Pendiau ti nadai ngembuan basa ti ngasuh ati mayuh orang tekenyit ngagai sebuah tanda pengingat penuh cherita lama menua di Sarawak udah tebantai, ti endur sebuah tanda pengingat beregang Rajah Brooke, ti udah dichabut ari penuduk asal iya ba luar Astana gabenor Sarawak, lalu udah nya diengkahka ba tugung uras.

Tanda regang nya udah lama bendar didirika ba mua Astana, nyadika sebuah tanda pengingat ke tiga iku anak Brooke, ti lenyau di tasik kelia.

Nya nyadika sebengkah tanda pengingat ti ngenyinuka ati, diias ngena segenteran leka jaku “suffer little children come unto me [bala anakku datai mih ngagai aku]” ti dibelitka ngelingi tiang regang nya.

Tang enggau gambar-gambar foto ti terang bendar tu, regang nya dipeda baka ti udah dichabut ari penuduk asal iya lalu diengkahka begulai enggau uras enggau perengka dikena berumah, sekumbang pengawa miki enggau nyeruri rumah nya.

Berebak enggau pengawa raban-raban bala orang ti lunggar penemu dalam pengarap sida ti suah didinga rauh-rauh sereta bekerugaka bala orang Kristian enggau orang pengarap bukai di Malaysia, ulah ti enda ibuhka tanda regang sida Brooke sebilik tu ti bisi ngembuan cherita lama menua tu udah dilamun ngambika enda ditemu orang mayuh.
Raban-raban ‘NGO’ soldadu penyelawai Islam Perkasa, baru udah madahka langgur sida ti deka numbuhka siti pampang ke bala tukang panjung sida di menua Sarawak. Uji kitai meragam baka ni pemalat pengeringat sida enti pengawa tu dikereja ba atas sebarang kelai bekaul enggau pengarap Islam?

Kepala Menteri Taib Mahmud, ti kala didinga ngaku pengarap iya nya dikarapka raban orang Islam ti mimit agi tubuh dalam pengelama 30 taun merintah menua, udah netapka iya mih orang ti patut dikarapka nyaga kuasa enggau peneka sida empu ba jalai pengarap sida.

Enti baka nya, iya patut masuk champur dikena iya ngemetulka penanggul ti enda ibuh ke utai ti dikereja ba tapak Astana gabenor ti benung diseruri tauka dibiki di Kuching nya.

Projek ti nyelai sereta ngalitka ati

Isu tu udah nyerungkai sebengkah pekara ti nyata ti enda ditemu mayuh orang, taja pan iya bekaul enggau pemansang ba sebuah rumah cherita lama menua ti beikonik di Kuching ti disadang begunaka ungkus belanja ti besai bendar.

Nama utai ti benung nyadi ba Astana?

Bala orang ti mansa-mansa endur nya berasai alit ati meda pemesai rampa “pengawa nyeruri” nya dikereja ba tengah-tengah nengeri nya, ti dulu suba dipeda tampak bendang-bendang ba tebing sungai betunga enggau nengeri Kuching.

Rumah ti betukuh rambau koloni, setingkat ti bediri bendang-bendang nya digaga Rajah orang kulit burak kedua ti ngembuan pengingat lama.

Diatu Astana nya udah kena lindung peninggi rumah DUN ti baru, ti digaga kompeni CMS enggi sida Kepala Menteri sebilik.

Tang diatu rumah nya dipeda jauh mit lalu dirumpang sereta diganti enggau “sayap ke opis atur pengawa” munyi ti diterangka ba papan tanda projek, dipeda besai agi ari rumah ti asal.

Sayap rumah ti baru nya mega dipeda deka bisi endur sebuah surau endur orang Islam besembiang.

Penusah ati raban Brooke sebilik?

Pemesai rampa kandang endur ngerumpang rumah cherita lama nya dikereja beserimbai enggau pengerami Ulangtaun ke-50 Sarawak Merdeka – abis enda pan ulangtaun pemasuk menua Sarawak dalam serakup Malaysia.

Beserimbai enggau pengerami nya Sarawak udah ngena singkang ti popular mansang ke mua ke mimit enggau chara ngambi bala uchu Rajah Brooke awakka ngambi bagi ba pengawa nguduska abus niang Rajah Muda Sarawak ti ke penudi, iya nya Anthony Brooke, ti udah minta tubuh diri ditumbakka di menua Sarawak.

Mayuh orang tentu deka ngumbai rumah lama endur bala Rajah orang kulit burak nya diatu dirumpang, tanda regang dichabut ari penuduk asal iya lalu diganti enggau sebuah mesjid.

Taib endang bisi kuasa ba jalai pengarap iya empu, tang pengawa iya patut nunjukka basa iya ngagai jalai pengarap raban bansa bukai ti mayuh agi tubuh di menua iya?

Lalu sapa mih ti deka diau ba Astana nya?

Bisi sebengkah utai ti mai kitai ngagai isi berita tu. Peragam orang mayuh bekaul enggau kebuah ti nyeruri rumah lama tu nya Kepala Menteri ti udah tuai umur nya nyau belabuh ngatur singkang iya jauh agi ke mua – neruska langgur iya ti deka tama lalu diau dalam Istana Gabenor nya!

Agi mega, tu nerangka pasal pengawa ngaga sayap opis atur pengawa perintah, laban Taib Mahmud patut deka neruska kuasa iya merintah menua nya, taja pan iya deka nyurutka diri lalu udah nya mangku pengawa nyadi gabenor.

Nya mega nerangka pengawa mesjid digaga ba endur nya.

Peragam bala orang mega disukung berita ti dikerembaika di sebelah Kuching ti madahka beberapa iku bala kroni Taib benung gagau bendar di menua Eropa laban begigaka kerusi-meja stail lama berega mar, ti endang seruran dikerinduka Kepala Menteri nya.

Agi mega, gabenor ti benung mangku pengawa ke diatu nyau manggai umur 90 taun, lebih kurang 20 taun tuai ari Taib, lalu Taib diatu benung napi tekan enda tau enda nyingkang ke mua ke agi. Bisi siti penemu (tang ukai ti bendar) madahka, enggau chara mangku pengawa gabenor Taib deka nyadi kebal ari sebarang dawa undang-undang menua.

Engka iya udah bulih setuju ari Najib?

Engka langgur nya udah dipesetujuka ti endur, enti Taib neruska salah guna kuasa nyadi Kepala Menteri, Menteri Besai nya deka ngemendarka bala gabenor deka diberi kebal (ari undang-undang menua) nyengkaum siku tuai kleptokrat (ti dibalut penyalah makai duit menua ti mayuh bendar)?

Enggau chara tu, UMNO/BN engka deka arapka rakyat Sarawak deka terus ngundi raban tuai ti sebaka.
Enggau chara muai tanda regang ngagai tugung uras ba ujung bilik Astana nya engka tau nyadika siti ari atur pengawa nya!