Taib Mahmud sebilik rindu bendar ngena gari dikena sida ngayanka pengeraja sida empu.

Taib empu endang tebilang nepan kerita bebansa Rolls Royce ti bisi deriba iya empu enggau masukka sebentuk tinchin bemata mesai kachang walnut lalu disempulang bini iya ti ngena perengka pengias tubuh ti mega berega mar.

Tang ba bulan tu tadi Malaysia Tatler Ball udah meri ruang ngagai adik Taib, Raziah Mahmud-Geneid enggau sida sebilik peluang ngayanka gari sereta pengeraja sida lalu tu siti kebuah kami patut ngingatka bala pemacha ari ni penatai semua duit dikena sida bebelika utai nya.

Udah ti nyual siti ari reta sida sebilik ti berega bejuta-juta dollar di menua Syndey ba pun taun tu, sida Raziah Mahmud-Geneid sebilik bisi dipeda ngulu sebengkah pengerami lalu ngena pekaian berega mar ti ditempa penengkebang fesyen Valentino enggau Cavelli ba bulan tu tadi.

Tatler ba sebengkah pengawa sida kala nyebut pasal Raziah ti rindu “bejalai di sebelah dunya laban ngatur pengawa dagang” lalu diatu iya dikelala nyadika kaban dalam “Tatler Tribe”.

Sida Taib sebilik amat tebilang rindu mandangka pengeraja sida empu.

Tang penerang ke diatu ari bala lawyer Gabenor nya di London madahka sida Taib sebilik ngasaika pengelantang ari pengeraja ti endang diwaris sida nya siti penerang ti salah.

Dulu menya Taib enggau bala menyadi iya ke 9 iku (i.e. sebedau iya masuk pengawa politik), sida sebilik endang orang selama ti jelan bepenatai pemisi.

Kami kala udah mantaika baka ni Raziah enggau laki iya, Robert Geneid, udah nyadi kelalu kaya, terima kasih ke semua lisin ari menyadi iya, Taib Mahmud, semua nya beduduk ba nasit enggau pengidup orang bansa asal di Sarawak

Bala adi Taib Mahmud ti bukai baka Tufail, Moh. Ali, Onn, Arip mega nyadi kaya raja beduduk ari penatai kamah ti sebaka.

Robert Geneid, siku peranak menua Australia bebansa Lebanon, udah didinga ringat bendar enggau beberapa iti berita pasal penatai pemisi iya ti nyelai ti diperanakka iya beduduk ba pengidup orang bansa asal ba beberapa iti laman web iya, ti endur iya nunjukka iya nya siku orang “ti rindu ngulurka bantu” enggau “rinduka rampa menua”.

Lalu, ari ni penatai semua duit nya?
Kelimpah ari ti ngulihka kontrak besai-besai begagaka rumah, Raziah enggau Robert mega bulih beribu-ribu hektar tanah kebun dandang besai sawit di menua Sarawak, tang nadai siti pan pengawa dagang nya disebut dalam semua laman web enggi Robert Geneid nya.

Ba beberapa iti dagang entara taun 2005 enggau 2008, Raziah udah bulih tanah kampung ba pemesai rampa 20,000 hektar.

Mayuh agi tanah nya tanah NCR. Di pelilih menua Sebangan kami udah mansutka cherita pasal kompeni Quality Concrete laban udah nguji mejal orang bansa asal menua nya nyerahka tanah sida ti disengkaum lisin kampung ba penyampau bayar pampas ti semina RM250 ke sebuah ruang bilik.

Kot udah ngalahka kompeni Quality Concrete ba siti pechara lalu dalam taun 2011 kompeni nya udah diperintahka mayar orang bansa asal di Sebangan ba penyampau RM160,000 ketegal sida udah tama nadai pemendar lalu ngeruga kampung NCR ba pemesai 3,305 hektar.

Kami mega kala mansutka cherita pasal baka ni raban Taib?Geneid sebilik nya nguasa Royal Mulu Resort ti betikas 5 bintang di menua Sarawak ti didirika dalam Taman Negara Warisan Dunya UNESCO.

Taja pan Robert Geneid madahka diri ngemataka kandang menua nya enggau “penuh bejimat” lalu ditambahka “kerejasama enggau raban bansa asal di menua nya”, pengawa nirika hotyel nya udah mejal pengawa ngerampas tanah enggi orang bansa asal Berawan di menua nya.

Ba taun tu enggau beberapa iti pemutus pechara ti udah ngarika kuasa orang bansa asal ti ngelaban Perintah Sarawak ti betuaika menyadi tuai iya, Taib Mahmud, kot tinggi udah mutuska tanah ke penyangkai bilun Mulu Resort udah diambi enggau chara ti salah ari bansa asal Berawan ti nadai dipampas sesen.

Tang, enggau jaku tangkan ti dikeluarka dalam laman blog tu enggau mega dalam bloh buklai, hotel nya deka nyadi sebagi ari raban hotel Marriott nyadika ‘resot rampa menua’ sida ti keterumah.

Nya deka nyadika penyaru ti deka ngasuh raban Marriott nesal ila.

JAKU TANGKAN – Anang sekali-kali bedagang enggau raban Taib Mahmud sebilik enti kita deka ngiga pemanah nama ba pekara ti bekaul enggau rampa menua!

Nyerumba nya, bala sida Raziah sebilik ti bukai mega ngasaika idup lantang atas pengeraja beduduk ba pengeraja asal Sarawak, enda salah-salah semua isi bumi nya enggi sida empu.

Elia geneid, anak tuai Raziah (ti bisi dipeda ngena gaun Valentino berega RM26,000), ambi ke banding, udah diberi lisin kebun dandang besai sawit ba pemesai 9,300 hektar ba atas tanah NCR di pelilih Bintulu ari menyadi indai iya (Taib) nengah opis LCDA.

Lalu bala menyadi iya ti bukai sama bisi dipeda gaga bendar ati begulai enggau raban orang ti kaya-kaya, endur sida mandangka pemanah perengka pengias tubuh sida asil ari bekerugaka tanah pesaka enggi orang bansa asal.

Agi mega, enti bisi orang deka nemu baka ni gari enggau perengka pengias tubuh berega mar sida nya diulihka, kami kala nuliska repot pasal baka ni 17 buah genturung pendiau raban bansa Bidayuh di Sarawak udah begempuru angkat ngelaban kompeni enggi raban Geneid sebilik udah ngerampas tanah kudus sida di Gunung Serumbu.

Raban hotel Marriott patut mereti lebuh sida benung kiruh ngaga iklan bekaul enggau ‘resot dagang temuai’ sida dikena sida ngelaluka penatai bala temuai datai ngagai ‘serega kampung’ sida di Mulu.

Bisi mayuh penerang ke sebarang sapa ti deka nangkan bala temuai ti madahka jaku penerang nya nadai bekaul enggau utai ti amat pasal menua Sarawak enggau bala orang ti ngempu resot Mulu nya.