Stesyen radio ti kala udah menang mayuh bengkah perais naburka program ba tikas entarabansa, Radio Free Sarawak (RFS), sehari tu mansutka jaku, udah bekau sida ti napi kachau program ti disengajaka, madahka sida ngantung dulu program gelombang angin pandak sida.
Kena hari Lima 14hb Sebelas tu tadi nyadika hari ti penudi program ngena gelumbang angin pandak dar slot 15420 kHz, nyentuk ngagai jaku gerah ti nangkanka tu, taja pan RFS mengkang nuliska repot sida dalam laman web sida nya.
Pemutus nya dipansutja udah bekau bala peninga stesyen radio nya ti ringat ketegal program nya ti kena kachau, ti dipelabaka datai ari sebengkah perengka pengachau program, ti bisi dipeda didirika ba mayuh bengkah endur di serata menua Sarawak.
Perengka pengachau program disadang berega mar lalu dipelabaka ulih dikena ba penyauh ti bisi sekat, iya dalam kandang sebatu aja. Tang perengka nya semitan bendar dikena.
Reti nya opis ti bekuasa di Sarawak udah beranakka puku bejuta-juta ringgit ketegal ti dikena ngulihka perengka ti bansa nya ti betuju endang dikena ngachau program ari sebengkah stesyen radio ngati ke diri.
RFS ngembuan orang ti landik ti ngemendarka raban bansa asal ngenataika serebana sida, nyengkaum pengawa ngubah rampa kampung, ngerampas tanah enggau pengawa gila begagaka tekat ti besai-besai ti majak ngeruga pengidup sida.
RFS udah nerima Perais Komunikasyen Ke Ubah Dalam Kaul Mensia 2014, ti diberi ulih Universiti Queensland, Australia lalu ba taun nyin kemari, Perais Penengkebang Media Ngatika Diri 2013 tikas entarabansa, ketegal sida ti udah mujur naburka berita ngagai bala orang di menua pesisir di Sarawak.
Tang, program nya ti udah ditaburka dalam pengelama empat taun ninting lemai semina ba hari Minggu dalam pengelama 1 ½ – 2 jam sehari, madahka pemayuh peninga sida nyau majak kusut ketegal stesyen nya napi pengachau lalu program gelumbang angin pandak sida nyau enda tetapika ungkus pengeluar.
Stesyen nya madahka, kelimpah ari pengachau ti bepun ari dalam menua Sarawak empu, perintah menua mega enda ngetu-ngetu ngupah stesyen radio pengachau bukai ari menua bukai baka ari menua Moldova, ngambika ngelancharkaserang ti besai agi rampa atas stesyen RFS.
Beberapa minggu ke udah seraban pengarang berita ari stesyen RFS udah ulih nentuka lalu berandau enggau siku agen ti endang nyadika orang ti betanggungpengawa ngelancharka pengachau ba program radio RFS.
Agen program radio ari menua Belgium, Ludo Maes udah nyadika orang tengah stesyenradio bukai ti endang dikemendarka undang-undang lalu pro-demokrasi, tang iya mega ngulihka untung ari pengawa nyual perengka pemanchar program radio ti tau mega dikena ngachau program radio bukai.
Maes ditekanka nyadi pengachau ngagai program radio RFS lebuh maya bepilihbesai menua Sarawak dalam taun 2011.
Maes bisi ditemu mayar duit ti mayuh nyadika upah ngagai sebuah stesyen radio di menua Rusia ngambika mancharka pengachau program ti disengajaka ngena gelumbang angin pandak ti sebaka enggau gelumbang angin ti dikena RFS.
Pemeri penerang ari dalam Sarawak udah ngamatka ngagai Sarawak Report madahka Ludo Maes endang diberi kontrak masang perengka-perengka pengachau program ulih bala agen di menua Malaysia.
Dikena nentuka sekali ke Ludo Maes, ti bisi ngayanka iklan mayuh macham perengka pemanchar program radio enggau tiang radio ke dijual, udah madahka diri besedia ngaga pengachau ke program radio pro-demokrasi, dia raban ari RFS udah ngatur siti aum enggau iya bulan siti nyin kemari.
Sida tu udah nemuai ke menua Belgium lalu ngeluluka diri nyadi agen ngarika sebeuah rejim perintah ari menua Afrika ti deka mampul mulut sebuah stesyen radio ti ngatika diri, lalu tembu berandau nya, dia Maes madahka diri besetuju nyual perengka ti diguna lalu nunjukka ngagai sida baka ni chara ngena perengka nya.
Taja Maes madahka pengawa bekachauka panchar program radio orang bukai nya endang salah ba undang-undang, tang iya mega madahka iya enda ulih dipesalahka enti sema perengka iya nya disalah-guna orang ti meli ari iya.
Maes mega madahka diri besedia mantu ‘ngatur projek’ nya dikena nentuka perengka ti dijual iya nya “tetap ulih kena enggau meruan”.
Iya mega madahka diri besedia ngambi bagi dalam projek ngaga pengachau bekelulu nya, ti dipeda udah ngelemika jaku iya empu ti madahka diri nadai kala ngachau panchar program RFS.
Naka ke diatu Ludo Maes lalu bedau betemu baru enggau raban Sarawak Report udah bekau ti berandau enggau raban ari RFS di Brussels, Belgium, taja pan iya endang dikangauka enggau penuh basa.
Ba ujung minggu tu raban penabur program ari RFS madahka stesyen radio enda ditutup terus ketegal tekan ari sapa-sapa orang, taja pan sida semina ngantung program ti ditaburka nya enda lama.
Raban ari RFS deka neruska projek pengerembai berita sida lalu ngiga jalai enggau chara bukai ngenataika program radio sida.
Stesyen radio RFS dipelabaka deka dipancharka baru ba taun 2015 lalu ngerembaika berita sida ngagai bala peninga sida ti auska berita ti bendar, tulen sereta amat, lalu dikena sida nunjukka duit bejuta-juta ringgit ari sekeda orang ti deka mampul mulut sida di sepemanjai taun 2014 tu deka tebasau pia aja.
