Semina udah 24 jam ke sebengkah ‘penerang’ dipansutka ba pengawa nginti undi Kepala Menteri, kenu ku iya, dikena ngemunaska penyalah makai suap kemari.

Bala gerempung NGO rampa menua mengkang begendangka ‘ubah ba ati’ Adenan Satem, lalu besenutuk enggau nya iya nebah nyawa deka mai ubah … enggau chara nerangka nama reti utai ku iya.

Udah bekau ti ringat lalu ngutuk penyalah makai suap dalam pengawa ngulihka kayu batang di menua Sarawak, Adenan Satem enggau jampat ngangauka baru bala pengarang berita, ngamatka jaku iya ukai nujuka jaku kutuk iya ngagai sebarang tauke kayu batang, kompeni kayu batang ti besai-besai tauka (baka selama) siku orang politik BN nya aja.

Bala orang ti endang dikutuk iya nya ‘bala sab-kontraktor, bala menija kem kayu batang enggau bala tukang tumbang’, kenu ku iya, laban udah ngerusak laluh kayu kampung di serata menua Sarawak.

Kutuk nya mega ditujuka iya ngagai bala pemesai ari opis kampung laban sida enda bebendar bejalaika pengawa sida nengkilaka kompeni kayu batang ti benung bekereja.

Tang baka ni ku bala kaban politik BN empu enggau bala sida sebilik, ti endang bisi rekod terang-terang megai syer dalam kompeni-kompeni kayu batang?

Adenan Satem enggau jampat ngasaika enda manah bendar iya bejaku ngenang bala kaban politik BN nya bisi kaul ba pekara nya!

Nyerumba nya, Adenan Satem udah nunjukka bala bakih ari raban tauke kayu batang enggau raban pemesai penerit adat ari opis kampung enggau mega raban orang politik BN diatu udah belabuh nyain ‘sempekat integrity korporat’.

Enggau nya, iya disebutka enda ngawa aja.

Diatu BN tau belabuh nawa lalu ngejil bala pengereja pengawa kem kayu batang enggau mega bala pengereja pengawa ke mit-mit ari opis kampung – udah nya sida tau ngatur chara dikena maya bepilihbesai ila!

Tang enda bidik bendar, sekeda pekara enda ngemudah nya diperesi ngena chara bekutuk tauka beanuka orang ti mit-mit.

Kitai patut belabuh nyidi pejalai duit – duit bebilion-bilion ringgit ti, munyi ku Adenan Satem, dilenyauka nengah pengawa ngulihka kayu batang chara belalai.

Ulih tauka enda kini bala menija kem kayu batang, bala pemesai ari opis kampung enggau bala sab-kontraktor nya ngaga rumah ti besai-besaibesai, meli kerita mar-mar lalu beranakka puku dagang sida di menua tasik – tauka bala tauke kayu batang empu enggau bala orang politik empu dalam BN?

Semua kitai tu udah nemu lalai entelah nya.

Udah nya, kita ninjau bagi logistik iya – kitai ukai deka bejakuka pengawa enchuri tekang intan ti alus.

Tang kitai berandau ngenang pengawa ngenchuri kayuh batang ti besai-besai, ti berega tinggi; kerita lipan enggau tugung kayu batang ti besai-besai enggau atur pengawa ngangkut kayu batang ti kompleks.
Enggau nya, baka ni bala sab-kontraktor nya nebang beribu-ribu pun kayu enggau enda ditemu orang ti megai lisin ti rangka, ti bekereja bebekalka teknologi geo-sat, bilun buah engkabang enggau seraban orang ti betubuh tegap-tegap sereta mangah dipeda, enggau nadai atur pengawa ti kompleks.

Lalu ke penudi tu, aram kitai malik ke belakang ninjau nama pengawa ti udah dipejalaika – nama kebuah atur nya kelalu gerah?

Tambah mega, baka ni pemuntang pengawa dalam kem kayu batang tau nyadi kelang kabut nyentuk ke mar bendar endur nentuka penatai kayu batang ti dibai tama lalu nam kebuah perintah Sarawak mengkang enggai ngangkatka pemanah chara nentuka penatai kayu batang sebaka pemanah enggau atur tengkila pengawa tikas entarabansa.

Sekali ke kitai ulih nyimpul penemu kitai ngumbai bala tauke ti kelalu kaya nya udah kelalu beli ba pengawa dagang sida, tauka kitai tu endnag diasuh meda sebengkah atur pengawa dagang dikena ngenyauhka diri ari ulah ti jai ngena bantu ‘orang ti ketiga’?

Ke bendar iya tuju penunga semua duit nya nunjukka kita sekeda saut ke bendar lalu mega ti endur raban penerit undang-undang ari opis SPRM patut bejalaika pansik sida!

Sapa ti nyuap sapa?

Sarawak Report udah mantaika baka ni raban pemesai ari opis kampung udah disuap awakka nuliska repot pejalai sida ti pelesu sereta bula bekaul enggau pengawa ngulihka batang chara belalai. Lalu kami mega kala mantaika baka ni bala orang nyuap sida nya endang ari kompeni kayu Samling.

Kami mega ngembuan mayuh penerang ti nunjukka baka ni ke bendar iya sida endang diasi kompeni kayu batang ti besai-besai lalu pekara tu ti patut dipansik enggau silik ulih opis SPRM, ukai bala menija kem kayu batang ti semina bejalaika utai ti dikarapka bala tuan sida dikena ngulihka untung.

Tang, enti sema penyalah makai suap tu patut dipunaska, iya patut belabuh ari pun sekali, nama kebuah iya udah ditemu lalu nyadika komplen orang mayuh ba pengelama betaun-taun, tang enda kala diaku chara formal?

Ke bendar iya bala orang politik dalam BN bebula penanggul tu bisi betumbuh, lalu besenutuk enggau nya sida begagaka rumah besai-besai lalu bejalaika kerita mar ti besai-besai mega.

Ngelama tu Sarawak Report udah bebendar amat mansutka penerang ti chukup sereta tegap dikena nyukung jaku tuduh sida.

Kami suah bendar udah nunjukka baka ni bala orang politik dalam BN udah bulih lisin kampung ke sida empu kelimpah ari bulih syer ti besai-besai dalam kompeni-kompeni kayu batang.

Tang sida majak bekereja di belakang siku apek bayat kayu batang, Awang Tengah Ali Hassan, ti endur kompeni jejaga iya udah diasuh ngupah seraban apek bayat awakka merinsaka bala orang bansa asal di pelilih Melikin ba pun taun tu, awakka bisi endur sida tama menua nya lalu ngulihka batang ba kampung pesaka sida.

Nyerumba pengawa nyain ‘sempekat integriti’ dikena, kenu, ngapuska pengawa ngulihka batang chara belalai, dia bala kaban politik BN udah sama bela besetuju enggau komiti disiplin DUN ngelaban MP Violet Yong, ti udah mantah pendiau Awang Tengah Ali Hassan ba pekara tu.

Nya alai, dalam timpuh 24 jam udah tembu ngeluluka diri nyadi orang kering, Adenan Satem dipeda baka siku jeneral perang ti balat ngutuk bala sedadu baris mua iya, laban kenu ku iya, sida sedadu nya enda tekerejaka pengawa.

Adenan Satem tau disemakaka enggau siku jeneral perang ti enda nemu sebarang pengawa kasar dikereja baka nembiak diri.

Lalu, pengawa nyain ‘sempekat integriti’ nya semina ditempa dikena iya ngulihka undi kelimpah ari ti nekan sereta michit bala orang dagang ti besai-besai, kelimpah ari ti ngelepaska sida ari mata ginti iya.

Tang iya endang merambu ngambika dikena iya ngeluluka diri ngutuk sekeda orang ti enda ditemu ngena mayuh macham jaku ti enda manah didinga.

Kitai patut ingat, Adenan Satem nya enda orang ti dipilih Abdul Taib Mahmud nganti iya maya iya badu nyadi Kepala Menteri lalu niki nyadi Gabenor.

Adenan Satem dipilih Abdul Taib Mahmud mangku pengawa kepala menteri nangkan iya, taja pan penemu nya dibantah bala kaban dalam parti BN nya empu.

Lalu Adenan Satem udah besemaya deka neruska langgur Abdul Taib Mahmud ngaga tekat besai-besai di menua Sarawak, ti disadang deka ngerusak semua laluh rampa kampung enggau chara nebang kayu batang chara belalai.

Ingat kita, baka ni Adenan Satem udah chara belalai ngemendarka bala tukang tumbang dalam kompeni MM Golden ngena pengering bala polis enggau apek bayat mejalka diri tama ngagai kampung orang bansa asal di Baram, ngambika ulih endur sida muka jalai nuju tapak ngaga tekat taja pan projek nya bedau dikemendarka.

Adenan Satem tau ngumbai diri ngarika semua rayat Sarawak nyain ‘sempekat integriti’ nya, tang iya patut nerangka ngena pengawa iya, ukai semina baka kepayang ngadaka dilah aja.