Datuk Torstein Dale Sjotveit ari kompeni besai Sarawak Energy Berhad enggau seraban bala tuan iya dalam Perintah Menua Sarawak udah nuduh pengawa orang ti mantah projek tekat Murum nya, kenu ku iya, diasut sekeda raban NGO ari luar ti beniat deka ngayanka raban orang bansa asal nya nyadika orang ti numbuhka pengachau di endur nya.
Ke bendar iya, pengamat berita enggau penerang nya enda betul sereta nengkeman tauka kabur ti datai ari tapak tekat Murum di seradak ulu sungai, ti diatu benung diisika ai kenyau ari sebulan tu udah.
Diatu bisi sebuah video ti direkod sekeda bala orang ti nemuai ngagai endur empang jalai ti ngayanka pengeliat ati seraban bansa asal ti enda mayuh tubuh nya ngiga pengelurus.
Seraban orang ti lelaki, indu enggau nembiak mit ti ngibun empang jalai dalam pengelama sebulan tu, udah idup dalam pemar lalu semina udah digusung bala temuai ti enda mayuh meda ke gaya pendiau sida.
Tang, kenyau ti udah nirika empang jalai lalu diperatika orang luar, sida mega digusung raban polis ti besenyata, ti ngarika orang ti tama kampung enggau tanah pesaka sida, ti bebendar amat deka bejalaika atur pengawa sida empu.
Tu mih raban orang bansa asal ti patut dibai Taib Mahmud berunding sebedau iya tama lalu ngeruga kampung enggau tanah pesaka sida lalu diatu diisika ai tekat Murum.
Enggau pendiau ti sumbung Taib Mahmud udah melakangka kuasa-kuasa sida lalu diatu sida bejaga di tisi jalai laban deka ngemalu iya awakka dipeda sereta ditemu mensia mayuh di serata dunya.
Liwan Lagang ringat bendar
Penemuai pengari perintah Liwan Lagang ngagai tapak empang jalai nya, ti endur iya minta siku Tuai kampung orang bansa asal dia nyain sempekat besetuju ke pakej pengentap pendiau ti baru ngarika nembiak iya.
Tang enda mukai-mukai Tuai kampung nya madahka iya semina ulih ngarika iya empu enggau sida sebilik aja tang bala nembiak redak iya ti bukai patut dibai berunding kediri-kediri.
Ba renggat tu, bala pemerati randau nya bisi madahka, menteri nya lalu ringat sereta merak tuai kampung nya, enti iya enda mujur mejal bala nembiak iya nerima pakej atur pengentap pendiau ti baru nya, iya deka dibuai ari pengawa iya ti nyadi tuai kampung.
Tu mih cara Taib Mahmud bejalaika atur enggau langgur perintah iya ti nadai ngayanka basa ngagai adat demokrasi menua tauka ngagai kuasa pengelantang pendiau rakyat iya. Ngelama tu iya menang bejuang laban ngena sukung ari raban apek bayat enggau senyata api.
[youtube http://www.youtube.com/watch?v=NYAjhP8m2BA]