Cherita bisi ditusui madahka bala kaban Gerempung Pengarang Berita Sarawak nadai bulih isi cherita ti bendar lebuh penemuai sida diatur kompeni menua Sarawak Energy Berhad (SEB) diatu udah dikeluarka ba surat-suratberita di menua Eropa ba ujung minggu tu.

Suratberita menua Peranchis, Le Monde, nuliska repot pasal bansa Penan ti nirika empang jalai (taja pengawa nya ditusui bala pengarang berita Sarawak madahka empang nya udah ditinggalka) ba sebengkah berita ti panjai pasal pengerusak rampa menua ketegal projek-projek tekat Taib Mahmud.

Beserimbai enggau nya, suratberita Ny Tid ari menua Norway udah mega nuliska berita pasal bantah bala orang ngagai CEO SEB Torstein Sjotveit ti peranak menua nya.

Ny Tid udah nuliska repot pasal tuduh atas Sjotveit ti bekaul enggau penyalah makai suap dalam projek-projek ngaga tekat besai di Sarawak enggau pengawa iya meri kontrak beratus-juta ringgit ngagai kompeni-kompeni enggi sida Taib sebilik lalu diatu pekara nya udah datai ba opis penagang penyalah makai suap Norway, Okokrim.

Nadai siti repot-repot ti munyi nya bisi ditusui nengah surat-suratberita ti balat dikemataka di menua Sarawak lalu gerempung NGO Bruno Manser Fund udah ngeluarka penerang pasal jaku Sjotveit dalam Ny Tid, “aku endang mantah penyalah makai suap ti nyadi di menua Malaysia”.

Gerempung NGO nya betanya:
“Baka ni Sjotveit madahka diri nadai bekaul dalam pengawa makai suap di menua Malaysia enti iya bekereja enggau Kepala Menteri Sarawak ti benung dipansik nya? Kami deka enchabar Sjotveit ngasuh iya mansutka penerang ngagai orang mayuh sekali ke iya bekereja ba sebuah perintah ti lurus tauka sebuah perintah ti bingkuk.” [Lukas Strauman, Pengarah BMF]

Le Monde nusui berita ti udah ditinggalka bala pengarang berita Sarawak empu

Bisi 25 iku kaban Gerempung Pengarang Berita Sarawak enggau Gerempung Pengarang Berita Komanwel udah ngambi bagi ba penemuai ngagai Murum, ti diatur SEB ba ujung bulan Sepuluh nyin kemari.

Bisi beberapa iku pengarang berita dalam raban nya nuliska artikel sida belalauka surat-surat penerang ti endang diberi SEB, ti nadai seleka jaku pan nyebut pasal bantah ari bansa Penan enggau Kenyah, ti enggai dipindahka ngagai palan pengentap pendiau ti baru ketegal bayar pampas ti enda meruan diatur. Cherita pasal empang jalai ti diibun bala orang bansa asal nya mega nadai ditusui sida ba suratberita menua Sarawak.

Udah nya suratberita Sarawak Tribune ti dikemataka sida Taib sebilik (ti betuaika anak Taib empu) udah ngeluarka sebengkah artikel ngena topik “Gerempung Pengarang Berita Meri Puji Ngagai SEB”.

Artikel nya udah ngasuh bala pemacha berita di Kuching ketawa geli ati, lalu tau ngumbai berita nya sebengkah propaganda ti berat sepiak laban ngemesai-mesaika orang ti ditiki temuai raban pengarang berita ti dipelanja perintah menua lalu SEB mega bisi ditemu meri ‘perais’ ke bala pengarang berita ti ulih ngarang artikel pemadu manah, nitihka perati enggau peresa kompeni nya empu.

Bala pengarang berita udah ngeluarka sebengkah repot kena hari Empat nyin kemari ti serebanaka pasal portal Sarawak Report ti nyadi “pengarang berita ti enda manah” laban udah nunjukka pasal pemuntan sida ti nusui pasal bansa asal ti angkat mantah.

Diatu bisi dipansutka dalam laman Facebook ti madahka bala pengarang berita nya udah dibai nemuai ngagai palan pengentap pendiau baru enggau chara pejal, Tegulang, tang enda mukai-mukai bala orang bansa asal nya enggai berandau enggau sida!

Nitihka cherita Sarawak Tribune, penemuai bala pengarang berita nya diatur SEB ari ‘asuh’ CEO sida, Torstein Sjotveit, lalu SEB mega bisi ngeluarka ‘setifiket pengaga ati’ ngagai bala pengarang berita ti ngambi bagi dalam penemuai ke Murum nya.

Repot ari Le Monde

Sarawak Report diatu ulih ngeluarka salin berita ari Google Translate ke artikel dalam jaku Peranchis ti dikeluarka suratberita Le Monde bekaul enggau penyarut nya [Dalam kampung Malaysia ti mengkang ngelaban – ulih Remi Barroux]

Sebengkah tachah ti puntan. Laban tapak nya regas bendar digaga lalu nyau deka tembu. Lebuh kita nengah jalai, ti besabungka negeri Miri, Long Singu ? pejalai lapan jam nengah babas ? pejalai tanggul ketegal pemanjai baris lori batang 15 – 20 m lalu lori pengangkut barang projek. Enda mukai-mukai, ba atas tanah, tengah-tengah kampung, bisi sebuah perau. Perau nya diengkahka dia laban deka dikena ngangkut barang kebun sawit enggau perengka tukang tumbang kayu batang, lebuh datai ba maya paras ai niki ngagai emperan. Penerang iya bisi ditemu ditu, enda lama agi semua utai nya deka lenyau belama-lama iya.

“AKU ADA DITU LALU AKU ENGGAI NINGGALKA MENUA TU”

Semanjai jalai ngagai Long Singu kami enda tau enda mansa mayuh palan pemeresa, meri lumur kerita, ninggalka surat penerang diri empu ba pemesai-pemesai ti diasuh bejaga ba belakang empang ti digaga kompeni Malaysia Shin Yang, ti endur chap kompeni mirah sida terang bendar ngias perengka-perengka pengangkut sida. Ba ujung pejalai kami, kami datai ba sebengkah kampung, sebuah rumah panjai, rumah betiang kayu ti diwan mayuh raban orang diri sebilik ba tiap pintu. Rumah nya agi diwan orang, indu, lelaki, nembiak mit. Tiger, sebansa bir dibantaika enggau pechuma, ngasuh sida seraban dia ketawa, inggar agi ari munyi jelu kampung.

Malam nya ruang rumah penuh enggau munyi indu utai enggau munyi jelu ti mit-mit. Lebuh maya makai lemai nya ? asi, sup kaki jani enggau buah kayu kampung ? beberapa iku orang bansa Penan dipeda bisi berandau dalam “manse” ti dikena sida ngulu bala temuai ti jarang datai. “Padahka ngagai dunya utai ti dikereja kita ba bansa Penan. Nama aku Karang Bo, aku ada ditu lalu aku enggai mindah ari tu, ku siku orang tuai urung semilan puluh taun nya. Kami tinggal dalam kampung tu, lalu pemakai kami dari ari kampung tu. Diatu jelu udah lari, burung, jani babas, kera, lalu ikan majak mimit laban balat dikeruga keruh enggau racun.”

Bansa Penan ngenggaika “pemansang” ti disemayaka perintah. “Kami deka mansang tang ukai enggau chara ti ditentuka ba atas kami,” ku Minah Siap siku indu Panan beumur 25 taun ti berandau enggau kami seraya digelumu tiga iku bala anak iya ti agi mit. Ba tengah pemetang malam ti ujan beberis nya, lampu enda tentu terang dikuasa ngena injin api, Robert Beatle, siku lelaki bansa Penan beumur 35 taun ti bisi pantang ba lengan enggau rekung iya, madahka pengeringat diri. “Tekat tu munuh raban bansa kami, kami deka ngeletupka tekat tu!”

“TEKAT TU NANGGUL 20,000 IKU ENGGAU 26 BUAH GENTURUNG PENDIAU BANSA ASAL”

Raban bansa Penan diatu benung beperang tang sangkuh enggau sumpit sida enda telabanka pengawa dagang. Kerita lipan udah ngereja pengawa sida, ngambi semua asil kampung sida. Lalu utai ti jai bendar udah nyadi nya, tekat udah diisi ai ba ujung bulan Semilan lalu disadang penuh dalam pengelama setaun. Ngampuhka emperan enggau genturung pendiau. Tekat ti ketiga udah Batang Ai enggau Bakun. Murum digaga SEB dikena mansutka kuasa elektrik 944 megawatt, sebaka enggau pemesai kuasa reaktor kuasa nuklear Peranchis. Iya sebagi ari projek mansutka kuasa elektrik ti ba taun 2030 ila deka ngeluarka kuasa 20,000 megawatt enggau sepenembu sebelas agi tekat di serata menua Sarawak.

“Ba Sungai Baram, tiga buah tekat udah deka digaga, tang pengawa ngaga Baram 1 udah ditagang raban bansa Kenyah, Kayan enggau Penan ku Peter Kallang, siku engineer beumur 63 taun ti udah badu gawa, ari raban bansa asal Baram ti nyadi tuai dalam NGO Save Rivers. Sebengkah tekat ti deka nanggul 20,000 iku orang bansa asal, 26 iti genturung pendiau.” Pengawa nagang pemasuk ngagai tapak projek, enggau beratus iku orang di menua nya, berengkah ba ujung bulan Sepuluh.

Kompeni Sarawak Energy Berhad, kenu ku iya “mayuh penerang ti bula” pasal Perambu Pengawa Pengentap Pendiau ke raban bansa asal ti tasah laban projek. “Umbas nya, pengurus SEB, Datuk Sjotveit. 2.5 juta iku orang ti disangkung program nya deka ke pemansang, perengka diguna ti manah, enggau pelajar kelas entarabansa. Nama kebuah orang di Sarawak enggau orang bansa asal Murum enda diasuh ngena pemanah baka ti dikena orang di menua ti lama udah mansang?”

SEB enggau perintah deka ngatur projek SCORE: tekat nya dalam program SCORE. Kuasa elektrik ulih dikena narit dagang nyengkaum pengawa mansutka beli steel. Utai ti ngasuh Peter Kallang irau ati nya, “ba pun iya, perintah deka ngeluarka kuasa elektrik nengah kabel dalam tasik ke menua Semenanjung Malaysia sereta nyual kuasa nya ngagai Singapura enggau Thailand, ku iya. Tang projek nya udah dilekaka dalam 1998: kelalu besai belanja.”

“10,000 IKU ORANG LENYAU ENDUR DIAU”

Nyau datai semak agi ngagai Murum, diperatika, perengka projek diengkahka atas asil jari ti ngasuh ati alit, tinggi 140 m ulih dipeda. Tang iya nyadika menyadi biak Bakun, gerasi 205 m tinggi enggau 750 m panjai ngayuhka lapan itu turbin 300 MM, ti ngampuhka kandang menua semesai pulau Singapura. Ari Bakun, lima belas genturung pendiau enggau 10,000 iku orang bansa asal udah diasuh pindah.

Beberapa kilometer ari ili Murum, bisi empak iti genturung pendiau bansa Penan ? Long Menapa, Luah Long, Long Singu enggau Long Tangau ? enggau raban bansa Kenyah ari Long Malim kenyau ari 17hb Semilan, nirika kem sida ba tisi pegung ai ti betakat. Sida nagang pejalai trak lalu dikemataka raban polis. “Tu ketiga kali utai tu nyadi, tang diatu kami enggai agi nginsit nyentuk ke perintah mampas kami lalu ngemendarka kami tama kampung, ku Kilau Milk.
Bakih iya Lugan Usang udah dianjung ke Miri, 500km ari Long Singu, ngagai sebengkah aum berita. Iya siku ari lima delegesyen ti ngarika orang menua nya. Dulu ari tu iya udah ditulak orang mayuh. Laban iya udah nuduhka penemu mai badu betindak ? ku Peter Kallang: “Perintah udah milih tuai raban, lalu mayar sida ngena chek. Menteri Besai Sarawak enggau sida sebilik bekuasa ba semua pekara. Sida bisi dagang dalam sawit, kuasa elektrik. Bala orang mayuh takutka sida sebilik lalu enda ngelala kuasa pengelantang sida empu.”

BETACHAH ENGGAU ADAT MENUA

Enggau enda tetarit ati ke pemesai nengeri Miri enggau 300,000 iku rakyat dia, Lugan, 23 taun madahka, iya udah besedia, iya udah nurun ngiga pengidup ti manah agi. Dibayar gaji ti mit ba kebun sawit Shin Yang, iya madahka iya enda ngenggaika pengidup kemaya hari tu. “Aku deka ke bala anak aku besekula, tang sida tau baka chara aku, tama babas, ngasu, nangkap ikan, nanam padi enggau ngumpul buah babas.”

Nyentuk ngagai taun 1960, bansa Penan nya bansa ti mindah-mindah dalam pendiau sida. Idup mindah-mindah nya ditagang. “Kami enda tau enda ngamatka penerang ti madahka kami endang bisi tanah diwan kami turun menurun ari aki ini kami. Mayuh penyarut udah dibai ngagai kot bekaul enggau pengawa ngerampas tanah. “Tachah adat menua balat udah nyadi entara kompeni besai-besai, perintah enggau orang bansa asal.

Tang Kuala Lumpur enda ibuhka bansa Penan naka ke diatu. Kena 2 haribulan Sepuluh tu, sebengkah bantah pupu raban bansa diayanka bepuluh-puluh iku orang. Sukung manah bendar. “Raban bansa Penan nya bansa ti enda ditemu orang mayuh, tachah sida enda ditemu, laban media enda nusui pasal sida, ku Harrison Ngau, lawyer Laing “anah menua” di Miri. Bisi maya kitai menang bechara, tang bansa Penan enda ngelala kuasa pengelantang diri empu. Kami deka ngulihka pampas ti mayuh agi ke sida.”

Dikelingi pun sawit, Minah duduk, siku indai bansa Penan ti agi biak madahka diri enggai pindah ninggalka menua asal sida ngagai Long Singu. “Sida meri kami sebuah rumah, sebidang tanah, lalu kami deka ngetanka kampung kami,” ku iya.