Serak tu kami nadai nerima sebarang gambar bekaul enggau pengawa nangkap sekeda bansa Penan ba empang jalai ti diibun sida di Murum, udah bekau dua iku nembiak lelaki ti nguji ngambi gambar ba endur nya udah ditangkap seraban polis ti ngemataka empang sida nya.
Siku ari bala orang ti kena tangkap polis nya nembiak lelaki ti pemadu biak, Tingang Lingok, dipelabaka baru beumur 13 taun.
Dua iku nembiak nya entara 8 iku orang Penan ti dipasukka dalam lokap ba balai polis pelilih menua mit Belaga, penyauh kira-kira tiga jam pejalai, lalu deka didawa dalam kot hari siti.
Tu kedua kali dalam dua minggu raban polis menua Sarawak bisi ditemu nangkap nembiak mit ti biak umur ti bisi bekaul enggau penyarut ba tanah adat orang bansa asal.
Siku nembiak ti beumur semilan taun enggau siku agi ti beumur sebelas taun baru udah dilepaska enda diukum, udah bekau beberapa hari di Miri, ditangkap polis ketegal mantu sida sebilik ngetau buah sawit ba atas tanah adat orang bansa asal ti diambu kompeni kebun sawit ti bekereja di endur nya.
Nama ukum iya?
Bansa Penan ti ngibun empang jalai nya madahka sida betubuh 300 iku lebuh raban polis datai urung pukul 2 lemai.
Laban ke udah takut dikeremba raban polis bansa Penan nya lalu mindahka palan pengibun empang sida ari tapak asal ngagai tapak ti baru 15 kilometer ba jalai besai Murum.
Siku ari raban NGO, ti bisi berandau enggau kami nengah telefon, madahka ngagai Sarawak Report:
“Raban polis datai ngena sepuluh buah kerita ti mai enda kurang ari 80 iku polis, nyengkaum 40 iku polis pengerara penyarut. Sida nangkap 8 iku orang bansa asal nyengkaum dua iku nembiak ti agi biak umur. Bala Penan dia madahka sida endang enda ngelaban lebuh pekara nya nyadi” [Pengari gerempung Brimas]
Raban bansa Penan ti ngibun empang nya madahka raban polis nadai nerangka nama kebuah sida nangkap bala kaban belayan sida nya.
Raban bansa asal nya merambu deka nganjung bala raban sida ke Belaga meri sukung, ti endur polis deka mai orang tangkap nya ngagai kot awakka bisi endur sida nerangka nama bansa penyalah ti udah ngujungka sida nya ditangkap lalu ba timpuh ti lama.
Tang berita ti dikerembaika nengah portal berita madahka polis nuduh raban bansa asal nya ngereja penyalah bepintaka duit ari sebarang orang ti meraka empang jalai sida!
Nitihka portal berita internet, Star Online, Sapit Supt Polis, Bakar Sebau, madahka mensia mayuh ti meraka empang jalai nya udah ngaga repot polis bekaul enggau pekara nya.
Raban NGO ti nyukung pengawa ngempang jalai nya madahka raban polis udah nempa cherita sebubu ngapa. Nya endang udah nyadika chara lama polis dikena sida ngelindung pengawa dagang kompeni ti nebang kayu enggau muka kebun sawit ngelemika bantah orang bansa asal ti bempu menua ti charut enggau kompeni-kompeni nya.
Sarawak Report udah diterangka ti madahka bala pengibun empang jalai nya, diatu udah nirika empang ba jalai besai Murum, endang ngemendarka mayuh kerita meraka empang sida. Pemendar meraka empang nya ukai semina ke bala orang di menua nya empu, tang mega ke lori pengangkut batang enggau bala pengereja pengawa kompeni-kompeni ti berundang nengah jalai besai Murum nya.
Mayuh orang endang sinu ke bala Penan ti dipejal pindah ninggalka menua asal sida laban ditiki ai tekat ti diisi Perintah Sarawak enggau kompeni SEB taja pan pampas ke orang bansa asal nya bedau pukas diperundingka tauka sebedau penembu palan pengentap pendiau baru.
Tang, Sapit Supt Polis Bakar Sebau udah nuduh bansa Penan ti ngibun empang jalai udah mejal sebarang orang ti meraka empang sida , nyadika sebengkah penyalah, nitihka penerang ari portal berita internet, Star Online.
Raban NGO nya madahka semina lori pengangkut simen ti bekereja ke Sarawak Energy aja enda diasuh tama ngagai tapak tekat Muru, ti bedau tembu nya.
Raban bansa Penan mega nagang kerita enggi kompeni sab-kontrak Shin Yang ti bekereja enggau SEB.
Shin Yang mega ngulihka kayu batang di menua nya lalu muka kebun sawit ba atas kampung pesaka ti udah ditetapka nyadika kampung endur bansa Penan ngasu-beburu, taja pan udah disebut perintah menua ba aum Gerempung Bansa dulu suba.
Kuasa ti kritikal
Dalam beberapa hari tu nyadika tinjau ke rebak dudi ti kritikal ke raban bansa asal ti bebendar ngulihka pengelurus nagang kampung enggau daya idup sida ti nyelai nya dikeruga.
Sida udah ngenggaika program betanam betupi ti bepejal baka ti patut dikereja sida ba palan pengentap pendiau ti baru digaga SEB, tang sida nadai tau milih nerima duit ti lebih ari pampas bulan ti mimit ari gaji bulan enggau bantu beras enggau minyak makai ti diberi perintah menua.
Cherita tu deka dibai lalu didingaka dalam kot pagila.
Diatu pengirau ati orang mayuh betumpu ba siku bansa Penan ti kena tangkap, ti patut dianjung berubat ketegal bisi pedis ba pegu iya maya iya ditangkap polis kemari.
Perintah Sarawak disadang deka menang kes bechara tu laban sida endang ngena kuasa dikena sida ngelemika ‘tachah’ raban bansa Penan. Tang baka ni ku pemanah nama sida enggau CEO bebansa Norway ti chakah digiga sida dikena mutar ke penanggul tu, tentu deka lenyau pia aja.
