Taek Jho Low, 33 taun, sekali agi bisi ditemu bebelanja besai-besai begulai enggau bala bakih beprofil tinggi iya, lalu ke serak tu ba Gerempung Bansa (UN).
Diatu Sarawak Report ulih mantaika mayuh agi cherita baka ni nembiak Malaysia ti kaya raya tu mega udah tetarit ati enggau asil pengelandik jari ti berega mar.
Ba jaku gerah minggu nyin kemari bisi madahka UN deka ‘menswastaka’ agensi berita kuasa pengelantang mensia iya, IRIN, terima kasih ke duit ti dituruka chara nyelai ti manggai $25juta ngagai siku ‘orang kaya’ ti digaga diri empu, udah ngujungka raban NGO di menua Malaysia alit ati.
Duit ti datai ari komoeni iya empu nya, Jynwel Capital terang bendar udah nentuka penuduk iya nyadika siku orang kaya ti gerah jari ti serius ba atas panggau entarabansa, begulai enggau bala bakih iya ti bepengaruh.
Enggau spekulasyen ti majak nambah diatu pasal agih belanja ti dikena Jho Low ti nyelai sereta mayuh bendar, lalu orang mayuh endang nyadang iya begunaka semua nya.
Agi mega, baka ti ditemu orang mayuh di Malaysia, lebuh Jho Low nguji ngulihka bala pengikut iya, iya berasai gaga ati mansutka belanja beribu juta dollar ti enda ditemu ari ni penatai nya, dikena bejudi ba sebelah mija judi di nengeri Vegas, bala orang indu pelayan sereta bebelika ai Crystal Champagne ti pemadu mayuh dalam rekod meli champagne di dunya tu.
Ba pemisi musim panas suba, Jho Low udah merindang Najib enggau Rosmah enggau chara betemuka seduai melaki bini nya enggau bakih iya ari kompeni PetroSaudi, Tarek Obaid, lalu udah nya nyewaka seduai nya nepan kapal layar bebansa Tatoosh di tasik Mediteranean.
Kapal layar bebansa Tatoosh nya siti ari 26 buah pemadu besai di dunya lalu penyampau bayar sewa nya manggai setengah juta dollar seminggu. Nya mega kapal layar ti sama ti kala disewa Jho Low dikena iya belayar ngelantangka ati begulai enggau Paris Hilton dalam taun 2010 suba.
Bala pemesai dalam UN tentu nemu pun penatai duit Jho Low nya lebuh sida nyambut penatai nembiak kaya ari Malaysia nya seraya sida mansutka jaku gerah pasal ‘pementas’ iya minggu nyin kemari.
‘Kepala Opis Kuasa Pengelantang Mensia’ UN, Valerie Amos ngelaluka Jho Low ngambi bagi iya ke dalam UN, nitihka penerang media IRIN.
Pengarah Opis Kuasa Pengelantang Mensia UN, Ben Parker, madahka ngagai bala pengarang berita, UN berasai gaga ati ke penatai nembiak kaya ari Malaysia nya nyadi pemangku pengawa dalam UN ti datai ari sebuah menua ti benung mansang, siti pengawa ti suah dipangku orang ti datai ari menua ti lama udah mansang.
Tang, mayuh orang di Malaysia diatu udah mansutka jaku tanya nama guna UN patut ngulihka duit bantu pemeri beribu juta dollar ari Jho Low?
Raban-raban NGO ti suah udah mai penanggul tu ngagai UN awakka nyadika perati opis kuasa pengelantang mensia di UN mega sama betanyaka penyelai pun penatai pengeraja Jho Low.
Ambi ke banding, diatu udah bisi penanggul dalam kuasa pengelantang mensia di menua Sarawak enggau Sabah ti agi mengkang dalam pengingat semua orang enggau dalam media, nyengkaum ti udah datai ba opis UN enggau agensi berita UN, IRIN.
Penanggul-penanggul nya bekaul enggau pengawa sengaja ngerusak kampung Borneo lalu ngeruga pengidup bala orang bansa asal di endur nya.
Pengawa dagang Jho Low udah mujur dipejalaika atas sekeda cherita ti enda direpotka tu – nya siti ari pemayuh cherita bendar ti ditemu kitai.
Agi mega , batang pengawa iya nya nyadi Pengarah ukai eksekutif ba bank UBG enggi sida Abdul Abdul Taib Mahmud Mahmud entara taun-taun 2008 ngagai 2010, terima kasih ke pengawa nebus bank nya ti endur Jho Low ti baru beumur 26 taun maya nya madahka diri udah meri 10%.
Kaul 1MDB ngatrur pengawa dagang iya dalam PetroSaudi, ti udah dipelanja ngena turu duit bala pemayar chukai di Malaysia, udah nya dibeli ari iya.
Pengaya bank UBG ti dikaitka terus enggau kuasa perintah ti korup di menua Sarawak, udah meransang pengawa ngerusak kampung Borneo, pengawa ngerampas tanah ari orang bansa asal enggau pengawa enchuri kayu batang enggau pengaraja asil dalam tanah enggi menua Sarawak empu.
Kaul ti enda terang entara Jho Low enggau wang turu 1MDB, kompeni PetroSaudi enggau pengawa dagang bukai ti bisi kaul enggau Malaysia enggau Timur Tengah diatu udah nyadi perati orang mayuh di dunya lebuh ti meratika skandal belanja pemadu besai Malaysia.
Selampur penanggul tu tebantai ari ketegal kurang penampak, ti udah mujur dikeritok dalam pemanah gempung entara orang politik parti penyakal enggau Menteri Besai ti dulu suba, Dr Mahathir, ti seruran mansutka bantah sida enda ngetu-ngetu.
Taja pan bisi penusut runding enggau penerang ti kelabur, terang bendar bisi bida entara berita tebantai pasal duit jali $40bilion ari sebengkah wang turu ti enda ulih ngatur pejalai belanja, tang udah nya udah mai pengaya enggau tekala nya ke siku orang dagang ti bisi kaul terus enggau orang politik ti benama.
Lalu baka ti kala udah ditusui Sarawak Report, bekaul enggau anak tiri Menteri Besai Najib Razak, iya nya Riza Aziz, ti ditemu bebakih enggau Jho Low, iya diatu dipeda enda ulih nerangka pasal pun penatai pengaya diri empu ti penuh resia nya.
Jho Low engka siku orang dagang ti udah mujur bendar beranakka puku dagang iya bebilion-bilion dollar entara umur iya 25 taun dalam taun 2005 lebuh iya nembuka pelajar iya ari Wharton Business School di menua Pennsylvania lalu lebuh umur iya manggai 28 taun dalam taun 2008 lebuh iya meli sereta ngambi-alih bank UBG.
Kitai semina ulih berasai enda arap ati ke pengaya iya nya.
Tang enggau surat CV iya ti kelabur, lalu mega pasal penerang pengaya iya ti mega kelabur, lapa opis kuasa pengelantang mensia di UN enda kiruh deka mansik pasal penerang iya sebedau sida ngulihka duit ari iya?
Tambah mega siti ari pemayuh cherita ti enda dikeluarka tang bisi kaul enggau pengelandik IRIN nya pengawa ngerusak rampa menua enggau kampung Borneo enggau mayuh agi penyalah ngelanggar kuasa pengelantang mensia ba raban bansa asal, nyengkaum penyalah masung orang indu besistematik ba bansa Penan ti dikereja bala tukang tumbang.
Sebengkah agi penyalah nya nguna kuli pengawa kasar enggau chara pejal ba pelilih menua nya ba raban pengereja pengawa ari menua luar di serata menua Malaysia.
Sekali ke pengaruh Jho Low nya deka ngangkatka pemanah berita pekara-pekara tu, enggau kaul iya ti mengkang ba sida Abdul Taib Mahmud sereta enggau kaban orang politik BN, ti datai ke diatu mengkang puntan meri saut ke jaku tanya kini penunga beratus-bilion dollar bekaul enggau wang turu 1MDB?
Tambah mega Jho Low kala ngaku diri nyadika penengkebang asal projek numbuhka wang turu 1MDB.
Pekara ti baka nya enda deka mantu sebarang orang ti seruran ngubah-ngubah cherita lama sida, enti kitai deka meretika pun penatai pengaya enggau pemujur pengidup sida.
Lalu sekali agi tu deka nyadika penanggul ba diri Jho Low empu.
Lebuh ba pun iya, bala pengarang berita betanya ngagai iya bekaul enggau ulah iya bebelanja baka ni iya tau nyadi kaya enggau ngenyit dalam taun 2009, iya madahka duit nya ukai enggi iya.
Bala pengarang berita diterangka Jho Low datai ari ruang bilik orang jelan iya pengaya lalu iya nyadika “pemudah chara” ti ngatur-ngatur pengawa rami ke bala bakih iya ti kaya agi lalu udah nya ngenyadika belanja ari sida. Enggau chara nya iya arapka bulih belanja ari bala apai indai bakih iya awakka nyadika puku ti diperanakka iya udah nya ba projek pelajar iya, tang udah nya duit ti diayah-ayahka iya nya, kenu ku iya, ukai enggi iya.
Lima taun udah nya Jho Low dikelala enggau penuduk “dermawan jutawan”. Lalu diatu iya ngaku semua duit ti dikembuan iya nya duit iya magang.
Tang cherita pasal pemisi ruang bilik sida enda sama belama.
Diatu Jho Low udah dikumbai serak tubuh ketiga datai ari ruang bilik orang diri sebilik ti kaya raya.
Nya alai, sekali ke Jho Low mansutka pengaya iya enggau chara ngulih ari apai indai bala bakih iya ari menua Arab ti kaya-kaya ti sanggup meri duit sida lalu udah nya ngujung ke iya nyadi kelalu kaya? Tauka iya empu endang udah enda mukai-mukai nyadi kaya?
Enggau pengaya iya ti angkat enggau nyelai lebuh maya ekonomi dunya majak kusut, engka enda kiruh mega orang enti pengaya raban sida sebilik pan nyadi kusut.
Nadai siku orang ulih bebulaka penerang ti madahka sida Jho Low sebilik nya raban orang ti mujur dalam pengidup. Tang rayat Malaysia deka nemu ni maya pengaya Jho Low nya datai ngagai iya. Sekali ke orang dalam UN deka betanyaka tanya ti sama lalu ulih sida meri kitai saut?
Ti udah nya mai kitai nyerungkai nama utai dibeli ngena pemisi ti nyelai Jho Low ke diatu.
Diatu Sarawak Report udah ngelala Jho Low ti rindu ngelawa restoran ti benama-benama udah ngaga semsasyen ba Christies taun nyin kemari, lebuh bala agen iya ngaga siti rekod nyual siti asil lukis graffiti ti digaga Andy Warhol groupie, Michel Baquiat.
Asil lukis ti benama Dustheads ti ditengkebang Basquiat nya diasilka dalam taun 1982 udah ngarapka ulih dijual enggau rega $25-30juta dollar, udah bekau iya nerima tikas Warhol groupie.
Warhol dipeda udah rinduka watak siku artis ti agi biak, ti udah nempa nama nengah pengawa iya lalu mati ketegal salah guna dadah heroin ti belebih dos lebuh umur iya agi biak, 27 taun.
Ari bala pemansik Sarawak Report udah nemu Jho Low nyadika orang ti meli asil lukis ti dijual di nengeri New York nya kena 13hb Lima 2013 suba.
Jho Low dipeda kelalu gaga ati enggau asil lukis nya (ti mega dipelabaka bakih iya di menua Hollywood, nyengkaum Leonardo di Caprio) ti endur iya nyebut rega meli ba penyampau $48,843,750 ba sebuah pengerami lelong. Rega nya mega dipelabaka tau nyeliahka mayuh bayar GST, ke orang ti seranta di Sarawak tauka ngubah nasit pengawa industri kain bansa asal enti iya ngena semua duit rega meli asil lukis nya din.