Jaku bantah makin ngerembai dalam pengawa pengarang berita bekaul enggau saut ti enda tentu bebatang ari Perintah Malaysia ba pengelenyau bilun MH370 enam hari tu udah ti udah nyungkak peresa ti enda disadang ba atas sistem politik BN.
Agi mega penanggul ti udah nyadi dalam pengelama beberapa hari nya besenutuk bendar enggau pemutus kot ti ngemalu ba atas tuai penyakal Anwar Ibrahim ba dawa ‘belema sesame lelaki’, terima kasih ke apil ti nyelai dikena perintah ngelaban pemutus akuital ti udah dulu agi dipansutka kot.
Semina beberapa hari sebedau nya dawa undang-undang udah ditinggangka ngagai siku agi tuai penyakal, Karpal Singh, ketegal ‘naburka petenah’ mega ngujungka iya diukum enggau atur ti enda tentu nyengala. Kedua iti dawa tu, ngeletak ukum jil ti lama, mudah dipeda dunya nyadika dawa bepolitik ti dipejalaika sebuah rejim perintah ti berasa kena keruga.
Tang ti enda ari ketegal pengelenyau bilun MH370, lampu dunya diatu tentu enda ditujuka ngagai menua Malaysia lalu engka nya semina bisi mimit aja abas ba isu bukai media ti besai agi rampa enggau mega perening orang mayuh.
Ke bendar iya, baka ti ditunjukka agensi berita New York Times ari asil pansik sida empu ba pengelemi politik BN, Malaysia tau ngelarika diri enggau nunjukka iya nya sebengkah menua ti regas, terima kasih ngagai pengawa ngulihka minyak enggau asil tanah ti bukai ti mayuh udah diambi ari menua Sabah enggau Sarawak ti suntuk.
Duit ari asil minyak mega dikena bejalaika pengawa PR ti mar-mar di menua tasik, ti dikena ngemanahka nama sebuah rejim perintah ti bejalaika atur bebelah-bagi enggau korup sereta nunjukka sida nya orang ti bejalaika demokrasi tulin, kelimpah ari nipu enggau nyuap pengundi ba pengawa bepilihbesai.
Nengah suratberita sida, New York Time udah nyimpulka penemu baru dunya ba Malaysia lalu BNn diatu benung nyadika perati bekaul enggau pengelenyau MH370.
Nya begunaka pengawa ti chakah agi dikena ngubah perening dunya pasal menua Malaysia.