nembiak Melayu enggau nembiak ari Sarawak ti belajar ba universiti di serata menua Australia lalu Taib dikumbai sida menyadi tuai sida, mujur sereta tebilang nama, tampak rita! Pugu pengerami nya diatur dalam taun 2008 lebuh siti endur dalam universiti nya digela enggau nama Taib Mahmud Court dikena masa iya.

Taja pan baka nya, universiti nya enggai madahka sekali ke pengawa nya nyadika respon sida ngagai pemeri ari Kepala Menteri, ti diatu nyadi Gabenor Sarawak.

Tang dalam surat sehari tu ti madahka ari pemayuh duit bantu iya penudi nya, iya nya 10 taun ke udah, iya nya dalam taun 2005, dudi ari jaku gerah sida ke pemeri AU$300,000 iya ba taun 2002. Engka bisi mega pemeri ari iya entara taun 2002 enggau 2005 ti ngansak universiti nya ngela sebengkah nama endur Taib Mahmud Court.

Ari berita pasal pemurah ati Taib ngagai universiti nya dalam taun 2010, dia Sarawak Report udah enchabar universiti nya awakka nerangka baka ni sida ulih pechaya ke duit nyampau nya udah diulihka enggau chara ti betul ba undang-undang ari siku orang politik ti semina nerima gaji bulan, taja pan iya baru dua taun udah mangku pengawa nyadi menteri.

Tambah mega Taib endang ditemu orang mayuh udah kala belajar ba universiti nya ngena duit bantu ari Skolarship Colombo, dikena ngamatka penerang sida menyadi bisi sepuluh iku dalm sebuah ruang bilik orang ti kurang bepenatai-pemisi. Niang apai iya siku tukang kayu bekereja ke kompeni Shell kelia.

Pengawa Taib ti nyadi Kepala Menteri lalu udah nya nyadi Gabenor Sarawak patut nagang iya bekaul terus enggau sebarang pengawa dagang,

tanggungpengawa nya dikena nyeliahka iya ngelimpangka diri ari batang pengawa iya empu ti bisi kaul enggau atur beberika lisin enggau kontrak besai-besai ngagai sida sebilik.

Diatu bisi mayuh bendar penerang ti nunjukka Taib ngaku ngembuan reta ti mayuh ulih ari asil makai suap enggau salahguna kuasa, mayuh ari penerang nya udah diayanka dalam Sarawak Report enggau gerempung NGO rampa menua baka Bruno Manser Fund.

Ba pengelama lima taun, Universiti Adelaide udah enggai nyaut jaku tanya kami tauka ngaga tindak balas ba penerang kami pasal Abdul Taib Mahmud. Tang diatu penemu sida udah berubah. Dunya enggai agi mejamka mata sida ngagai pendiau enggau ulah jai Taib enggau pengeraja iya ti endang diambi iya ari rayat menua iya empu enggau mega ari kampung pulau Borneo.

Sehari tu, Lizzie Adam, siku nembiak universiti nya ti udah kempen mansutka bantah iya enda ngira diri lelak, ba atur meri nama baru ke Taib Mahmud Court, nusui pasal pengasai ati iya empu ngagai Sarawak Report:

“Aku berasa gagai bendar ati laban diatu Sapit Chanselor udah ningaka jaku kami lalu malik ngagai kempen ti diatur kami. Tu siti singkang ti besai nuju ke mua. Aku enggau kami sebuat gaga bendar ati laban universiti kami tu udah nimbang penemu enggai agi meri basa tauka ngaga sebarang kaul enggau siku tuai perintah ti ditemu balat udah makai suap baka nya.”